ESTHER 6 - Sumi Naga CL (Re-edited) Bible (BSI)

Akükau no Mordecai Gihu

¹ Tipa ji akükau ye zühu mlave. Ikehu pa no kümsüma mlakeu kümla yekikithi kaku peighi penike azah tsüno pa zülono tipaqo phisüpe.

² Tilehi akükauw shokomi Bigthana ngo Teresh, khuu pama no ahukikha lashe khekuto ache eno Akükau Ahasuerus shou au beniye shi keno, pama ghili Mordecai no pikeu yepüaghi ke ithulu.

³ Akükau no pi, “Hipau ghenguno agigihu kighiche kiu Mordecai shou betsü kea?” Akükauw apumi khunoqo no pa hiju akeno panongu no pi, “Pa ghenguno kiumu shitsü mphie.”

⁴ Akükau no iniju, “Küghaki lo khuu ani kea?” Haman ye akükau vilo pa no tshükiqhi-a mla püakeu lono Mordecai pithiveni keu vehu piniye akükau kighiki khala lo ighiae.

⁵ Akükauw apumiqo no pa vilo pi, “Haman ye hile küghaki lo puthugho ani.” Eno akükau no pi, “Pa pelo iloghi pelo.”

⁶ Haman no iloghi, eno akükau no pa vilo pi, “Akükau no khuu lau agigihu tsüniye alokiqi shi ani keno timi tipau lau kiu shitsü kepu kea?” Haman ye pa likhi pa shou kümsü pukuve, “Akükau ye I nguno alau khuu gihuni ke alokiqi ania?”

⁷ Pa no akükau vilo pi, “Akükau no gihuniye alokiqi shi akeu ghenguno,

⁸ kükaphi chijeboi keu khikhi akükau no pepu cheni eno kükakütsüqho xapu khurshi khipau lo iku cheni keno tipau peighi pelo.

⁹ Eno chijeboike phi ngo khurshi ye akükauw hiyampemi dolo atomi lakhi u lo süvetsü pelo. Akükau no agigihu tsüniye timi khuu shou alokiqi shi ani keno panongu pelo aphimini pipe pelo, eno panongu no khurshi lono pa sasü mishighüna laghila katha wuno pa zülono asheshu lo: ‘Khuu lau akükau no agigihu tsünike alokiqi shi ani keno timi tipau shou hitoi shitsü nanie.’”

¹⁰ Tile akükau no Haman vilo pi, “Mtazü nono pive ketoi chijeboike phi ngo khurshi ikhilulo, eno Jewmi Mordecai, khuu akükau khagho lo iqa ani keno pa lau titoi shilo. Nono pive keu kiumu kümsüma kevilo.”

¹¹ Ikehu Haman no chijeboike phi eno khurshi ikhiluve no pa no aphimini Mordecai pepipe eno mishighüna laghila katha wuno pa zülono asheshu, “Khuu lau akükau no agigihu tsünike alokiqi shi ani keno timi tipau shou hitoi shitsü nanie.”

¹² Tithiu Mordecai ye akükau khagho lo ideighive. Ikemu Haman ye pa kütsü küzüluve no amloksa shi pa ki lo mtazü wove.

¹³ Eno Haman no pa nipu Zeresh ngo pa küsami vilo pa lau kiu shive keno kümtsü pive. Tile pa küsami alokütsümi ngo pa nipu Zeresh no pa vilo pi, “Tsala Mordecai, khuu zülo nono ikiqive akeno, pa no Jewmi shi aghi aye, no ye pa theqhi lumo nani ikemu mtsüqheino pa zülo ikiqive nani.”

Esther no Haman Kukughu Pephe

¹⁴ Panongu no pa pütsa aphi lono akükauw shokomiqo no mtazü Haman sasü Esther no aghulhu kuto püakeu lo wuniye ighive.