ESTHER 5 - Sumi Naga CL (Re-edited) Bible (BSI)

Esther no Aghulhu Kuto

¹ Atsala aküthüni Esther no kükaliu phimini pepuve no akükau kighiki alou akükau chebo zülo puthugho, akükau ye pa küka chebo alou kükalakhü lo, akighiki ikulola gizüu, iqa ae.

² Kughou Kükaliu Esther no küghaki lo puthugho akeu akükau no ithulu keno, pa no li kimiyeqhiyi ithuluve, eno pa no ameshoyi kükaküsü pa u lo pe akeu chhopuwo Esther tsüe. Ikehu Esther no azüu ighi no kükaküsü akümtsü buvetsü.

³ Eno akükau no li vilo pi, “Kiu kea, Kükaliu Esther? Nono qhüiniju akeu ye kiu kea? I kükaqha tüxa kutolo mu o tsü nani.”

⁴ Esther no pi, “Akükau lopu shilu aye, akükau ngo Haman pama pelo ishi I no aghulhu lakhi akükau ghenguno kutope püakeu lo ighitsü penishi ani.”

⁵ Akükau no pi, “Mtazü Haman saighi lo, tishino nikujo no Esther no pi aketoi shini.” Ikehu akükau eno Haman pama ye Esther no aghulhu kuto püakeu lo ighi.

⁶ Aghulhu thiu panongu no aji sho akelo, akükau no Esther vilo pi, “Nono kümsü pulo akeu ye kiu kea? Tipau o ghenguno shitsüni. Eno nono qhüiniju akeu ye kiu kea? I kükaqha tüxa kutolo shi aghimu, ti shikupu tsü nani.”

⁷ Tileno Esther no pi, “I no kümsü pulo eno I no qhüiniju akeu ye hike:

⁸ Akükau no I kimiyelu kepu shi aye, eno akükau lopu shino I no kümsü pulo eno qhüiniju akeu shikupu tsülu kepushi aye, akükau ngo Haman pama I no aghulhu kuto niye akeu lo ighilo, eno akükau no pi akeu I no thoghiu no pini.”

Mordecai Tshüqhi nike Kughu

⁹ Tipani Haman ye amlo lo alokivi shi ipeve. Ikemu akükau khagho lo Mordecai no pa zülo ithughimo momu msaighü keumu shimo keu pa no ithulu kelo, pa ye Mordecai shou aloghu no chhitoive.

¹⁰ Tishimu, Haman ye pa ampi ghasüve no aki lo wove, eno pa no pa küsami ngo pa nipu Zeresh kupuwu no saghipe.

¹¹ Haman no pa küakini hukülü ghili, pa nuliqo, akükau no pa gihu keu shi pa xaqhe keqo, eno kishi pa no pa ampi pesü akükauw hiyampemi ngo aqemi kümtsü nguno akiqheu lo süqhe keno tipaqo panongu vilo pi ae.

¹² Haman no pi, “Kükaliu Esther ghi I nguno alau ye kütami khuu pelomu akükau gholo li no aghulhu kuto keu lo ighi pemoe. Eno thoghiu ghi li no akükau gholono I kusü anie.

¹³ Ikeghi Jewmi Mordecai no akükau khagho lo iqa akeu I no ithulu ake tivilo, I ghengu ye hipaqo kümtsü ala kühae.”

¹⁴ Ikehu pa nipu Zeresh ngo pa küsami kümtsü no pa vilo pi, “Tshükiqhi-a lakhi akiqhelau auxakuchho muku kini mlalo, eno inaqhe no akükau vilo pive no tipau lono Mordecai tshüqhive pelo. Tishino alokivi shi akükau gholono aghulhu lo wulo.” Akükümsü hipau no Haman lopu shive, eno pa no tshükiqhi-a mlavepe.