ESTHER 4 - Sumi Naga CL (Re-edited) Bible (BSI)

Esther no Jewmi Kuphu

¹ Kughou Mordecai no hi kümtsü ithive keno, pa no aphimini süxüve no yeqhiyephi eno ayevu kuchhu, eno mishighüna mta lo wuno ighamku kukhukimji shi qae.

² Pa no akükau khagho kulaghi lo wu, kughengu timi khumu yeqhiyephi pepusü akükau khagho lo ilope chemo ke.

³ Eno aphughi khile akükauw xaküthaza ighi keno, tile Jewmi lau akumlo kije, kümvü keu, aküqa eno amloghuju ighive, eno kutomo no yeqhiyephi ngo ayevu lo ihozü luve.

⁴ Kughou Estherw ililhotheqo ngo liw shokomi no ighi no li vilo pi keno, kükaliu ye shishe amlosave. Li no aphimini Mordecai pipeni ye tsüpuwu, tishino pa pelo yeqhiyephi xaqhive peniye shi, ikemu pa no tipaqo ikhilu move.

⁵ Tithiu, Esther no akükauw shokomi lakhi Hathach, khuu li hiju penike süsü püa keno, pa kupuwu, eno azah pa tsüno Mordecai ye kiu shi ani eno kushiye tishi ani keno ithi penike puwue.

⁶ Hathach no akükau khagho phivilo mishighüna kobidi-a lo Mordecai lau ighi,

⁷ eno Mordecai no pa lau kiu shive keno kümtsü pa vilo pive, eno Haman no Jewmi kütsaveni ke ghenguno mtsüqhei pisa khije akükau kinibo lo sütsü niye ashoqhi shi keno tipaqo ghili pa vilo pive.

⁸ Mordecai no Susa lono yepuwu keu kiyepa, Jewmi kütsave niye akeu, lakhi pesü pa tsü, ti ye pa pelo Esther piye no ti hephope pitsü peniye, tishianguno li pelo liw timi züqhushi akükau lau wuno paw kikimiye qhüiniju eno pa pelo saphutsü peniye ke.

⁹ Hathach no wuve eno Mordecai no kiu pi keno Esther vilo pive.

¹⁰ Tileno Esther no Hathach pelo Mordecai lau wu penike azah tsüno pi,

¹¹ “Akükau qemi eno akükau timi aphughiqo lo akemi kümtsü no ithi anike tsala kiptimi momu totimi khuu no kusümo keghi akükau küghaki lo iloghi keno, tile ayezah lakhi likhi anie—ti ye pithiveni keu, khuu lau akükau no ameshoyi kükaküsü chhopuwoni keno pa ye xüluve nani. Ikemu, I ghengu ye, hi atsala shighi kutolo akükau lau ilolu penike kusü mphie.”

¹² Esther no kiu pi keno panongu no Mordecai vilo pi.

¹³ Tile Mordecai no panoqo vilo ishi Esther khochile lopi, “No ye akükau kighiki lo ani kehu Jewmi kütami nguno alau pokalu nani pi o likhi o ghenguno kümsü kevilo.

¹⁴ Kughengu nono hipa tüqhüdo lo inaqhoive aye, Jewmi ghululu eno xaphe luni keu ye a-a kütau lono ighive nani, ikemu no eno o pu kibo ye pühave nani. Eno khuu no ithi ani kea no ye ado hitoi keu ghenguno kükaqha lo ighi aghiluvi ke!”

¹⁵ Ikehu Esther no panoqo vilo Mordecai khochile lopi,

¹⁶ “Wulo, Susa lo Jewmi ithulu keqo kümtsü hekütsü lo, eno I ghenguno kümvü lo, putho pucho tsala küthü chusho kevilo. Ni eno Iw lhothelimi ghi nongu toi kümvüni. Tishino ayezah hexa aghimu I no akükau lau wuni, eno tsala I pühave kepu shimu, ni ye pühaveni.”

¹⁷ Tileno Mordecai ye wuve eno Esther no azah pa tsüke toi kümtsü shive.