ESTHER 3 - Sumi Naga CL (Re-edited) Bible (BSI)

Haman no Jewmi shou Küsüqe

¹ Hipaqo thiu Akükau Ahasuerus no Agagmi Hammedatha nu Haman xaqheve eno paw hiyampemi khunoqo no pa gholo akeno panoqo kümtsü nguno akiqheu kükalakhü lo pa süqheve.

² Eno akükau qemi khunoqo akükau khagho lo akeno kümtsü no itsaqi eno agigihu Haman tsü, kughengu pa lau titoi shi penike akükau no azah tsüve. Ikemu Mordecai ye itsaqimo momu agigihu tsümoe.

³ Ikehu akükau qemi khunoqo no akükau khagho lo ngo akeno panongu no Mordecai vilo pi, “Kushiye no ye akükau yezah hebide ani kea?”

⁴ Panongu no tsalakipe pa vilo piju akemu pa no panoqo tsa initsü move kehu panongu no Mordecai ye pa tsalo puthugho nani kemo keno juniye Haman vilo pive, kughengu Mordecai no panoqo vilo pa ye Jewmie piveke.

⁵ Kughou Haman no Mordecai ye itsaqimo momu agigihu pa tsümo keu ithulu keno, pa ye axukighide no chhitoive.

⁶ Ikemu panongu no Mordecaiw timi ye khuno keno pa vilo pive kehu, pa ye Mordecai shou likhi pa u beni keu süchileve. Eno Haman no Ahasuerus kükaqha lo Mordecaiw timi Jewmi kümtsü kütsaveni ke alaghi phuthuve.

⁷ Akükau Ahasuerus yepe mpe chighiakiniu, aqhi atüghüu, ti ye Nisan qhi lo, panongu no tsalakipe Haman zülono asaqhi; eno aqhi chighiakiniu, ti ye Adar qhi, kutolo aqhi atsütsü asaqhi.

⁸ Tishino Haman no Akükau Ahasuerus vilo pi, “Timi khami inaghau apanagha ani eno o kükaqha lo akuaqha kümtsü timiqo dolo xukütshü mono ani. Panongu yezah ye kütami launo kütüta, eno panongu ye akükau yezah pechemo, ikehu panongu ghenguno küsüqhive tsüni keu ye akükau ghenguno ala shilumo nani.

⁹ Tsala hipau no akükau lopu shilu aye, panongu kütsave penike xaküthaza shive tsülo, eno I no ghükayi ahu lakh küthü qhethonhe lhobidi pesü khunoqo no akükau küakini jukütsü cheni keno pano u lo süve tsüni, tishino panongu no akükau kinibo lo süve peni.”

¹⁰ Ikehu akükau no paw jedapu nguthi ikhipe Agagmi Hammedatha nu Haman, Jewmi ghümi hu tsüve.

¹¹ Eno akükau no Haman vilo pi, “Pisa o tsüve ani, timiqo ghi o tsüve ani, panongu lau nono akivi ithulu ake toi shilu lo.”

¹² Tithiu aqhi atüghüu atsala chighiaküthüu lo akükau yezah kighithimi kusü, eno Haman zakütsü kiqi lono ayezah yephepe akuaqha lo akükauw yepemi, angh eno ashiayeqow hiyampemi kümtsü lau tsüpuwu, aghakhu kümtsü lo pütüta kiyethi eno ashiaye kümtsü lau pano tsauno yepuwu. Ti ye Akükau Ahasuerus jelono yephe eno akükauw jedapu nguthi pesü chishida no puwu.

¹³ Yesüqo ye aghinimi launo akükau ghakhuqo lo puwu, eno atsala lakhi lono, ti ye aqhi chighiakiniu, Adar qhi, atsala chighiaküthüu lono Jewmi, kichimi itimi, totimi eno anuli, kümtsü kütsave, pithive eno püghave penike, eno panow thime kiviqo xule luve penike azah tsüpuwu.

¹⁴ Yesü kiyepa lakhi ye xaküthaza shi phisü no aphughi kümtsü lo ashiaye kümtsü pelo tipa tsala ghenguno kuto penikeu shi.

¹⁵ Aghinimi no mtazü akükau yezah pewu, eno xaküthaza ye Susa lo kükaki lono puwu. Akükau ngo Haman pama ye iqa no aji sho akemu Susa mishighüna ye mamaive.