ESTHER 2 - Sumi Naga CL (Re-edited) Bible (BSI)

Esther Kükaliu shi Kisheve

¹ Hi shive kethiu, kughou Akükau Ahasuerus xukighide iqüve keno, pa ye Vashti kümsülu, li no kiu shive eno kiu yezah li shou beve keno kümsülue.

² Ikehu akükauw apumi khunoqo no pa hiju akeno panongu no pi, “Akükau ghenguno ilimi ajukivi athathelimi phujunie.

³ Eno akükau pelo pa kükaqha kümtsü lo hiyampemi süküsü shino ilimi jukivi athathelimiqo pelo Susa lo iliki kighiki lo hekütsü pelo eno akükauw shokomi Hegai khuu totimi jukükütsüu keno paw ghaküsü lo ngo pelo. Pano gi kunupuqo panongu tsülo.

⁴ Eno ililhothe khuu no akükau lopivi luni keno Vashti züqhulo kükaliu shive pelo.” Hi no akükau lopivilu eno pa no titoi shie.

⁵ Tilehi Susa kighiki lo Jewmi lakhi ae, pa je ye Mordecai, pa ye Jair nu, Shimei nu, Kish nu eno Benjamin laghami ke,

⁶ pa ye Jerusalem lono Judah kükau Jeconiah, khuu Babylon kükau Nebuchadnezzar no küghaluve keno, pa gholono akughumi shi sawuve kemi ke.

⁷ Pa no papu thiküzüu nonga Hadassah, ti ye Esther, saputhu kughengu li ye apu ghi aza ghi kühave kemi ke. Ililhothe huye akoghe kivi eno jukighilepu, kughou li puaza thive keno, Mordecai no pa nga toi li saluve.

⁸ Tighenguno kughou akükau zakütsü sheshu eno ililhothe kutomo Susa kighiki lo Hegai ghaküsü lo hekütsü keno, Esther ghi akükau kighiki lo sawu eno Hegai, khuu totimiqo jukükütsüu shi akeno paw ghaküsü lo qhive.

⁹ Ililhothe huno pa lopivilu eno paw kikimiye ithulu. Pa no paikhavi no liw agi kunupu, achuqupu saje eno tipaqo gholono akükau kighiki lo kishekiphemi ilimi tsüni li sala kutotsü eno li ngo liw ilimiqo ye iliki akiqheu lo sasü wuve.

¹⁰ Esther ye liw timi momu li kibolomi ithi pemono ae, kughengu Mordecai no tipau ithipe kevilo pi azah shive.

¹¹ Tsalakipe Mordecai no Esther ye kishi ani eno li lau kiu shi ani keno ithi niye iliki hukikha zülo che ipe-ilo ae.

¹² Ililhotheqo lakhikhi no Akükau Ahasuerus zülo ilomphi züu aqhi chighikini ayezah qholo ngonike za, hi ye panoqo pesü jukivi shitsüni keu tüqhüdo ke, aqhi tsügho no müsüghüta thazü eno aqhi tsügho no axokütsüngü ngo totimiqow nukümtshau peithani keu—

¹³ kughou ililhothe no hipa ghola lono akükau lau ilo keno, li ye iliki lo kiu kiumu li no pulo keu pesü akükau kighiki lo wulu peni keu shitsüe.

¹⁴ Avelau li no ilo, eno thanau li ye iliki akiniu lo akükauw shokomi Shaashgaz, khuu totimiqo jukükütsüu keno, pa lau ighive che. Akükau no li ju aloqilu eno li je kumoke kutolo li ye akükau lau ideiloni keu shimlae.

¹⁵ Kughou Abihail nga Esther, Mordecai no pa nga shi saluve keu no akükau kilo wukepu do ighive keno, li ye kiumu khumoe, ikemu akükauw shokomi Hegai, khuu totimiqo shou jukükütsüu keno, pa no akükümsü tsükeu likhi luve.

¹⁶ Akükau Ahasuerus yepe mpe akütsüniu, aqhi achighiu, Tebeth qhi lono, Esther ye pa kighiki lo sawuve,

¹⁷ akükau no totimi kütami kümtsü nguno alau Esther kimiyeve, eno athathelimi kümtsü nguno alau li no pa nhethe lo küpükini ngo kikimiye auve, ikehu pa no kükakütsüqho pesü li pipeve no Vashti züqhulo li pesü kükaliu shive.

¹⁸ Tithiu akükau no paw hiyampemi ngo aqemi kümtsü ghenguno aghulhu lakhi tsü; ti ye Esther ghulhu ke. Pa no aghakhu lo zameqo ghi qhivetsü eno kükamiw tsükini gho pesü tsüe.

Mordecai no Küsüqe akeu Phuphelu

¹⁹ Kughou athathelimiqo no akiniu kümtsa hekütsüpe akeno, Mordecai ye akükauw khagho lo iqa ae.

²⁰ Mordecai no azah tsüke toi, Esther ye li lagha momu liw timiqo vehu pimono ae, kughengu Esther ye azüu Mordecai no li saputhu kelo toi, pa gholue.

²¹ Tipa ghuloki lo, Mordecai no akükauw khagho lo iqa akelo akükauw shokomi, alashe khemi Bigthan ngo Teresh pama ye amloideve no Akükau Ahasuerus shou au beniye küsüqeuve.

²² Mordecai no hipau vehu ithive no Kükaliu Esther vilo pive, eno Esther no Mordecai jelono akükau vilo pivetsü.

²³ Kughou asütsa phuju kelo achipi shive aghi keno, timi pama ye tshükiqhi-a lono pithive. Eno hi ye akükau zülono yekikithi kaku lo yepe qhive.