ESTHER 1 - Sumi Naga CL (Re-edited) Bible (BSI)

Akükau Ghulhu

¹ Ahasuerus ghuloki lo, Ahasuerus khuu India lono Ethiopia kutolo aghakhu 127 shou kache keno,

² tipau ghuloki lo Akükau Ahasuerus ye Susa lo pa kighiki lo ngo no pa kükalakhü lo iqa ae,

³ pa yekipe mpe aküthüu shi ake lono pa no paw hiyampemi eno aqemi kümtsü lau aghulhu lakhi tsü. Persia eno Media lo ghüshimi eno akuaqha lo aküxü kivimi ngo anghqo pa zülo ighi,

⁴ pa no atsala 180 kutolo pa küka juküvü eno paw akighiche eno ahukülü jekipi shi akeu pephe piye.

⁵ Eno kughou atsala tipaqo kishekhave keno, akükau no Susa lo pa kighiki lo timi ighi kemi, kijemi eno kitilami kümtsü akükau kighiki khalacheu aghutu lono atsala tsüni kutolo aghulhu tsüe.

⁶ Tilehi nhaqhiphi asüpha kimiye no shikeu ae eno tsülabeike phi pesü heqhi eno phepheike phi akivi no phedave eno hughai keu ngo ghükayi ju no shikeu khadu ngo marble tsükuchoqo ae, itaghi ameshoyi ngo ghükayi lakhü no tsübui keu tu, marble, mlapuchi eno akughupu tuqo no aghüza shikeu-a lo qhie.

⁷ Ameshoyi jukhu eno ajukhu ajeli kütüta lono shokepu tsü, eno akükau no pofushi akeu kiqi lono akükau tsaiji ye kupukuno shi küsaje ae.

⁸ Atsaiji piye keu ye ayezah kiqi lono ke: “Ngukangugha ye kühae.” Kughengu akükau no pa kükaki lo akümlami kümtsü lau lüthü no pulo keu kiqi lono shilopi azah tsüve.

⁹ Kükaliu Vashti ghi Akükau Ahasuerus kükaki lo totimi akeqo ghenguno aghulhu lakhi shi.

Kükaliu Vashti no Milive

¹⁰ Atsala akütsüniu lo, kughou akükau no aji shove no aloqi akeno, pa no Mehuman, Biztha, Harbona, Bigtha, Abagtha, Zethar eno Carkas, shokomi pano tsüni khunoqo Akükau Ahasuerus zülo aghinimi shi akeno panoqo azah tsü no,

¹¹ Kükaliu Vashti pelo akükau zülo kükakütsüqho pusü ighi peniye shi, ti ye timi jeli eno kükapumiqo lau li jukivi piye niye ke, kughengu li ye jukighilepu ke.

¹² Ikemu shokomi no akükau zakütsü süghi keu Kükaliu Vashti no milive. Tipau lo akükau ye axuideve, eno pa ghakighide no pa lolo no iqü ipeghive.

¹³ Tileno akükau no alokütsümi khunoqo no aghuloki ithi ache keno panoqo vilo pi (kughengu hi ye ayezah eno xakütha akivishi ithi akemi lau akükau khuaye ke,

¹⁴ pa shelo timi hipaqo ae, Carshena, Shethar, Admatha, Tarshish, Meres, Marsena, eno Memucan, Persia eno Media kükapumi pano tsüni, panongu ye akükau gi ithulu eno kükaqha lo atüghüu shi iqa chekemi ke):

¹⁵ “Akükau Ahasuerus no shokomiqo launo azah tsü puwu keu Kükaliu Vashti no lumove ke ghenguno ayezah kiqilo li lau kiu shive kepu kea?”

¹⁶ Ikehu Memucan no akükau eno hiyampemi zülono pi, “Kükaliu Vashti ye akükau shou likhi kumono hiyampemi eno timi khunoqo no Akükau Ahasuerus ghakhu lo ani keno tipaqo kümtsü shou akipimi shivae.

¹⁷ Kughengu kükaliu ghilisüqe ye totimi kümtsü no ithive nani, tishikeu lono panongu ghi pano kimiqo jukünathauve no pi nani, ‘Akükau Ahasuerus no Kükaliu Vashti pa zülo saighi peniye azah tsü kemu li no ighimoe.’

¹⁸ Ishi tsala hipau lo Persia eno Media lo aküxü kivimi totimi khunoqo no kükaliu ghilisüqe chiluve akeno panongu ghi akükauw hiyampemi kümtsü lau titoi pi nani, eno tilehi jukünatha keu ngo aloghu ihulove nanie.

¹⁹ Akükau no pulo aghi aye, azah lakhi tsülo, hi ye Persia ngo Media yezahqo gholo yesüve pelo tishianguno xachilemla kepushi peni, eno Vashti ye Akükau Ahasuerus zülo khilemu itaghi ighi pemonie. Eno akükau pelo li kükalakhü pesü kütami li nguno akiviu lau tsüve pelo.

²⁰ Tighenguno kughou akükau no xaküthaza pesü pa kükaqha kümtsü lo asheshu keno (kükaqha ye kije ke), totimi kümtsü no panoqo kimi, qhemghai kemi eno akuchunimi aphiphishi gihu nani.”

²¹ Akükümsü hipau no akükau eno kükapumiqo pulou shive, eno Memucan no shuphe ketoi akükau no tishive.

²² Pa no yesü yepe pa ghakhuqo lo tsüpuwu, akuaqha kümtsü lo pütütaw kiyethi lono eno ashiaye kümtsü lau pütüta tsauno tsüpuwu, ti ye kiptimi no pütüta kibo lo ampeu shini eno paza tsa pini keu shie.