Ephesiami 6 - Sumi Naga CL (Re-edited) Bible (BSI)

Atianuli eno Apuaza

¹ Atianuliqo, Ampeu küdau no nongu puaza gholu lo, kughengu hi no achipi ke.

² “O pu o za sümsalo” (azakütsü gholo kükümgha akeu atüghüu ye hike),

³ “tishianguno no ye akivishi anani eno ayeghi lo axüshu nani.”

⁴ Apunoqo, nongu tianuli mlo shikighide tsü kevilo, ikemu Ampeu no kütsü shika eno qophe chekeu ghola lono panongu saputhu lo.

Aqemi eno Ampemi

⁵ Aqü-axemiqo, Khristo lau toi msaighü eno khokhoshi, tsaqütsalei ayeghi lo nongu mpemi gholulo.

⁶ Timi lokiqipu shiniye anhekithe lo likhino shi kevilo, ikemu Khristo qemi toi amlo lono Alhou pulou shilo.

⁷ Akükümsü kivi pupüzü timi qemono Ampeu qe akeshi nongu kümla shilo.

⁸ Aqü-axemi na monamu pa no akümla kivi shipüa keu ye Ampeu no tsüchile nani kepi ithilo.

⁹ Ampemiqo, nongu ghi aqü-axemi peitha pivilo, eno panoqo kichi kümsa kevilo. Kughengu nongu Mpeu kungugha lo akeu no pano Mpeu ghi kepi ithilo, eno Pa gholo ye agikuju kühae.

Alhou Ghünanu

¹⁰ Ashekhashi, Ampeu küka kumto lono mtotoi shilo.

¹¹ Tüghami mqümgha shou puthugholu kepushi Alhou ghünanu kümtsü pepu lulo.

¹² Kughengu ningu ye timi sasü kumono yepemi, atomi, hi aküzü yeghiqha eno atsütsü lo aghaküsa ghawu kükaqo sasü küpüghü ani.

¹³ Tighenguno Alhou ghünanu kümtsü pepulo, tishianguno alhoksa tsala lo nongu ye ithamo no puqhekulu shi mjochilelu nani.

¹⁴ Ikehu mtotoi puthugho lo, kuchou pesü apokha shilo, achipiu mikucho pesü amlaküxa shipulo,

¹⁵ atsakiviu pikülha nike kutope akeu pukhu kuqho qhopulo.

¹⁶ Atüqhüdo kümtsü lo aküpülü züto pesü ngolo, nongu no tipau pesü alhoksau miküqü piji ghapinhelu nani;

¹⁷ xakulupu kütsükuqho qhopulo, eno Aghungu lo zütakikihi ikhilu lo, ti ye Alhou tsake.

¹⁸ Ado kümtsü lo Aghungu lono Alhou vilo khu, eno qhüiniju keu kighini shilo. Tipau kimji lono tsükhüi shino küpülümi ghenguno khuini tsülo.

¹⁹ I ghengu ghi inikhu tsüalo, tishianguno Alhou no I kichi xükho tsüno atsa I tsü eno mtotoi shi tuqhou tsakiviu pikülhalu peni,

²⁰ hi ghenguno ni ye akughu shi akeu lashikami ke. I pelo msaighü mono pi apenike inikhu tsülo.

Kishekha Petha

²¹ Nongu ghi ni ye kishi ani eno kiu shi ani keno ithi penike kimiye chekeu athiküzüu eno Ampeu kümla lo pükhübekuluu Tychicus no thokha nongu vilo pi nani.

²² Hipa kimji ghenguno I no nongu lau pa puwu ani, tishianguno ningu ye kiutoi ani keno nongu no ithi, eno pa no nongu mlo shikuloghi tsü nani.

²³ Apu Alhou eno Ampeu Jisü Khristo no aloino keu eno aküpülü gholo kikimiye pesü athiküzümi tsü peniu.

²⁴ Shipüsa mlakeu kikimiye pesü ni Mpeu Jisü Khristo kimiye chekemi kümtsü lau Alhouw küpükini apeniu.