Ephesiami 5 - Sumi Naga CL (Re-edited) Bible (BSI)

Kikimiye lono Xülo

¹ Tighenguno Alhou no qhuivü keu nuliqo akehu Alhou kimihi shilo.

² Khristo no ningu kimiye no Pa ampi pesü Alhou lau axokütsüngü eno aghakishi kümllagho shi tsüve ketoi kikimiye lono xülo.

³ Alhou küpülümi shive akehu, shupu-salha, mithekumo jeli momu alakimne ye nongu dolo küptsa keumu shimoni.

⁴ Tike kumono alhoksa tsa, mbomzü eno ghapha ghale tsa ye nongu ghenguno aküzüpu kumoe, tishinike züqhulo shikimthi tsüalo.

⁵ Nongu no hi thebeilu nani ke küsalhami, mithekumomi momu alakimnemi (ti ye, ajulho kümllau) ye Khristo eno Alhou yekipe amheghi ithulumo nani.

⁶ Khunomu abokümsa tsa pesü nongu pishiqhipe kevilo, kughengu hipaqo ghenguno hebide kemi shou Alhou loghu ikughi cheni.

⁷ Tighenguno tipaqo sasü kütüna kevilo;

⁸ kughengu ghuthu lakhi lo nongu ghi aküzü lo ache, ikemu itehi ye Ampeu lau aküvü lo auve akehu aküvü nuliqo toi chechelo.

⁹ (Kughengu aküvü lo cheche keu lono akivipu, achipiu eno kuchou xathi ithulu cheni).

¹⁰ Kiu no Ampeu lopu shilu cheni keno pükapütsa no vethalulo.

¹¹ Aküzü kümla athi pithimo keu lo chhosü kevilo, tishinike züqhulo tipaqo pesü aküvü lo pephelo.

¹² Kughengu panoqo no tuqhou no shiche keu ghili ye pinikeu ghi akukujopue.

¹³ Ikemu kughou aküvü no thokha pepheni keno tileno ithulu cheni,

¹⁴ eno kiu kiumu ithuluve keu ye aküvü ake. Tighenguno ishi pi püani, “Ithulo, O aküzüu, eno akithi lono ithughilo, Khristo no o shou yepüvü nani.”

¹⁵ Tishiaye nongu no kishi checheni keno jukuto lo, mbomzümi toimo no alokütsümi shi püzü

¹⁶ ado lhoksa shive akehu akivishi ado peitha lo.

¹⁷ Tighenguno mbomzü shi akevilo ikemu Ampeu pulou ye kiu keno ithikuthu lo.

¹⁸ Aji shomzü kevilo, kughengu ti ye ghasükümlapu ke; ikemu Aghungu pesü nongu shepichhi lo,

¹⁹ lakhino lakhi lau leshele, Alhou kishele, aghungulo le phepe ahupite kilelo, nongu mlo kuchopu tsüno Ampeu lau alejo phelo.

²⁰ Alhokuthu lo thokha kümtsü ghenguno ni Mpeu Jisü Khristo je lono Apu Alhou lau shikimthi tsülo,

²¹ eno lakhino lakhi lau Khristo gihu keu michishi qhoqhü kilelo.

Anipu eno Akimi

²² Anipuqo, Ampeu lau toi nongu kimiqo qhoqhü lo.

²³ Kughengu Khristo no akukuhou shou atou ketoi akimi no pa nipu shou atou ke; Khristo no pa phimpi, akukuhou Xakuluue.

²⁴ Ikehu akukuhou no Khristo qhoqhü ketoi anipuqo ghi thokha lo pano kimi qhoqhü masae.

²⁵ Akimiqo, Khristo no akukuhou kimiye no li ghenguno pa küxü tsüve ketoi nongu nipu kimiye lo,

²⁶ tishianguno azü no qhuke toi pa no atsa pesü akukuhou shikimthe tsü,

²⁷ eno akukuhou pesü tukutiye momu jekujeli kiumu kühano jukighilepu shi tsüghükhüi eno akimthe shi paw shiniye ke.

²⁸ Tipaphi shi akimiqo ye pano phimpi toi pano nipu kimiye masae. Khuu no pa nipu kimiye cheni keno pa ampi kimiye cheni.

²⁹ Kughengu khunomu pa phimpi mithi chemoe, ikemu Khristo no akukuhou tuchomjo eno loji ketoi pa ghi pa phimpi tucho eno loji cheni,

³⁰ kughengu ningu ye pa phimpi lo kihimpemi ke.

³¹ “Tighenguno timi lakhi ye pa puaza qhive no pa nipu sasü kütüna luveni, eno pama ye aphi-ashi lakhi shiveni.”

³² Tuqhou tsa hipau ye thonhei ani eno I no piani ke hi ye Khristo ngo akukuhou ghenguno ke.

³³ Tishimu, pütüta phimpi toi nongu nipu kimiye lo, titoi anipu no li kimi gihulo.