Ephesiami 4 - Sumi Naga CL (Re-edited) Bible (BSI)

Khristo Phimpi lo Küqhakulu

¹ Ikehu ni, Ampeu ghenguno akughumi, huno nongu ghutu ani, khipa lalo cheche penike Alhou no nongu kuluve akeno nongu ye aküzüpu shi chechelo,

² aqhokigheu eno akümtsha, tipau gholo kutuukulu, kikimiye lono lakhino lakhi lau kheakulu shi,

³ aloino keu kütsügha lono Alhou Ghungu no küqhakulu tsükeu püxü nike alomsülo.

⁴ Alhou no lajupu lakhi lo nongu kulu ketoi, aphimpi lakhi eno Aghungu lakhi likhi ani—

⁵ Ampeu lakhi, aküpülü lakhi, baptizkishi lakhi,

⁶ Alhou lakhi, khuu no kümtsü Papu keno, Pa no kümtsü shou Akütsü, kümtsü gholo ani eno kümtsü lo ani.

⁷ Ikemu Khristow kümsagho qhemi lono Alhouw küpükini ningu lakhikhi lau tsüpüani.

⁸ Ikehu ishi picheni, “Kughou Pa no kunguu iku keno Pa no akughumi kütsasa sawu, eno agho pesü timiqo tsüe.”

⁹ (“Pa no kunguu iku” ipi kelo, Pa ye ayeghi qhou ashekhau-a lo ghi iqie pini keu nguno kütau kiu kiqi ania?

¹⁰ Khuu no aqhou iqi keno Pa no kunguu yepu-yesü hechesü ti kümtsü shepichhi tsüniye akiqhe-a lo ikue.)

¹¹ Pa no timi khami pesü apostolmi shitsü, khami no tungkupmi, tsavipemi, Pastormi, eno shikükami shitsü,

¹² ti ye Alhou kümla ghenguno hukuthumi qophepe kutokughoi shino Khristo phimpi shiqhe niye ke.

¹³ Ningu kümtsü no tekhoi xükülaye luno aküpülü ngo Alhou Nu kighithi lo lakhi shi küqhalu, eno Khristo lhoaye kupukülai shi ithilu moke kutolo hitoi mla apeniye ke,

¹⁴ tishianguno ningu ye itikütüpa ghi pishikiqhi külü, amqükini, mqümgha kukughu jeli hipaqo mülhü no ningu fusasü izüichoi azüu huju eno athiu woju monani.

¹⁵ Tishinike züqhu, kikimiye lono kuchou tsape pesü ningu ye ala kümtsü lono thuiku Khristo, khuu akütsü keno, Pa lau eno Pa lolo xüsülu masae.

¹⁶ Pa launo aghi aphimpi kuchopu anhü vecheo ghokünape kime küqhatsü no thuwulu cheni. Kughou aphiau lakhikhi no pütüta kümlapu achipi lono shini keno aphimpi ye kikimiye lono pa ampi shiqhelu cheni.

Aküxü Kithe

¹⁷ Itehi Ampeu je lono I no hi piani eno iqhikithe anike nongu ye Jewkumomi toi ameküküha kükümsü xapu cheche kelau kumoae.

¹⁸ Pano kükümsü ye aküzü lo ani, eno amlo kümka lono kiumu ithini shimo kehu mbomzü shi Alhou no tsükeu küxü lono kütüta shivae.

¹⁹ Panongu ye kümsükulu kühave no kujomo mithe pano phimpi pesü ashi ghakiqipu lo tsüvae, eno mithekumo shinike aghükha shi cheni.

²⁰ Ikemu nongu ye hipa gholau no Khristo ithike kumoe.

²¹ Nongu ye mtsüqheino Pa ghili chiluvae, eno kuchou huno Jisü lau aketoi Pa launo nongu shika puthu luvae.

²² Püzüu küxü ghola ye pishikiqhi no shipüsave akehu alhoaye aqau ye xaqhive penike nongu shikavae;

²³ eno nongu kükümsü ngo amlo kümtsü pesü akithe kughulholu;

²⁴ kuchou mikucho ngo akimthepu pesü Alhou kimihi lono lhokeu lhoaye kithe pepulu peniye ke.

²⁵ Tighenguno, kichile ye qhoi pheve no kümtsü no pütüta küsapau lau kuchou tsa pilo, kughengu ningu ye kümtsü aphimpi lakhi lo kihimpemi ke.

²⁶ Amloide lo, ikemu tino axine shive kevilo; o mlo kighide lono tsüküzü hasü kevilo,

²⁷ eno ado kivi pesü tüghami tsü kevilo.

²⁸ Hinguno hilau ye küpkami no aküpka qhivelo, tishi nike züqhu ichheime mu aphiau pesü amikucho lono mla chulo, tishikeu lono khuana avesa akeu lau küsajelu nani.

²⁹ Shiküpsapu tsa ye nongu kichi lono piphe kevilo, ikemu atüqhüdo kiqi lono shiqhe kilelu kepu tsa akivi likhi pilo, tishianguno chikulumi no kümgha keu shilu nani.

³⁰ Alhou Ghungu Kimthe no qhüchilekulu tsala ghenguno nongu shou amchipu chishidave akehu nongu ye Pa shikulosü kevilo.

³¹ Kuqhumo keu, aloghu, amlo kighide, mqhumza eno thokügha jeli kümtsü nongu launo pevelo.

³² Lakhino lakhi lau amlo qhaqhilei eno mtshaivü lo, Alhou no Khristo vecheo nongu kipimi qhivetsü ketoi nongu lakhino lakhi kipimi qhitsü kilelo.