Ephesiami 3 - Sumi Naga CL (Re-edited) Bible (BSI)

Atsakiviu lo Alhouw Tuqhou

¹ Akiqi hipau ghenguno ni Paul, nongu Jewkumomi züqhushi Khristo Jisü ghenguno akughu shi akeu no

² Alhou no Paw küpükini pesü nongu tsüniye I pichebe keu vehu nongu ghi chiluve aghi nanie pi kümsü ani,

³ Alhou no kishi piyeküsü vecheo tuqhou vehu I lau kilethitsü keno ni ye azüu ghi ikhonhei shi yeve ake.

⁴ Nongu no hi philu kelo I no Khristow tuqhou jupililu akeu vethailo tolu nani.

⁵ Aghungu vecheo Alhouw akimthe apostolmi ngo tungkupmi lau tuqhou hipau pephe piye ketoi wove keu tiqhelimi lau ye khilemu piye püamoe.

⁶ Tuqhou hipau ye Jewkumomi ghi amheghi kiyighimi; aphimpi lakhi lo kuloji küqha kemi; eno atsakiviu vecheo Khristo Jisü gholo Alhou shoqhi küsajelu kemiae.

⁷ Alhou no Pa küka I tsükeu vecheo ni ye Paw küpükini gho kiqi lono hipa tsakiviu qemi shilue.

⁸ Niu no küpülümi kümtsü dolo akimkheu keghi, Khristow kihikhakümla kini pesü Jewkumomi lau pikülha peniye küpükini hipau I tsü,

⁹ eno thime kümtsü pulhosü keu Lhou lau tiqheli kümtsü lo küsü püache keu tuqhou kukughu ye kiu keno timi kümtsü zülo pephe tsüniye ke,

¹⁰ tishianguno akukuhou vecheo Alhou lokütsü, thokha kümtsü lo aghola kütüta lono pephe chekeu, pesü itehi ye kungulo yepemi eno aküka kumtomi lau kilethi tsüniye ke.

¹¹ Hi ye Paw lhokta kimji ni Mpeu Khristo Jisü launo shikupu tsükeu kiqi lono ke,

¹² pa laumi shikeu eno pa lau aküpülü akeu vecheo ningu ye ighümo no amlo kumtoshi Pa zülo wulu cheni.

¹³ Ikehu I no nongu ghenguno aghime sholu akeu jupe aghüthi süve kevilo, ti ye nongu gigihupu ghenguno ke.

Aghungu lo Kükakumto

¹⁴ Akiqi hipau ghenguno ni ye Apu zülo qhoqhünhe cheni,

¹⁵ Pa vecheo kungugha eno ayeghi lo akibo kümtsü je kutsü cheni.

¹⁶ Pa juküvüpu kinikülü shi akeu kiqi lono Pa Ghungu pesü nongu lolo akeu mpi shikumto tsü peni,

¹⁷ tishianguno aküpülü vecheo Khristo no nongu mlo lo ngolu peni, eno kikimiye lo akuhu qüsüpe mtotoi luno nongu no

¹⁸ küpülümi kümtsü gholono Khristo kikimiye akijelau akushulau eno akiqhelau akutholau kiu keno vethalu kepu küka apeni,

¹⁹ eno timi kighithi kümtsü shoqa achekeu Khristow kikimiye ithilu keu lono Alhou lhoaye kümtsü pesü kupukülai nongu shepichhi tsü peni.

²⁰ Itehi ye khuu no ningu gholo Pa kükakumto pesü mla akeu vecheo ningu no qhüiniju momu kümsü akeu nguno alau kupukuno shi tsülu nani keno,

²¹ tiqheli kümtsü lo ashekha-aghile küha akukuhou vecheo eno Khristo Jisü gholono Pa lau ajekipi apelo! Amen.