Ephesiami 2 - Sumi Naga CL (Re-edited) Bible (BSI)

Aküpülü Vecheo Küpükini

¹ Ghuthu lakhi lo nongu ye akipimi eno axine lo thi ache.

² Ti ye hipa yeghi lo küxü la pape, amülhü lo aghawu küka pape, itehi hekibidemi nuli lau mla akeu ghawu pape chenipi

³ ningu kümtsü ghuthu lakhi loye tipaqo gholo pitipüza ashi pulou shiche, aphimpi eno akükümsü no mine keu ghakiqipu shiche, eno ashi lomi toi ningu lhoaye no aloghu puni keu tianuli shi ache.

⁴ Ikemu Alhouw kimiyekini, khipau pesü Pa no ningu kimiye keno, kije akeu vecheo küpükini no nibonilei akehu

⁵ nino ni xine lo thi akeghi Khristo gholono aküxüpu kughulhove tsü—nongu ye küpükini lono xaluvae—

⁶ eno Khristo Jisü laumi shikeu lono ningu ghi pa gholono xüputhupe kungugha kiqhe-a lo pa gholo küghüqae.

⁷ Alhou no kimiyeqhiyi keu lono Paw küpükini kimghi kümlapu shi akeu pesü Khristo Jisü küdau no ningu tsükeu ye hithiu tiqheli kutolo pephe piye niye ke.

⁸ Kughengu nongu ye aküpülü vecheo küpükini lono xaluvae; eno hi ye nongu ampi ka-agha lono kumoe; ikemu Alhou no tsükeu gho ke,

⁹ akümla lame ithulu keumu kumoe, tishianguno khuu pelomu qheza laki pemo niye ke.

¹⁰ Kughengu Alhou ye ningu pelo Khristo Jisü gholono Pa no azünatha kughu püake toi akümla kivi mlalu eno tipa lalo cheche peniye ningu pulhosüe, ikehu ningu ye Paw kütshakügha kümla ke.

Khristo Gholo Lakhi

¹¹ Tighenguno nongu aji lono Jewkumomiqo, ghuthu lakhi loye au pesü aphimpi lo amchipu mla no aphighüyiko ghave kemi ipiche keqo no nongu vilo “aphighüyiko ghamo kemi” ipi kuche keu kümsülu lo,

¹² tipa ghuloki lo nongu ye Khristo launo kütüta shi ache, Israelmi gholo kuloji mlano inami shi ache, eno Alhouw Puloshoqhi piqhi püakeu lono tüsümi shi ayeghi lo lajupu küha eno Alhou kühano achekeu kümsülu lo.

¹³ Ikemu Khristo Jisü laumi shilu keu lono nongu khunoqo ghuthu lakhi lo putou ache keno, itehi ye Khristo ji vecheo aphivilo sasü ighivae.

¹⁴ Kughengu Khristo ampi no niw külakishiu ke, pa no ashiaye kini pesü lakhi shive tsüno pa phimpi pesü ningu dolo kijethape kimthikile chekeu tupi hephove tsü,

¹⁵ ti ye Ayezah lo azakütsü eno akhuaye jeli kümtsü shipühave tsükeu lono ke, tishianguno pa no timi mqo kini pesü pa lau timi kithe lakhi shi kughulhophe no külashi tsü,

¹⁶ eno kros vecheo ningu amqo kinikujo peküqhape aphimpi lakhi lono Alhou lau alupekili luve peniye, eno kimthikile chekeu kishekhave tsüniye ke.

¹⁷ Khristo no ighi no külakishi pesü nongu putou akeqo ngo aphivilo akeqo vilo sheshue.

¹⁸ Kughengu ningu amqo kinikujo pa vecheo Aghungu lakhi lono Apu pesü ningu kütsa shilue.

¹⁹ Ikehu nongu ye tüsümi eno kupokichemi kumovae, ikemu Alhou kibolomi eno küpülümi sasü kümtsa aghakütsami shiluvae.

²⁰ Nongu ye apostolmi ngo tungkupmi no aboqha ghotsü keu lono shiqhe puku keu kiae, Khristo Jisü ampi no atsükupu tuqu shino

²¹ atsükucho eno axu kümtsü Pa gholo kime küqhape Ampeu lau akimthe chineki shi thuwulu cheni.

²² Alhou kungo-a shilu penike Aghungu vecheo itaghi nongu pesü kütami gholono shiqhe puku acheni.