Ephesiami 1 - Sumi Naga CL (Re-edited) Bible (BSI)

Pethakütsü

¹ Alhou kupulo lono Khristo Jisüw apostol Paul no Ephesus lo küpülümi Khristo Jisü sasü lakhi shive kemi lau:

² Ni Pu Alhou eno Ampeu Jisü Khristo launo ighikeu küpükini ngo aloinokeu pesü nongu tsü ani.

Aghungu lo Kükümgha

³ Ni Mpeu Jisü Khristo papu Alhou, khuu no kungugha kiqhe-a lono aghungu lo kükümgha kümtsü pesü Khristo küdau no ningu kümghatsü keno, sheqhe küzüe,

⁴ kughengu ayeghiqha boqha ghomphi lono Pa no Khristo gholono ningu kishelu keu ye ningu pelo Pa zülo tukutiye kühano akimthe shipeniye ke. Kikimiye lono

⁵ Pa no ningu pesü anuli shi saluve niye Pa kupulo kimji kiqi lono azünatha Jisü Khristo vecheo ningu kishelu,

⁶ Paw küpükini kije pephepe Qhuivükicheu nu vecheo ningu kümghatsü keu ye sheqhe akepu lo ani.

⁷ Khristo ji vecheo ningu ye pa lau no xachilekulu eno axine qhikütsü ithulu. Paw küpükini ililai akeu kiqi lono

⁸ Pa no alokütsü ngo kuthoküzü kighithi gholono ningu shou küpükini lepuku tsüno

⁹ Paw tuqhou kukughu khikhi Khristo vecheo kimshitsü keno Pa no ningu lau kilethi tsüke.

¹⁰ Ti ye ado achipi lono kungugha eno ayeghi lo Pa no pulhosü keu kümtsü pesü Khristo lau kütshükime tsünike kughu püakeu ke.

¹¹ Alhou khuu no thokha Pa pulou kimji lono mlaitha cheni keno, Pa kukughu lono azünatha ningu kishelu kehu ningu ye Khristo laumi shilu keu lono Alhouw akütsa mheghi shiluvae,

¹² tishianguno ningu khunoqo paghino Khristo lau lajubelu keno, Alhou jekipipu sheqheni keu lo ghi titoi peniye ke.

¹³ Kughou nongu no nongu xakulupu tsakiviu kuchou tsape chilu püzü Khristo lau pülübelu keno, Paw shilu keu michishi piqhi püakeu Ghungu Kimthe pesü nongu shou puku tsüe.

¹⁴ Aghungu Kimthe hi ye ningu no Alhou launo akütsa shi amheghi ithulu khamoke dolo tsütha keu ke, Pa jekipipu shi sheqhe akepue.

Shikimthikütsü eno Akighini

¹⁵ Nongu küpülü Ampeu Jisü lau akeu eno nonguw kikimiye küpülümi kümtsü lau akeu I no chiluve akehu hipau kimji ghenguno,

¹⁶ ni ye I kighini kümtsü lo nongu ghenguno shikimthi tsünikeu tave mono kümsülu acheni.

¹⁷ Ikehu ajuküvü Papu, ni Mpeu Jisü Khristo Lhou no alokütsü ngo piyeküsü ghungu pesü nongu tsüno Pa kighithi lo thuwulu peni;

¹⁸ nongu mlo lo vethakulupu nhetsü qhino Pa no nongu kulu püakeu lajupu ye kiu, Pa juküvüpu mheghi kinikülüshi küpülümi lau akeu ye kiu keno, nongu no ithi peni;

¹⁹ eno Pa kumto kije peitha no ningu küpülümi lau Paw kimghi kümlapu küka kuloghi tsü püakeu ye kiu keno,

²⁰ Pa no Khristo lau no pephe, ti ye kughou akithi lono Khristo xüputhupe kungugha lo Pa u ajeu küghüqa keno,

²¹ Khristo pesü aghawu yekipe jeli eno aküka kumto pe qhasü chekemi kümtsü shou qhino hipa tiqheli lo likhi kumono ighini keu kutolo ghi aje kütau kümtsü nguno akiqheu shitsüke.

²² Pa no itaghi thokha kümtsü pesü Khristo pukhu philo qhitsü, eno pa pelo ti kümtsü shou Ampeu shino akukuhou ghenguno akütsü shi peniye ikhiphe tsüe.

²³ Ikehu akukuhou ye Khristo phimpi, Pa no kupukülai kughulho tsüke toi tino pa mpi kupukülai tsü cheni.