DANIEL 6 - Sumi Naga CL (Re-edited) Bible (BSI)

Daniel eno Abongshuu ki

¹ Kükaqha kümtsü lo yepemi 120 süküsü shinike Darius no puloluve;

² eno panoqo shou hiyampemi küthü süküsü shie, tipaqo dolo Daniel ghi lakhi, yepemi no pano küthü lau kihikülai tsüni keu shie, tishikeu lono akükau ye kiumu amheqi pemo niye ke.

³ Tishino Daniel hipau ye hiyampemi ngo yepemi kümtsü shou akimchi shi ipeghive, kughengu akighiche ghungu no pa gholo ae. Akükau no kükaqha kümtsü shou pa süküsü shinike kughuve.

⁴ Ikelo hiyampemi ngo yepemi no kükaqha vehulo Daniel shou muchho niye alaghi phuju, ikemu panongu ye akumchho momu akipimi tsükulupu laghi kiumu kühave, kughengu pa ye pükhükulupu eno pa lolo akipimi momu küqü keu kiumu ithulu moe.

⁵ Timi hipaqo no pi, “Ningu ye Daniel hipau Lhou yezah kikime lo likhino kumo aye, kiu lonomu pa shou muchholu kepu shini chemoe.”

⁶ Tithiu hiyampemi eno yepemi no puloküqhave no akükau lau ighi eno pa vilo pi, “O Akükau Darius, axüshu alo!

⁷ Kükaqha lo hiyampemi, yepemi, mijekütsümi eno angh kümtsü puloküqha anike akükau pelo ayezah lakhi mlave no tsatsai pape masa keu shipeni shi ani, ti ye, O akükau, khukhumu atsala shighi dolo, o lau likhi kumo aye, alhou momu timi vilo inikhu keu ye abongshuu kilo vesüveni.

⁸ Ikehu, O akükau, ayezah mlave no Media ngo Persia yezah kiqi lono xachile kümlapu shi jemchi süvelo, tishi aye ti ye kilive mla nani.”

⁹ Tighenguno Akükau Darius no kiyepa lo jemchi shive.

¹⁰ Kughou Daniel no kiyepa lo jemchi süvae pi ithive keno, pa ye pa ki kunguu chebo lo alasheqo Jerusalem küdau khaqhipe qhi chekeu lo ikuve. Pa no azüu shiche ketoi, atsala lo ghuthu küthü qhoqhünhe no akighini shi eno pa Lhou zülo shikimthi tsüe.

¹¹ Tileno timi hipaqo no aqoshi ighi no Daniel no pa Lhou lau qhüiniju inikhu akeu ithuluve.

¹² Panongu no kupunu ighi no akükau zülo ayezah vehu pi, “O akükau! Khukhumu atsala shighi dolo alhou momu timi vilo inikhu keu ye abongshuu kilo vesüveni ipi, O akükau, no ye ayezah lo jemchi shiveke kumo keshea?” Akükau no khochile, “Media ngo Persia yezah lo khikhi xachilelu chemo keno, tipau kiqi lono ayezah ye tsatsai anie.”

¹³ Tileno panongu no khochile no akükau zülono pi, “Daniel, khuu Judah lono haphe sawuve kemi keno, pa ye o lau, momu nono jemchi shive keu yezah lo amlo tsüqhiyi amoe, O akükau, ikemu pa ye atsala lo ghuthu küthü inikhu ani.”

¹⁴ Kughou akükau no atsa hipaqo chilu keno, pa ye ighono amloksa shive eno pa lolo Daniel xaphe lunike kutove. Eno khetsünhe ilo moke kutolo pükapütsa ae.

¹⁵ Tithiu timi hipaqo no aqoshi ighi no akükau vilo pi, “O akükau, Ithilo, hi ye Media ngo Persia yezah lakhike kiu yezah momu akhuaye nomu akükau no mlave keu ye kilive mlae.”

¹⁶ Tileno akükau no azah tsüno Daniel saighi eno abongshuuqo kilo vesüve. Akükau no Daniel vilo pi, “O Lhou, khuu nono tamono qecheni keno, Pa pelo o xalu peniu!”

¹⁷ Eno atu lakhi pewo abongshuu ki kichi lakhave, akükau no pa mpeu noqow eno paw jedapu nguthi pesü Daniel vehulo kiumu kilive pemo niye tipau chishidave.

¹⁸ Tishino akükau ye pa kükaki lo wuve no kümvü ghi putho tsala puwove; pa vekhave kepu kiumu pa lau peighimo, eno pa ye zühu mlave.

¹⁹ Tsüthove kelo, akükau no ithu no mtazü abongshuu kilo wu.

²⁰ Daniel no khile akeno tipau kupunu ighi kelo, pa no amloksa lono ighamku. Akükau no Daniel lau asheshu, “O Daniel, aküxüpu Lhou qeu, o Lhou khuu nono tamono qecheni keno, Pa ye abongshuuqo launo o xalu kemo kea?”

²¹ Tile Daniel no akükau vilo pi, “O akükau, axüshu alo!

²² I Lhou no kungumi puwu no abongshuuqo kichi lakhave tsü, eno panongu ye I ghüza moe, kughengu ni ye Pa zülo tukutiye küha keu shi ithulu; eno o zülo ghi, O akükau, ni ye aghüzapu kiumu shi püamoe.”

²³ Ikehu akükau ye shishe alovive, eno Daniel ye abongshuu ki lono ikhipheve penike azah tsü. Tighenguno Daniel ye abongshuu ki lono ikhipheve, eno pa shou kiu ghüzaku mu ithulu moe, kughengu pa no pa Lhou shou pükhübe ke.

²⁴ Akükau no azah tsüno timi khunoqo no mqümgha shi Daniel nguku keno panoqo saghipe eno abongshuu kilo—panongu, pano nuli eno anipuqo vesüve. Eno panongu no abongshuu ki ilo abo tomphi lono, abongshuuqo no panongu yiqhipe aghi kümtsü mukhumuno shivetsü.

²⁵ Tithiu Akükau Darius no ayeghi lo ashiaye, shiye, eno atsa jeli kümtsü lau yepuwu: “Aloino keu nongu lau küghüsü alo.

²⁶ I no xaküthaza lakhi mla ani, ti ye I yekipeqha lo timi kümtsü no Daniel Lhou zülo khokhoshi eno sükümsa shini, kughengu Pa ye aküxüpu Lhou, pülhapuju ache keue; Pa kükaqha ye khilemu kütsave mla nani, eno Pa yekipeqha ye ashekha kutolo anani.

²⁷ Khuu no abongshuuqo küka lono Daniel xaphelu keno, Pa no xaphe eno hakho cheni; Pa no atsütsü eno ayeghi lo amchipu eno akümzapu mla chenie.”

²⁸ Tighenguno Darius yepe eno Persiami Cyrus yepe ghuloki lo Daniel hipau ye kinikülü shive.