DANIEL 5 - Sumi Naga CL (Re-edited) Bible (BSI)

Akupuwu lo Au no Yepuku

¹ Akükau Belshazzar no aghulhu kije lakhi pa qholo ampemi qhethonhe ghenguno kuto eno qhethonhe zülono atsaiji sho ae.

² Belshazzar no kughou atsaiji miche keno, pa no ameshoyi ngo ghükayi no shikeu bohu khikhi papu Nebuchadnezzar no Jerusalem chineki lono luve keno tipaqo lono akükau eno pa qholo ampemi eno pa nipuqo ngo pa nipu amishiuqo pelo sho penike süghi peniye azah tsü.

³ Tileno panongu no Jerusalem lo Alhou ki, achineki lono ameshoyi bohu luve keqo peiloghi, eno akükau ngo pa qholo ampemi, pa nipuqo, eno pa nipu amishiuqo no tipaqo lono shoae.

⁴ Panongu no aji sho eno ameshoyi ngo ghükayi, alazayi, ayi, asü-atu lhouqo sheqhe ae.

⁵ Paikhavi timi uloti ipeghi no kükaki lo akupuwu mushuda püakeu, akulu kibepu ghüngü lo yepuku. Eno au no yepuku akeu akükau no ithulu.

⁶ Tileno akükau ju ye kilive, eno pa kükümsü no pa shithüghüive; pa phiau no thizümüive no pa khonhe no kügha thuve.

⁷ Akükau no shiküghüzü kemi, Chaldeami eno yepu-yesü kighithimi asütsa kuloghi lono ku. Pa no Babylon lo alokütsümiqo lau asheshu, “Khukhumu akiye hipau philu eno hepho piyelu keu ye hughaike phi pipeni eno ameshoyi chi pa kuo lo xipipeni, eno kükaqha lo yepeu aküthüu shipeni.”

⁸ Tile akükauw alokütsümi kümtsü ighi, ikemu panongu ye akiye phimlave momu akükau vilo hekupho pitsü mlave.

⁹ Tithiu Akükau Belshazzar ye ighono thüghüive no pa ju kilive, eno pa qholo ampemi kümtsü phiküghüzüve.

¹⁰ Akükau eno pa qholo ampemi tsa ghenguno, kükaliu no aghulhu-a lo iloghi, eno kükaliu no asheshu, “O akükau, axüshu alo! O kükümsü pelo o shithüghüipe kevi momu o ju kilivepe kevilo.

¹¹ Timi lakhi khuu lolo akimthe lhouqo ghungu ani keno, o kükaqha lo ani. O pu ghuloki lo alhouqo lokütsü toikeu aküvü, vethakulu eno alokütsü pa lolo akeu ithulu, eno o pu, Akükau Nebuchadnezzar—o pu akükau no pa pelo küdüumi, shiküghüzü kemi eno yepu-yesü kighithimi shou atou shivepe,

¹² kughengu akighiche ghungu, akighithi, asamo hepholu kepu vethakulu, ahole hepho piyelu keu, eno aküküpna xathalu kepu Daniel hipau lolo ithulue, pa ye Belteshazzar ipi akükau no kuvetsü. Itehi Daniel kusü julo, eno pa no hekupho o piye nani.”

Daniel no Aulo Kiye Hepho

¹³ Tithiu Daniel sasü akükau zülo ighi. Akükau no Daniel vilo pi, “Judah lono haphe sawuve kemi, khuu I pu, akükau no saighi keno, no ye Daniel huke lae.

¹⁴ Alhouqo ghungu no o lolo ani, eno aküvü, vethakulu ngo akighiche lokütsü o lolo anie pi I no chiluvae.

¹⁵ Itehi, alokütsümi, shiküghüzü kemi pelo au lo kiye hipau phiju no tipau hephopiye penike I lau saighi, ikemu panongu ye hekupho vehu piye mlavae.

¹⁶ Ikemu no ye hepho piyelu nani eno aküküpna xathalu nanie pi I no chiluvae. Nono akiye philu eno tipau hekupho I pelo ithilupe aye, hughaike phi o pipeni eno ameshoyi chi o kuo lo xipipe no kükaqha lo yepeu aküthüu shipenie.”

¹⁷ Tileno Daniel no akükau zülono pi, “O gho ye o sala shivelo, eno o saxü ye kütami tsüvelo. Tishinamu, I no akükau lau akiye phisüni eno tipau hekupho o pelo ithi peni.

¹⁸ O akükau, Shishe Akiqheu Lhou no aküka, kiqhekighe, ajuküvü eno kükanguagha o pu, Nebuchadnezzar tsüe.

¹⁹ Eno Pa no kiqhekighe shitsü ke ghenguno, ashiaye, shiye, eno atsa jeli kümtsü no pa zülo khokhoshi eno pa sümsae. Pa no khuu heqhini keno heqhive che; eno pa no khuu püxüni keno püxüve che; khuu xaqheni keno xaqheve che; khuu sünheqhini keno sünheqhive che.

²⁰ Ikemu kughou pa mlo no qhemghaive eno pa ghungu no mkave no aqheküza shive keno, pa ye pa kükalakhü lono sünheqhive eno pa juküvü ye pa launo ikhiluve.

²¹ Pa ye timi nuliqo gholono hasasü wuve, pa kükümsü ye tüghashi toive, eno pa kungo-a ye aghalo khurhaqo gholo shive. Pa ye amshitsü toi atsüni mzachu, eno Akughushuu Lhou no timi kükaqha lo ayepe acheni eno tipau lo Pa no khuu pulo keno süsü chenie pi pa no ithi moke kutolo, pa phiau ye atsütsü lo tsüzü no pütsüke.

²² No, pa nu, Belshazzar, huno hipaqo kümtsü ithi akemu o mlo kuchuni movae,

²³ ikemu kungugha lo Ampeu shou no ampi süqheke. Eno Pa kilo abohuqo o zülo süghipe eno no ngo o qholo ampemi, o nipuqo eno o nipu amishiuqo no tipaqo lono aji shomzüe. Nono ghükayi, ameshoyi, alazayi, ayi, asü-atu lhou, khunoqo ithulu chemo, chilu chemo, momu ithi chemo keno panoqo sheqheke, ikemu Alhou khuu u lo o tuthu ani, eno khuu no o laghi keno, nono gihu movae.

²⁴ “Tileno pa zülo au puwu, eno akiye hipau yepukue.

²⁵ Eno akiye huye hike: MENE, MENE, TEKEL eno PARSIN.

²⁶ Tipau hekupho ye hike: MENE, o kükaqha tsala ye Alhou no kihithape qhivae eno tipau kishekhave tsüae;

²⁷ TEKEL, no ye ahu kimghipu lono huju kelo tomovae;

²⁸ PERES, o kükaqha ye kijethavae eno Media ngo Persia tsüvae.”

²⁹ Tileno Belshazzar no azah tsüno Daniel ye hughaike phi pipeve, ameshoyi chi pa kuo lo xipipe, eno pa pelo kükaqha lo yepeu aküthüu shipeni keu shi shekushu lakhi shipe.

³⁰ Tipa ji putho lono Chaldeami kükau Belshazzar ye pithive.

³¹ Eno Mediami Darius, khuu ampe lhotsügho kini shi akeno, pa no aküka ikhiluve.