DANIEL 11 - Sumi Naga CL (Re-edited) Bible (BSI)

Apeu eno Ahuu Kükamiqo

¹ “Media kükau Darius mpe atüghüu lo, pa kuphu eno shikumto niye I no puthugho.

² “Itehi ye I no kuchou o piyeni. Julo, itaghi Persia lo kükami küthü ipeghi nani, eno abidiu ye panoqo kümtsü nguno ighono kinimi shi nani. Kughou pa no pa küakini vecheo akumto shiveni keno, pa no kümtsü xukuthope Greece kükaqha mjochile nani.

³ Tileno akughushu kükau lakhi ithughi nani, pa no aküka kije lono ayepe nani eno pa no pulo keu shi nani.

⁴ Ikemu pa no ithughi khavino pa kükaqha ye kubove nani eno atsütsü mülhü süvela bidi kiqi lono kükaqha ye kijethave nani, eno pa polo kughukomiw shimlave nani, momu pa kükagha khipau pesü pa no ayepe chekeno tipau kiqi lono shimo nani, kughengu pa kükaqha ye nhüve nani eno ti ye hipaqo nguno kütami u lo ilove nani.

⁵ “Tishino apeu kükau ye akumto shive nani, ikemu paw kükapumiqo dolo lakhi no pa nguno akumtou shive no ayepe nani, eno paw kükagha ye kije shi nani.

⁶ Ampe hami thiu panongu no visho shi nani, apeu kükau nga huno ahuu kükau sasü puloküqha nike ighi nani. Ikemu li ye li küka kumto kühave nani, eno pa küka ye süpushu move nani, ikemu li, eno li ghinimi, li papu eno tipa ghuloki lo li saphu chekeqo ye thechuve nani.

⁷ “Eno li kuhu-aghü lono pa züqhulo milakhi ithughi nani. Pa no ghüshimi mjochile ighi nani, ahuu kükauw sükusho-a lo iloghive nani, pa no panoqo sasü küpüghü no toluve nani.

⁸ Pa no pano lhouqo, ayi no mlakeu julho, eno panow ameshoyi ngo ghükayi bohuqo Egypt lo pewuve nani, eno ado hami ghenguno pa no ahuu kükau lewuni keu lono süchileve nani.

⁹ Tishino ahuu kükau no apeu kükau yekipeqha lo ighi nani kemu pa ye pano yeghi lo idewove nani.

¹⁰ “Pa nuliqo no aghü küpüghü nani eno ghüshimi aqokitikhi lakhi hekütsü kumqo nani, tipaqo no qole-qole ighi nani, eno paw sükusho-a kutolo itaghi aghü shisü ighi nani.

¹¹ Tileno apeu kükau ye axuideve no ahuu kükau sasü küpüghüni ye ighi nani. Eno pa no aqokitikhi kije lakhi saphe nani, ikemu tipau ye tomlave nani.

¹² Kughou aqokitikhi sawuve keno, pa mlo ye qhezave nani, eno pa no qhethonhe chighi shou ghiqhive nani ikemu tokulu shimo nani.

¹³ Kughengu ahuu kükau no itaghi atüghü lo nguno alau aqokitikhi lakhi saputhu nani. Eno ampe hami thiu, pa no ghüshimi kutomo eno aghüshi nanu kupukuno shi süghi nani.

¹⁴ “Tipa ghuloki lo kutomo no apeu kükau mjochile ithughi nani, eno kungunhetsü shikupu nike ghenguno ow timiqo dolo ngukangughami ithughi nani, ikemu panongu ye tomlave nani.

¹⁵ Tishino ahuu kükau no ighi no aphughi leniye kuto püakeu kümla hexave tsü nani eno aliwo putu püakeu mishighüna leluve nani. Apeu ghüshimi eno ghüshimi kivimi shi aghi namu puthugho mlave nani, kughengu puthugholu kepu küka ye kühave nani.

¹⁶ Ikemu khuu no mjochile ighi ani keno pa no kiu shinishi ani keno shi nani, eno khunomu pa zülo puthugho mla nani. Eno kütsakungo keu no pa u lo pesü ngono pa no ajuküvü yeghi lo puthugho nani.

¹⁷ Pa no pa kükaqha kumto kümtsü pesü ighi nani, eno pa no puloküqhani keu khuaye peighi nani eno tipaqo shi nani. Pa no kükaqha kütsaveni ye totimi nga pa tsü nani, ikemu tipaqo ye tomlave nani momu pa vehupu shimla nani.

¹⁸ Tithiu pa no azüghimkü yeghi küdau pa gi kughopuwo nani eno tipaqo kutomo leluve nani, ikemu zatsüu lakhi no pa qheküza kishekhave tsü nani. Mtsüqheino pa no pa qheküza kümla pa shou shichile nani.

¹⁹ Pa no pa yeghi lo aliwo kuptu küdau agi kughopuwo nani, ikemu pa ye küpxalu no veqhive püzü pühave nani.

²⁰ “Tithiu pa züqhulo milakhi ithughi no kükaqha juküvü ghenguno zame qhawu penike puwu nani. Ikemu axukighide momu aghüshi lono kumo püzü ado kushuo womono pa ye kütsave nani.

²¹ Pa züqhulo milakhi, khuu lau kükanguagha tsümphi keno, tichetighemi ithughi nani. Pa ye ghutu mono ighi nani eno kühakügha vecheo kükaqha ikhiluve nani.

²² Ghüshimi eno puloshoqhi kükapuu ghi pa zülono qhoi joleve eno kütsave nani.

²³ Pa sasü visho shike lono pa ye mqümgha shi nani, eno timi kitila gholono pa ye akumto shive nani.

²⁴ Ghutu mono pa no kinikülü ghakhu lo ighi nani, eno pa puasü noqo ghi shimo keu pa no shi nani, tinhemgha akivi leluve eno hakholuve keu panoqo dolono kijeluve nani. Pa no sükusho-a leniye kughu nani, ikemu ti ye ado kitila ghengu likhino ke.

²⁵ Pa no ghüshimi kije sasü apeu kükau mjoni ye pa küka eno pa mlo xukutho nani. Eno apeu kükau no ghüshimi shishe kije eno akumto sasü küpüghü nani, ikemu pa ye puthugholu move nani, kughengu pa shou küsüqeve nani ke.

²⁶ Pa chuqupu chuche kemi ghi pa pheve nani. Paw ghüshimi ye joleve nani eno kutomo ghiqhi pithive nani.

²⁷ Akükau pama mlo ye küsakügha shini keu likhi nani. Aghulhu lüpa lakhi lono pama ye akimki tsa pi nani, ikemu kiu vehumu shilumo nani, kughengu ashekha ghuloki ye kihitha püakeu dolono ighini aphike.

²⁸ Eno pa no küakini kutomo pesü pa yeghi lo idewove nani, ikemu pa mlo ye akimthe puloshoqhi shou anani. Pa ye pa no kümsü aketoi mla nani eno pa yeghi lo idewove nani.

²⁹ “Kihitha püakeu dolono pa no apeu ideighi nani, ikemu ti ye püzüu toi aghi move nani.

³⁰ Kughengu Kittim zükiluqo no pa mjochile ighi nani, eno pa ye msave no idewove nani, eno axukighide lono idewo akimthe puloshoqhi mjochile nani. Pa no ideighi no khunoqo no akimthe puloshoqhi pheve akeno panoqo lau amlotsü nani.

³¹ Pa launo ghüshimi ipeghi nani eno achineki ngo aliwo shipüthave nani, eno akipti kümllagho ikhipe wuve nani. Panongu no aphikümqhüpu khipau no küghüküghaleive tsü keno tipau shiqhe nani.

³² Pa no amqü shino khunoqo no puloshoqhi hexave keno panoqo züiza luve nani, ikemu timi khunono pano Lhou ithi ani keno pano ye akumto shi puthugho no mjochile nani.

³³ Alokütsümi no kutomo pelo vethalupe nani, ado kitila ghenguno kemu panongu ye azütakikihi, ami, akughu, eno pükaqhi keu lono ikiqive nani.

³⁴ Kughou panongu no veqhiveni keno, panongu ye akukuphu kitila likhi ithulu nani. Amikucho kumomi kutomo no panongu gholo küqha nani,

³⁵ eno alokütsümi khami ye veqhive nani, tishikeu lono panongu ye ashekha ghuloki tomphi lono thakimthe, shikimthe eno metsüghoi luve peniye ke, kughengu kihikütha do ye khe aphike.

³⁶ “Akükau ye pa no pulo keu shi nani. Pa no pa ampi sheqhe eno shikuloghi pe alhou kümtsü shou qhinani, eno aqheküzapu tsa pesü alhouqo shou Alhou lau pi nani. Axukighide shikupuve moke kutolo pa ye kinikülü shi nani; kughengu azah kiu shive akeno ti ye shikupu nani.

³⁷ Pa ye pa puasü lhouqo lau, momu totimiqo no kimiye chekeu lhou laumu amlo tsüqhiyi mo nani. Pa ye kiu lhou laumu amlo tsümo nani, kughengu pa no kümtsü shou pa ampi süqhe nanie.

³⁸ Hipaqo züqhulo pa no aliwo lhou gihu nani. Pa no ameshoyi ngo ghükayi eno akughupu tu ngo amekusho gho pesü pa puasüqo no ithimo keu lhou gihu nani.

³⁹ Pa no inaghami lhou kukuphu vecheo aliwo kumtoqo le nani. Khunono pa ikhiluni keno pa no agigihu tsü nani. Eno panoqo pelo timi kutomo shou yepemi shipe nani eno ame lono ayeghi kijetha tsü nani.

⁴⁰ “Ashekha ghuloki lo apeu kükau no pa le nani, ikemu ahuu kükau no khurkulu, khurshimi, eno zükilu kutomo lono miyitsü toi pa shou ighi nani. Eno pa no aghakhuqo jole ighi no qhasü luve nani.

⁴¹ Pa no ajuküvü yeghi lo ighi nani. Qhethonhe chighi piqi no ikiqive nani, ikemu hipaqo ye pa u lono xaphe luve nani: Edom ngo Moab eno Ammonmiw akhoto-a.

⁴² Pa no pa u xachhope aghakhuqo mjochile nani, eno Egypt yeghi ye pomlave nani.

⁴³ Pa no ameshoyi ngo ghükayi kinibo shou eno Egypt lo akughupu thimeqo shou ampeu shive nani, eno Libyami ngo Cushmi no pa pape nani.

⁴⁴ Ikemu kipelau eno ahuu sütsa huno pa shithüghüive nani, pa no axukighide kije lono timi kutomo kütsani ke wu nani.

⁴⁵ Eno azüghi ngo ajuküvü kimthe naghuto küma dolo aphiki kuloghi shiqhe nani. Ikemu khunomu pa kuphu mono pa ye ashekha shive nani.