DANIEL 1 - Sumi Naga CL (Re-edited) Bible (BSI)

Babylon lo Daniel Sawuve

¹ Judah kükau Jehoiakim yepe mpe aküthüu lo, Babylon kükau Nebuchadnezzar no Jerusalem lo ighi no ti khasüluve.

² Ampeu no Judah kükau Jehoiakim eno pa gholono Alhou kilo tinhemgha hami Nebuchadnezzar u lo phesüve tsü. Pa no Shinar yeghi lo pa lhou kilo tipaqo süghi eno pa lhou kinibo lo qhive.

³ Tithiu akükau no Israelmi aküka lagha eno aküxü kivimi bolono ighi kemi khami saighi peniye paw shokomi atou Ashpenaz azah tsüve,

⁴ lhothemi tukutiye küha kemi, aju-aqoghe kivimi, phuithai alokütsümi, akighithi küami, akighithi vethakulumi, akükau kighiki lo puthugho luni kemi saghipe no Chaldeami tsaiko eno atsa panoqo shika peniye shie.

⁵ Akükau no tsalakipe chuqupu akükau no chuche keu, eno atsaiji khipau pa no sho cheni keno tipaqo pesü panongu saje kuto tsüe. Panongu ye ampe küthü ghenguno phi-yelu peniye shi, eno ti kishekhave kethiu panongu ye akükau zülo puthugho peniye shie.

⁶ Panongu dolo Judah shiayemi Daniel, Hananiah, Mishael, eno Azariah noqo ae.

⁷ Shokomi atou no panoqo je kuvetsü: Daniel no Belteshazzar kuvetsü, Hananiah no Shadrach kuvetsü, Mishael no Meshach kuvetsü, eno Azariah no Abednego kuvetsü.

Danielw Pükhükulu

⁸ Ikemu Daniel ye akükau chuqupu momu pa no shoche keu ji pelo pa shipixi pemo nike xathave. Tighenguno pa no shokomi atou vilo pa ampi shipixi monike pulotsü peniye iniju.

⁹ Alhou no shokomi atou pelo Daniel ikhilu eno kimiyelu pe,

¹⁰ shokomi atou no Daniel vilo pi, “I mpeu akükau, khuu o chuqu-kusho kutotsü ani keno ni ye pa msae; kughengu, kushiye pa pelo lhothemi o qhejoqo nguno alhoksau shi no ithulu apeni kea? Tishi aye no ye I küghape akükau zülo akümsapu shivetsü anie.”

¹¹ Tithiu shokomi atou no jukükütsüu khuu pesü Daniel, Hananiah, Mishael, eno Azariah hiju peniye pichebe püa keno, Daniel no timi tipau vilo pi,

¹² “Atsala chighi ghenguno o qemiqo chhejulo; ayetsüni chukepu eno azü yekepu ningu tsülo.

¹³ Tithiuno lhothemi khunoqo akükau chuqupu chu ani keno panongu eno ningu koghe nono chhejulo, eno nono ithulu keu kiqi lono o qemiqo peithalo.”

¹⁴ Ikehu pa no hipau vehulo panoqo tsa initsü, eno atsala chighi panoqo chheju.

¹⁵ Atsala chighi thiu panongu ye lhothemi khunoqo akükau chuqupu chu akeno panoqo nguno aju akiviu shi eno ashi pubeyi ithulue.

¹⁶ Tighenguno jukükütsüu no panoqo chuqupu eno aji ikhipe wuve eno ayetsüni panongu tsü.

¹⁷ Lhothemi pano bidi ghengu ye, tsaiko eno alokütsü kümtsü lo ithiküphalu keu ngo asüqe kighithi Alhou no panoqo tsüe, eno Daniel ye kungunhetsü ngo asamo kümtsü lo vethakulu ae.

¹⁸ Ado kishekhave kethiu, kughou akükau no panongu sailoghi peniye azah tsü keno, shokomi atou no Nebuchadnezzar zülo panoqo saighi.

¹⁹ Akükau no panoqo pütsa, ikemu panoqo dolo khumu Daniel, Hananiah, Mishael, eno Azariah toi ithulu moe. Tighenguno panongu no akükau kümla lo ilove.

²⁰ Eno akükau no panoqo vilo alokütsü eno vethakulu vehu ighiju ke kümtsü lo panoqou no kükaqha lo küdüumi eno shiküghüzü chekeqo nguno ghuthu chighi akiviu shi pa no ithulu.

²¹ Daniel ye akükau Cyrus yepe mpe atüghüu kutolo tilau ache.