BOTHUBO 9 - Sumi Naga CL (Re-edited) Bible (BSI)

¹ Alhou no Noah eno pa nuli kümghatsü no panoqo vilo pi, “Athi pithilu, kughukolu, eno ayeghi shepichhilu lo.”

² Ayeghi shou tüghashi tikishi, atsütsü lo aghau, ayeghi lo itikiche, eno azü lo akhaqo kümtsü no o sümsa eno ichikeu anani. Tipaqo ye o u lo süve tsüae.

³ Ithakiche lhoxü thaqhü no o chuqupu shi nani. Eno I no ayetsüni nongu tsüve ketoi thokha kümtsü nongu tsü ani.

⁴ Ikemu nongu ye aküxü akeu shi, ti ye aji, huye chumoni.

⁵ Eno nongu küxü ji luve tsükeu ye I no kihikülai keu avehupu shi nani: tüghashi eno timi kümtsü launo I no kihikülai keu avehupu shi nani. Timi küxü ghenguno I no pa küsau launo kihikülai keu avehupu shi nani.

⁶ “Khuu no timi ji peleni keno, timi ghi pa ji pele masa nani, kughengu Alhou no Pa ampi julho lono timi lhoke.

⁷ Eno nongu ye athi pithi no kughuko lulo, ayeghi lo shishe ikowolo eno tileno kughuko lo.”

⁸ Tishino Alhou no Noah eno pa gholo akemi pa nuliqo vilo pi,

⁹ “Julo, I no o sasü eno o shelo o tikughuko sasü puloshoqhi shi ani,

¹⁰ eno ti ye aküxüküa lhoxü nongu gholo akeqo, aghau, tikishi eno ayeghi lo tüghashi nongu gholo akeqo, ashuka lono ipeghi keqo, ayeghi lo tüghashi kümtsü ghenguno ke.

¹¹ I no nongu sasü puloshoqhi shi anike, khilemu itaghi züqozü pelo ayeghi kütsave pemoni.”

¹² Eno Alhou no pi, “Hi no Ni eno nongu eno aküxüküa lhoxü, nongu gholo akeqo, dolo ighini keu tiqheli kümtsü ghenguno puloshoqhi shikeu michipu ke:

¹³ I no khüngküsü lo Iw milisü ghope qhivae, eno tino Ni eno ayeghi dolo puloshoqhi michipue.

¹⁴ Kughou I no ayeghi shou khüngküsü süghini eno khüngküsü lo milisü ithuluni keno,

¹⁵ I no Ni, nongu eno aküxüküa lhoxüqo dolo Iw puloshoqhi akeu kümsülu nani. Eno azüghizü ye khilemu itaghi aküxü kütsa nike züqozü shi ighimo nani.

¹⁶ Kughou milisü no khüngküsü lo ngoni keno, I no tipau juno Alhou ngo ayeghi lo aküxüküa lhoxüqo dolo alholo puloshoqhi akeu hu kümsülu nani.”

¹⁷ Alhou no Noah vilo pi, “Hi no Ni eno ayeghi lo aküxü akeqo dolo Puloshoqhi shikeu michipu ke.”

Noah Tikughuko

¹⁸ Noah nuli khunoqo no ashuka lono ipeghi keno panoqo ye Shem, Ham eno Japheth. (Ham ye Canaan papu.)

¹⁹ Pano küthü no Noah nuli, eno hipaqo launo ayeghiqha kümtsü lo timi ikowove.

²⁰ Noah ye alu kichimi shive, eno pa no atsailu chie.

²¹ Pa no atsaiji shomzüve eno aphimini pepumo no pa phiki lo züae.

²² Eno Canaan papu Ham no pa pu ye aphimini pepumo no akeu ithulu no khalau pa thiküzüu pama vilo pi.

²³ Tileno Shem ngo Japheth pama no aphi lakhi ikhilu no pama bighi lo bepüzü shothiu no alachesü panongu papu aphimini pepumo no akeu khonhave. Pama gi ye shothiu kugho puwove no panongu papu no aphimini pepumo no akeu jumoe.

²⁴ Kughou Noah no atsaiji shomzüpe akeu lono ithughi püzü pa nu ayitiu no pa lau shikeu ithi keno,

²⁵ pa no pi, “Canaan ye angusü shipeniu; pa thiküzümi pama lau pa ye aqemiqo qemi shi nani.”

²⁶ Pa no highi pi, “Ampeu, Shem Lhou sheqhelo; Canaan pelo pa qeu shipelo.

²⁷ Alhou no Japheth kughuko tsüpeni, eno pa pelo Shem phiki lo xülu peni, eno Canaan pelo pa qe peniu.”

²⁸ Züqozü thiu Noah ye ampe 350 xüe.

²⁹ Noah küxü kupuju mpe ye 950, tishino pa ye thive.