BOTHUBO 8 - Sumi Naga CL (Re-edited) Bible (BSI)

Züqozü no Iqüilove

¹ Ikemu Alhou no Noah, tüghashi tikishi eno lhoxü jeli ashuka lo pa gholo akemi kümtsü kümsülue. Eno Alhou no ayeghi shou amülhü mülhü ighipe, eno azü iqü ilovepe.

² Akuthoku züpuki ngo atsütsü lasheqo khave tsü, atsütsü lo tsütsüghu ghasüve,

³ eno azü no ayeghi lono iqüilo thuve. Atsala 150 thiu azü ye hailove,

⁴ eno aqhi akütsüniu, atsala chighiakütsüniu lo, ashuka ye Ararat naghuto kütsüqa lo ngove.

⁵ Azü ye aqhi achighiu kutolo tamono iqüilo ae; aqhi achighiu, atsala atüghüu lo, naghuto kütsüqaqo ithuluve.

⁶ Atsala lhobidi ashekha shive kethiu Noah no pa no mlakeu shuka lo alashe khaqhi,

⁷ eno agha lakhi yepuwu. Tipau no ayeghi qhai moke kutolo yehu-yewo auve.

⁸ Tithiu azü ye ayeghi lono iqüilove akemo keno juniye pa no miqhedu lakhi puwu.

⁹ Ikemu miqhedu huye pa pukhu nepe ngolu kepu-a ithulu move, eno idechile ashuka lo pa lau ighive, kughengu azü ye ayeghi lo iqüilo khamono ake. Ikehu pa no pa u chhopipe no miqhedu küghaluve no ashuka alou pa gholo sailoghive.

¹⁰ Pa no itaghi atsala chighi ngokhe, eno itaghi pa no miqhedu ashuka lono puwu.

¹¹ Miqhedu huno avelau pa lau idechile ighi, eno julo, anileshi olive nipa mighi pesü ighie. Ikehu azü ye ayeghi lono hailovae pi Noah no ithive.

¹² Tishino pa no itaghi atsala tsüni ngokhe no miqhedu hu puwu, ikelo miqhedu huye pa lau idechile ighi move.

¹³ Ampe 601, aqhi atüghüu, atsala atüghüu lono azü ye ayeghi lono qhai hailove. Eno Noah no ashuka nhaqhi keu xapheve no ju keloye ayeghi ye qhaive aghi.

¹⁴ Aqhi akiniu, atsala muku-akütsüniu lo ayeghi ye qhaive.

¹⁵ Tileno Alhou no Noah vilo pi,

¹⁶ “Ashuka lono ipelo, no eno o nipu, o nuli eno pano nipuqo.

¹⁷ Aküxüküa lhoxü o gholo akeqo—aghau, tüghashi tikishi, eno ayeghi lo itikiche lhoxü kümtsü saipeghi lo—tishino panongu pelo ayeghi nhakha no athi pithilu eno kughukolu penie.”

¹⁸ Ikehu Noah eno pa nuli, pa nipu eno pa nuli nipuqo no pa gholono ipeghi.

¹⁹ Tüghashi tikishi, itikiche lhoxü, aghau, ayeghi lo akeqo kümtsü atüna kiqi lono ashuka lono ipeve.

Noah lau Alhouw Puloshoqhi

²⁰ Tishino Noah no Ampeu lau akümlla-khache shiqhe eno mqhamqhi keu lhoxü ngo aghau khami ikhilu no akümlla-khache lono akipti kümllagho tsüe.

²¹ Kughou Ampeu no tsüngqüi keu xo münalu keno, Ampeu no Pa mlo lono ishi pi, “Ni ye itaghi khilemu timi xine ghenguno ayeghi müsüini moae, kughengu alhothe lonomu timi kükümsü kupulo ye küsaküghae. Ti kumono Ni ye I no shike toi itaghi khilemu lhoxüqo pügha kithemae.

²² Ayeghi no ake tivilo ghixu eno ghile, akumko eno akülü, mütsü eno süsü, tsüküvü eno tsüküzü ye ashekha shivemo nani.”