BOTHUBO 7 - Sumi Naga CL (Re-edited) Bible (BSI)

¹ Tithiu Ampeu no Noah vilo pi, “No eno o kibolomi kümtsü ashuka lo ilove lo, kughengu hipa tiqheli lo no ye I zülo amikucho ipi I no ithuluvae.

² Mqhamqhi keu lhoxü kümtsü, atsü-aqu atüna tsünini o gholo pewulo, mithekumo lhoxü kinini atsü-aqu,

³ eno atsütsü lo aghau ghi atüna tsünini adu aqu, ayeghi kümtsü lo tipaqo ti kughuko nike pewuni.

⁴ Kughengu atsala tsüni dolono I no ayeghi lo putho tsala lhobidi eno pucho tsala lhobidi tsütsüghu puwuni, eno aküxüküa lhoxü I no lhophe keu kümtsü ayeghi hipau lono I no pühaveni.”

⁵ Ampeu no azah Noah tsükeu kümtsü pa no shive.

⁶ Ayeghi lo züqozü ighike ghuloki lo Noah ye ampe 600 shiae.

⁷ Noah eno pa nuli, pa nipu eno pa nuli nipuqo ye züqozü lono pokalu niye pa gholono ashuka lo ilove.

⁸ Mqhamqhi keu eno mithekumo lhoxü, aghau eno ayeghi lo itikiche lhoxüqo,

⁹ Alhou no Noah azah tsüke toi kinini no, atüna shi Noah gholono ashuka lo ilove.

¹⁰ Eno atsala tsüni thiu züqozü no ayeghi shou ighive.

¹¹ Noah küxü mpe 600, aqhi akiniu, atsala chighiakütsüniu, tipani no akuthoku aghiu lono azüpuki kümtsü vephe ipeghi, eno atsütsü lasheqo kümtsü khaqhive.

¹² Eno putho pucho atsala lhobidi tsütsüghu ayeghi shou ighive.

¹³ Tipa tsala lono Noah eno pa nuli, Shem, Ham eno Japheth, Noah nipu eno pa nuli nipu pano küthü ishi ashuka lo ilove,

¹⁴ panongu eno tüghashi tikishi kümtsü ajeli kiqi lono, ayeghi lo itikiche lhoxüqo ajeli kiqi lono, aghau kümtsü ajeli kiqi lono, eno achishibo kupu lhoxü kümtsü pa gholono ashuka lo ilove.

¹⁵ Lhoxü jeli khipaqo lolo aküxü tuthu akeno tipaqo kümtsü kinini shi panongu no Noah gholono ashuka lo ilove.

¹⁶ Lhoxü jeli khipaqo atsü-aqu kiqi lono ilo keno tipaqo kümtsü Alhou no azah Noah tsükeu kiqi lonoke. Tishino Ampeu no pa khatha süve.

¹⁷ Züqozü ye tamono atsala lhobidi ayeghi lo ighi. Azü no alau shive no ashuka yimi ikughive, eno tipau ye ayeghi kunguu ikuve.

¹⁸ Azü no alau ayeghi shou shishe ikughi kitheve, eno ashuka ye azü shou ngove.

¹⁹ Ayeghi shou azü no alau ikughive kehu atsütsü kupuju qholo naghutoqo ye yimive.

²⁰ Naghutoqo shou auxakuchho tsüni azü no yimive.

²¹ Ayeghi lo pokiche yekiche, itikiche lhoxü aghau, tikishi tüghashi, ayeghi lo tahu tawo chekeqo eno timi kümtsü thive.

²² Qhaike yeghi lo aküxüpu tuthu akeqo kümtsü thive.

²³ Pa no aküxüküa lhoxü, timi, tüghashi, itikiche lhoxü eno atsütsü lo aghau kümtsü ayeghi lono pühave. Panoqo ye ayeghi lono pühave. Noah eno pa gholo ashuka lo akeqo likhi qhive.

²⁴ Azü no ayeghi shou atsala 150 ae.