BOTHUBO 50 - Sumi Naga CL (Re-edited) Bible (BSI)

¹ Tileno Joseph no pa pu gi daluve no qa ghi pa pu mümae.

² Eno Joseph no pa qemi shikipivimi pelo pa pu kumo nukümtsha penike azah tsü. Ikehu shikipivimi no Israel nukümtshave tsü.

³ Ti shinike atsala lhobidi avehupu shive, kughengu tsü-müna mono nukümtshani keu ye atsala tijehi avehupu shiche ke. Eno Egyptmi no pa ghenguno atsala lhotsüni kutolo mloqae.

⁴ Kughou mloqa keu tsala kishekhave keno, Joseph no Pharaoh kibolomi pütsa no pi, “Tsala nongu no I kimiye tsülu aye, kimiyeno Pharaoh pütsa tsüno pilo,

⁵ ‘I pu no I pelo hipau tushoqhi püani pe, “Ni ye thive niye shivae; Canaan yeghi lo I no I sala akumoki chhu püakeu lo I shiqhove lo.” Ikehu itehi kimiyeno I pelo wuno I pu shiqholu pelo. Tishino I no ideighini.’”

⁶ Eno Pharaoh no khochile, “Pa no o pelo tushoqhi pe ketoi iqholo, eno o pu shiqhove lo.”

⁷ Ikehu Joseph no pa pu shiqho niye wuve. Pa gholo Pharaoh qemi, pa kibo lo kichimi, eno Egypt yeghi lo kichimi kümtsü iqho,

⁸ eno Joseph kibolomi, pa thiküzümi eno pa pu kibolomi kümtsü iqhoe. Panongu tianuli, atsü-aqu eno lhoxü jeliqo likhino Goshen yeghi lo qhive.

⁹ Pa gholo khurkulu ngo khurshimi ghi iqho. Kümtsü kelo aqokitikhi kije shi iqhoke.

¹⁰ Kughou panongu no Jordan kukuu Atad niqa lo ighi keno, panongu no tilehi shishe amloiju qave, Joseph no pa pu ghenguno atsala tsüni mloqae.

¹¹ Kughou ayeghi tipau lo küxümi, Canaanmi no Atad niqa lo mloqa akeu ithulu keno, panongu no pi, “Hi ye Egyptmi no shishe amloiju anie.” Tighenguno tipa-a je pesü Abel-mizraim kuvetsü; ti ye Jordan kukuu ani.

¹² Ikehu pa no azah tsü ketoi pa nuliqo no titoi shitsüe,

¹³ panongu no pa xapu Canaan yeghi lo ighi no Hittimi Ephron luza, Mamre kipelau Machpelah luza lo atuki akeu, khikhi Abraham no akumoki shiniye qhü keno, tilehi pa shiqhove.

¹⁴ Joseph no pa pu shiqhove kethiu, pa ye pa mu eno khunoqo pa pu shiqho niye wu keno kümtsü sasü Egypt lo idewove.

Alhou Kimji Kivi

¹⁵ Joseph pamu noqo no panoqo papu thive kethiu pi, “Joseph ye ningu mithive luvi eno nino alhoksa pa lau shikeqo kümtsü ningu tsüchile luvie.”

¹⁶ Ikehu panongu no Joseph lau atsape lakhi pi puwu no pi, “O pu no thinike zülono azah hipau tsü:

¹⁷ ‘Joseph vilo pilo, “Kimiyeno o mu noqo kipimi eno axine qhive tsülo, kughengu panongu no o lau küsakügha shive ke.”’ Itehi kimiyeno o pu Lhou qemiqo kipimi qhive tsülo.” Kughou panongu no pa pütsa keno Joseph no qauve.

¹⁸ Pa mu noqo ghi ighi no pa zülo pishiqho no pi, “Julo, ningu ye o qemiae.”

¹⁹ Ikemu Joseph no panoqo vilo pi, “Msa kevilo, kughengu ni ye Alhou lakhü lo ngo ani keshea?

²⁰ Nonguu ye I shou küsakügha shiniye shike, ikemu Alhou no akivipu ghenguno kughu tsüe, tishikeu lono ishi tsala lo timi hi kutomo xüaghi keqo küxü pükhalu peke.

²¹ Tighenguno msa kevilo; I no nongu eno no tianuliqo ghenguno chukepu tsü nani.” Pa no hitoi shi panoqo lokughuno tsü eno kimiyeqhiyi panoqo pütsae.

Joseph Kithi

²² Joseph ngo pa pu kibolomi ye Egypt lo ache. Joseph ye ampe 110 xüe.

²³ Eno pa ye Ephraim tianuli tiqheli aküthüu kutolo ithulue. Manasseh nu Makhir tianuli ghi Joseph tianuli paphi shi kihiluve.

²⁴ Joseph no pa mu noqo vilo pi, “Ni ye thive niye shivae, ikemu Alhou no nongu xuju ighi nani eno ayeghi hipau lono nongu sasü Pa no Abraham, Isaac eno Jacob vilo ashoqhi shikeu yeghi lo ipeve nani.”

²⁵ Tithiu Joseph no Israel tianuliqo pelo ashoqhi shipe no pi, “Alhou no mtsüqheino nongu xuju ighi nani, eno nongu no hileno I saghi xapu wuve nani.”

²⁶ Joseph ye ampe 110 shino thive. Panongu no tsü-müna pemo nike pa nukümtshave, eno pa ye Egypt lono akumo bohu lo süve.