BOTHUBO 49 - Sumi Naga CL (Re-edited) Bible (BSI)

Jacob no Pa Nuli Kümghatsü

¹ Tithiu Jacob no pa nuliqo kuno pi, “Nongu aqoshi hekütsülo, tishianguno ighini keu tsala lo nongu lau kiu shinani keno I no nongu vilo pini.

² “Hekütsüpe inilo, O Jacob nuliqo, nongu papu Israel tsa inilo.

³ “Reuben, no ye I nu anoghiu, I küka, I kumto xathi amsüu, angualei keu lo ichushei eno aküka lo ichushei ke.

⁴ Azükuqo toi a-a shimoe, no ye akighiche shimo nani, kughengu nono o pu lüpa lo iku; tishino nono ti shikitiqeve—pa no I lüpa lo ikue!

⁵ “Simeon ngo Levi ye athiazü; pama zütakikihi ye kütsakungo keu ghünanu ke.

⁶ I ngulho ye pama hoho lo kuloji moe; O I juküvü, pano loji lo küqha kevilo. Kughengu panongu no amlo kighide lono timiqo pithike, eno ithipüqai amshitsü püka love tsüe.

⁷ Pano xukighide ye angusüpue, kughengu ti ye ayiküsae, pano loghu ye angusüpue, kughengu ti ye ayisalo kütüe! Jacob lagha lono I no panongu kijethave tsüno Israel lono panongu haleveni.

⁸ “Judah, o thiküzümi no o sheqhe nani; o u no o ghümi kuo tsüqü luvetsü nani; o pu nuliqo no o zülo pishiqho nani.

⁹ Judah ye abongshuu ti lhothe; I nu, nono lhoxü tsüqhive no iqhoghive ke. Pa no itsaqi ihozü no abongshuu toi ipuwue; khuu no ighü mono pa küda puthuni kea?

¹⁰ Sükusho süqha Judah lau süghi moke kutolo kükaküsü ye Judah phevemo, momu yepeu küsü ye pa pukhu dolono kühave monani; eno ashiayeqo no pa lau aghokulu shi nani.

¹¹ Paw khurhati atsaibo lo tshü eno khurhali atsaibo akiviu lo tshüpe qhino pa no atsaizü lono pa phimini ishile eno atsaizü kuhu lono alouphi ishie.

¹² Pa nhethi no atsaiji nguno tsüngtsüi eno pa hu no akichhizü nguno metsüghoi ke.

¹³ “Zebulun ye azüghimkü lo küghüna nani; pa ye zükiluqo kungo-a shi nani, eno pa lughi ye Sidon lo anani.

¹⁴ “Issachar ye khurha kumtoe, ambeloji dolo ipu-itsa nani.

¹⁵ Akulhokiqhi-a kivi pa no ithulu, eno ayeghi ye azüküvüpu shi aghi, ikehu pa no abighi lono akho xapuni ye itsaqi, eno anguka lono mlakeu qeu shiuve.

¹⁶ “Dan no Israel shiaye lakhi shino paw timi küghatha nani.

¹⁷ Dan ye ala lo apighi toi nani, alaghi lo athicho no khurshi phitsü mighitsü kelo ti sakicheu no athiu iluqive ketoi nani.

¹⁸ Ow xakulupu I no ngokhe anie, O Ampeu.

¹⁹ “Zülekilemi no Gad le nani, ikemu pa no panoqo thiuno apape lewu nani.

²⁰ “Asher chuqupu ye kinikülü shi nani, kükami chuqupu pa no tsü nani.

²¹ “Naphtali ye ashe ali phepupo ketoi, tino ati jukivi pitie.

²² “Joseph ye athi pithi keu loka, azüpuki phivilo athi pithi keu loka lakhie; pa lokaqo ye aliwo veche ikue.

²³ Asüzü kipemi no mijimlai pa kaqhi, apiji vepuwu no shishe pa kijipüsae,

²⁴ tishinamu paw shexilika ye ithamoe; Jacob Lhou Akumtou u ghenguno, (Israel Tuqu, Akheu ghenguno) pa umlo ye mthüthei anie,

²⁵ o pu Lhou, o kuphu tsükeu, Akughushuu kükümgha, kunguu atsütsü lo eno aqhou azü kutho lo akeu, akichhi ngo atita kükümgha pesü o kümgha tsüke ghenguno ke.

²⁶ O puw kükümgha ye I puasü noqo kükümgha nguno akijeu, mulholo toghiqow kükümgha nguno akijeu ke. Tipaqo no Joseph kütsü lo apelo, pa thiküzümi launo kütüta shive keu kütsü shou apeniu.

²⁷ “Benjamin ye mihemzai keu tüngtügha, inaqhe no tsüqhi kijiliu no ti xulepuwu ke.”

Jacob Kithi eno Akumo Kuqho

²⁸ Hipaqo no Israel shiaye chighikini. Panongu papu no hitoi panoqo kümghatsüe, lakhikhi no aküzüpu shi aghikeu kiqi lono pa no kümghatsüe.

²⁹ Tishino pa no panoqo azah tsüno pi, “Ni ye Iw timi gholo hekütsü luve niye shivae; Hittimi Ephron luza lo atuki akeu lo I puasü gholo I shiqhove lo,

³⁰ ti ye Canaan yeghi lo Mamre kipelau Machpelah luza lo atuki, khikhi Abraham no Hittimi Ephron luza lo akumoki shiniye qhüluve keno tipau ke.

³¹ Panongu no Abraham eno pa nipu Sarah tilehi shiqhove. Tilehi panongu no Isaac ngo pa nipu Rebekah shiqhove eno tilehi I no Leah shiqhove—

³² aluza eno atuki tilehi akeu ye Hittimi launo qhüluve ke.”

³³ Kughou Jacob no pa nuliqo azah tsü tave keno, pa no alüpa lo pa pukhu peqhe luve no pa tuthu kishekhave eno paw timiqo gholo hekütsü luve.