BOTHUBO 48 - Sumi Naga CL (Re-edited) Bible (BSI)

Ephraim ngo Manasseh Kümghatsü

¹ Tithiu Joseph vilo pi, “Julo, o pu ye sü anie.” Ikehu pa no pa gholo pa nu Manasseh ngo Ephraim pama sawu.

² Eno Jacob vilo asütsa tsü, “O nu Joseph ye o lau ighi anie.” Tile Israel no pa kumto kümtsü süno pa lüpa lo ithu iqave.

³ Eno Jacob no Joseph vilo pi, “Akughushu Lhou no Canaan yeghi, Luz lono I lau ipeghi no I kümghatsüe,

⁴ eno I vilo pi, ‘Julo, I no o pelo athi pithi eno kughuko lupe nani, eno timi aqokitikhi shivepe nani, eno pülhapuju mheghi shi ayeghi hipau pesü o shelo o tikughukoqo tsü nani.’

⁵ Eno itehi o nu kini, khuu pama Egypt yeghi lo I no ighi moke züuno o lau punu keno, pama ye Iw ake; Reuben ngo Simeon pama no Iw ketoi, Ephraim ngo Manasseh pama ye Iw shini.

⁶ Pama thiuno nono atianuli ithulu keu ye ow shini. Eno amheghi ighi kelo panongu ye panongu pamu noqo gholo kihisüni.

⁷ I ghengu ye, kughou I no Paddan lono ighi keno, I mlo ghimepu shi Rachel ye Canaan yeghi lo Ephrath tonike kushuo kumo lo ala lono thive, eno I no Ephrath (ti ye, Bethlehem) la lo li shiqhove.”

⁸ Kughou Israel no Joseph nuli ithulu keno, pa no pi, “Pama ye khuu kea?”

⁹ Joseph no pa pu vilo pi, “Pama ye I nue, Alhou no hilau no I kümgha tsükeu ke.” Eno pa no pi, “Kimiyeno hila I lau saghilo, tishianguno I no pama kümgha tsüni.”

¹⁰ Israel ye kichimi shive kehu anhethi züve no pa ye ithulu move. Ikehu Joseph no pama sasü pa phivilo ighi, eno pa no pama müma no vape.

¹¹ Eno Israel no Joseph vilo pi, “Ni ye o gi ithulu nanie pi khilemu laju moe; ikemu julo, Alhou no I pelo o nuli ghi ithulu peke.”

¹² Tithiu Joseph no pa pu lukobo lono pama khape luve, eno ayeghi lo pa gi pishiqho luve.

¹³ Eno Joseph no pama khape luve, Ephraim no pa u ajeu Israel u piyiu küdau, eno Manasseh no pa u piyiu Israel u ajeu küdau ishi ngope no pa zülo pama saghi.

¹⁴ Israel no pa u hekütaluve no pa u ajeu pesü Ephraim, khuu ayitiu keno, pa kütsü shou be, (kughengu Manasseh no anoghiu ke).

¹⁵ Eno pa no Joseph kümghatsü no pi, “Alhou khuu zülo I pu Abraham ngo Isaac no cheche keno, Alhou khuu no I küxü kupuju ishi kutolo I kheu keno,

¹⁶ kungumi khuu no alhoksa kümtsü lono I xachilelu keno, Pa no apu pama kümghatsü peniu; pama launo I je, I pu Abraham ngo Isaac je pewo peniu; eno ayeghi lo pama pelo aqokitikhi shi ikowolu peniu.”

¹⁷ Kughou Joseph no pa pu u ajeu no Ephraim shou bepe aghikeu ithulu keno pa mlo qimlave, eno Ephraim kütsü lono pa pu u ajeu ikhiqhepe Manasseh kütsü shou betsü niye shi.

¹⁸ Joseph no papu vilo pi, “Tila kumoe, I pu; anu hipau no anoghiu ke, o u ajeu pesü pa kütsü lo belo.”

¹⁹ Ikemu papu no milive no pi, “I no ithi anie, I nu, I no ithi ani. Pa ghi ashiaye kije shi ikowo nani. Tishinamu, pa thiküzüu ayitiu no pa nguno akijeu shi nani, eno pa tikughuko no aqokitikhi shiye shinani.”

²⁰ Ikehu pa no tipa tsalani no pama kümghatsü no pi, “O vecheo Israel no kükümgha tsa ishi pi nani, ‘Alhou no o pesü Ephraim ngo Manasseh toi shitsü peniu.’” Ikehu pa no hitoi Ephraim pesü Manasseh züu shivetsü.

²¹ Tithiu Israel no Joseph vilo pi, “Julo, ni ye thiveni cheae, ikemu Alhou no nongu gholo anani eno nongu sasü no puasü yeghi lo idewo nani.

²² Tinguno alau, o thiküzümi tsükeu nguno alau ato yeghi lakhi khikhi I no Amorimi u lono I zütakikihi ngo Iw shexilika pesü hakholu keno tipau o tsüve ani.”