BOTHUBO 46 - Sumi Naga CL (Re-edited) Bible (BSI)

Joseph Kibolomi Egypt lo Saighi

¹ Ikehu Israel no pa no pighi akeu kümtsü pesü pa ghüzüla lo wuve no Beersheba lo ighi, eno pa pu Isaac Lhou lau aghakishi pesü mllae.

² Alhou no putho lo kungunhetsü lono pa pütsa no pi, “Jacob, Jacob.” Eno pa no pi, “Ni hile ani.”

³ Tile Pa no pi, “Ni ye Alhou, o pu Lhou ke. Egypt lo iqinike msa kevilo, kughengu tilauno I no o pesü shiye kije shitsüni.

⁴ Ni ampi no Egypt lo o gholo iqi nani, eno I no o saighive nani, Joseph u no o nhethi kiyikha tsü nani.”

⁵ Tishino Jacob no Beersheba lono wuve. Israel nuliqo no panongu papu, atianuli kughunuqo eno anipuqo ishi Pharaoh no tinhemgha kupu mishikulu tsüpuwu keu lono xapu luve.

⁶ Jacob ngo pa gholo pa tikughuko no pano tsü-aqu, tinhemgha, khipaqo Canaan yeghi lono ithulu keno, ti kümtsü sasü Egypt lo wuve.

⁷ Pa gholo pa nuli eno atilimi, pa ngaqo eno atilimi ishi pa tikughuko kümtsü pa no sasü Egypt lo ighive.

⁸ Hipaqo no Jacob tikughuko je ke: Reuben, pa nu anoghiu,

⁹ Reuben nuli: Hanoch, Pallu, Hezron, eno Carmi.

¹⁰ Simeon nuli: Jemuel, Jamin, Ohad, Jachin, Zohar, eno Shaul, Canaanmi totimi lakhi nu.

¹¹ Levi nuli: Gershon, Kohath, eno Merari.

¹² Judah nuli: Er, Onan, Shelah, Perez, eno Zerah (ikemu Er ngo Onan pama ye Canaan yeghi lono thive); eno Perez nuli no Hezron ngo Hamul.

¹³ Issachar nuli: Tola, Puvah, Yob, eno Shimron.

¹⁴ Zebulun nuli: Sered, Elon, eno Jahleel.

¹⁵ Hipaqo no Leah, khuu no Paddan-aram lo Jacob lau punu tsü keno, li nuliqo ke, eno tipaqo gholo pa nga Dinah ghi ke; pa tianuli aqolo shighi küthü.

¹⁶ Gad nuli: Ziphion, Haggi, Shuni, Ezbon, Eri, Arodi, eno Areli.

¹⁷ Asher nuli: Imnah, Ishvah, Ishvi, Beriah, eno panoqo chepu Serah. Beriah nuli: Heber ngo Malkhiel.

¹⁸ Hipaqo no Zilpah nuliqo, li ye Laban no pa nga Leah tsükeu ke; li no Jacob lau punu tsükeu—pano chighitsügho.

¹⁹ Jacob nipu Rachel nuli: Joseph ngo Benjamin.

²⁰ Egypt yeghi lono Jacob lau punu keu no Manasseh ngo Ephraim, pama ye On lo achineu Potiphera nonga Asenath no pa lau punu tsüke.

²¹ Benjamin nuli: Bela, Bekher, Ashbel, Gera, Naaman, Ehi, Rosh, Muppim, Huppim, eno Ard.

²² Hipaqo no Rachel nuli, li no Jacob lau punu tsü keqo—kümtsü kelo chighibidi.

²³ Dan nu: Hushim.

²⁴ Naphtali nuli: Jahzeel, Guni, Jezer, eno Shillem.

²⁵ Hipaqo no Bilhah nuliqo, li ye Laban no pa nga Rachel tsükeu ke, li no Jacob lau punu tsükeu—kümtsü kelo pano tsüni.

²⁶ Jacob timi, khunoqo pa tikughukomi keno, pa nuli nipuqo kihisü mono aqolo pano lhotsügho tsügho.

²⁷ Joseph nu Egypt lono pa lau punu tsükeu no pamae. Jacob kibolomi, khunoqo Egypt lo ighi keno panongu ye aqolo lhotsüni.

Jacob ngo Joseph Kujuthu luve

²⁸ Jacob no Goshen laghi pa piye peniye Judah pelo pa züu shi wuvepe, eno panongu ye Goshen yeghi lo ighive.

²⁹ Tileno Joseph no paw khurkulu kutope pa pu Israel kusholu niye Goshen lo iqhoe. Pa no pa zülo ighi no pa kuo lono khaluve eno pa vape ado kushuo qae.

³⁰ Israel no Joseph vilo pi, “I no o gi ithuluvae eno no ye xüaphie pi ithive ake itehi ye I no thive namu alomsü moae.”

³¹ Joseph no pa mu noqo eno pa pu kibolomi vilo pi, “I no iqho no Pharaoh vilo pini, ‘I thiküzümi eno I pu kibolomi, khunoqo Canaan yeghi lo akeno, panongu ye I lau ighivae.

³² Panongu ye ambekhemi ke, kughengu panongu ye atsü-aqu kipighimi, eno pano tsü-aqu eno lhoxü jeli ngo panongu no pighi akeqo kümtsü saghivae.’

³³ Kughou Pharaoh no nongu kuno, ‘Nongu ye kiu kümla shiche kemi kea?’ ipi aye,

³⁴ nongu ye ishi pilo, ‘Ningu eno ningu papu, o qemiqo ye ni lhothe lono ishi kutolo atsü-aqu pighi achenie,’ tishi pikeu vecheo nongu ye Goshen yeghi lo küghüna lunani, kughengu Egyptmi ghenguno ambekhemi ye aphikümqhüpu ke.”