BOTHUBO 44 - Sumi Naga CL (Re-edited) Bible (BSI)

Joseph no Pamu noqo Peju

¹ Tithiu Joseph no pa kilo aghini kishiu azah tsü, “Timi hipaqo pulukho lo, panongu no xapulu kepu qhemi, achuqupu chhitoi shepichhi lo, eno pütütaw pisa apulukho kichi lo ghokütsü süvelo,

² eno Iw ghükayi jukhu pesü ayitiu pulukho kichi lo athi ghenguno pisa peighi akeu gholo süvelo.” Eno pa no Joseph no pi ketoi shive.

³ Inaqhe vüipeghi kemtsa, panongu ye khurhaqo gholono puwove.

⁴ Panongu no mishighüna lono kushuo kumo lo wuve. Eno Joseph no aghini kishiu vilo pi, “Ithu timi hupaqo pape wulo, eno kughou nono panongu haluni keno, panoqo vilo pilo, ‘Nongu ye kushiye küsakügha pesü akivi tsüchile ani kea?

⁵ Hi ye I mpeu no shoche keu jukhu, eno hipau pesü pa no chini chenike kumo keshea? Hipau shikeu lono nongu ye küsakügha shivae.’”

⁶ Kughou pa no panoqo halu keno, pa no atsa hipaqo panoqo vilo pi.

⁷ Panongu no pa vilo pi, “Kushiye I mpeu ye atsa hipaqo pi ani kea? O qemiqo ye khilemu hitoi keu kümla shimo nanie!

⁸ Julo, pisa khikhi ningu pulukho kichi lono ithulu keno ningu no Canaan yeghi lono o lau pechile ighike. Tishi aye, kishino ningu ye ghükayi momu ameshoyi o mpeu ki lono pükani kea?

⁹ O qemi khuu launo tipau ithuluni keno pithiveni, eno ninguu ghi I mpeu qemi shiveni.”

¹⁰ Pa no pi, “Nongu no pive ketoi shini: khuu launo ithuluni keno, pa ye I qemi shiveni, eno nongu kütami ye akipimi shimoni.”

¹¹ Tishino milakhikhi no pütüta pulukho ayeghi lo lheqhi, eno lakhikhi no kuqhoe.

¹² Eno anoghiu no atüghüu shino ayitiu no ashekha shi pa no lheju. Ikelo ajukhu ye Benjamin pulukho lo aghi.

¹³ Tileno panongu no pano phiküzü süxüve, eno kümtsü no apulukho khurha xapipeve no mishighüna lo ideighive.

¹⁴ Kughou Judah ngo pa thiküzümi no Joseph kilo ighi keno, pa ye aki lo ngo aghi. Panongu no pa zülo ayeghi lo ikiqive.

¹⁵ Joseph no panoqo vilo pi, “Nongu ye hi ye kiu kümla shive akea? I toi kemi timi ye kuchou no asaqhilu nanie pi nongu ye mtha kea?”

¹⁶ Judah no pi, “Ningu ye I mpeu vilo kiu pini kea? Ningu ye kiu tsa pini kea? Momu ningu ye kishi ningu saphu luni kea? Alhou no o qemiqo kipimi phuphe luvae: julo, ningu ye I mpeu qemiae, ningu eno khuu pulukho lono ajukhu ithulu keno, ningu kümtsü o qemiae.”

¹⁷ Ikemu pa no pi, “Ni ye khilemu tishimo nani thono! Timi khuu u lono ajukhu ithulu keno pa likhino I qeu shi nani. Ikemu nongu kütami ghengu ye, aloino nongu papu lau wovelo.”

¹⁸ Tileno Judah no pa lau wuno pi, “O, I mpeu, kimiyeno o qeu pelo atsa lakhi I mpeu vilo piju pelo, eno o qeu lau o amloide tsü kevilo, kughengu no ye Pharaoh paphike.

¹⁹ I mpeu no pa qemi vilo ighijue, ‘Nongu ye apu momu athiküzüu anima?’

²⁰ Eno ningu no I mpeu vilo pi, ‘Ningu ye apu lakhi kitemi ani, eno pa no kitemi shive kethiuno punu keu athiküzüu lakhi ani. Pa mu ye thivae, eno pa za nuli dolo pa likhivae, ikehu pa pu no pa kimiye chenie.’

²¹ Tithiu nono o qemi vilo pi, ‘I lau pa saiqighi lo, tishianguno I nhethi no junie.’

²² Ningu no I mpeu vilo pi, ‘Apu ye papu qhive mlae, kughengu tsala pa no pa pu qhive aye, pa pu ye thive nani.’

²³ Tithiu nono o qemi vilo pi, ‘Nongu thiküzüu ayitiu nongu gholo ighimo aye, nongu ye itaghi I gi ithulumo nani.’

²⁴ “Kughou nino o qeu, I pu lau idewo keno, ningu no pa vilo I mpeu tsa pike.

²⁵ Eno kughou ningu papu no, ‘Itaghi wulo, achuqupu kitila ningu ghenguno qhüsüghi lo,’ ipi keno

²⁶ nino pi, ‘Ningu ye iqilu moae. Tsala ningu thiküzüu ayitiu no ni gholo wu aye, nino iqini. Kughengu ningu thiküzüu ayitiu no ni gholo ighimo aye, ningu ye timi hu sholumo nanie.’

²⁷ Tileno o qeu, I pu no ningu vilo pi, ‘Nongu no ithi anie, I nipu no anu kini I lau punutsü.

²⁸ Lakhi ye I qhivae, eno I no pi, “Mtsüqheino pa ye sütha pinyive,” kughengu tithiu ni ye pa khilemu ithulu mphike.

²⁹ Tsala nongu no hipau ghi I launo sawuve tsü aye, eno pa lau aghüza shive aye, nongu no ni asa kümpau pelo küsakügha lono Kithigha lo iqive peae.’

³⁰ “Tighenguno itehi, I no o qeu I pu lau ighi kelo, eno apu huno ningu gholo aghi move keu ithulu aye, pa küxü ye apu küxü gholo tsügha küqhape acheni kehu,

³¹ pa no apu ye ningu gholo kühave keu ithulu khavi, pa ye thive niae, eno o qemiqo ye aghime lono o qeu ningu papu asa kümpau sasü Kithigha lo wuniae.

³² Kughengu o qeu no I pu lau apu ghenguno sükusho shoqhi hitoi shipüani, ‘Tsala I no o lau pa sachile ighi move aye, I no I pu zülo I küxü kupuju atiche xapuni.’

³³ Tighenguno itehi kimiyeno apu züqhulo o qeu pelo I mpeu qeu shi ngove pelo, eno apu pelo pa mu noqo gholono idewove pelo.

³⁴ Kughengu apu no I gholo wumo aye, ni ye kishi I pu lau idewoni kea? Alhoksa no I pu lau ighiveni keu ni ye msa anie.”