BOTHUBO 40 - Sumi Naga CL (Re-edited) Bible (BSI)

Joseph no Akughumi Kini Samo Hepho

¹ Ado hami thiu, Egypt lo akükau jukhu kipeu ngo asho kümlau pama ye pano mpeu, Egypt kükau hebide keu kipimi shive.

² Pharaoh ye paw hiyampemi, ajukhu kipeu atou ngo asho kümlau atou pama shou axuideve,

³ eno pa no ghukhemi kepten kughuki khile Joseph ghi khatha püa keno tile pama khathave.

⁴ Pama gholo ngo peniye eno pama ghini shi peniye ghukhemi kepten no Joseph süsüve. Pama ye ado hami tishi akughu lo ae.

⁵ Kijili lakhi Egypt kükau jukhu kipeu ngo asho kümlau, khuu pama akughu shi akeno, pama gha asamo pumo, eno pama gha pütüta samo hepho ae.

⁶ Kughou Joseph no inaqhe pama lau ighi keno, pama ye akükümsü püna aghikeu pa no ithulu.

⁷ Ikehu pa no Pharaohw hiyampemi, khuu pama ghi pa mpeu ki lono pa gholo akughu shi akeno pama vilo ighiju, “Kushiye ishi nokujo ye agi zü ani kea?”

⁸ Pama no pa vilo pi, “Nikujo ye asamo pumoe, ikemu nikujo vilo hepho piyeni kemi lakhimu kühae.” Eno Joseph no pama vilo pi, “Hekupho ye Alhouw ke kumo? Kimiyeno I vilo piju lo.”

⁹ Ikehu ajukhu kipeu atou no pa samo Joseph vilo pi, “I samou no atsaibo lakhi I zülo aghi,

¹⁰ eno atsaibo lo aloka küthü aghi. Tipau no mini ipeghi khavi, pu ipeghive, eno tipau pho no atsaithi shi ni ipeghive.

¹¹ Pharaoh jukhu ye I u lo ae, eno I no atsaithi ikhilu no tipaqo Pharaoh jukhu lo inaphosü no Pharaoh u lo ajukhu sütsü aghie.”

¹² Tile Joseph no pa vilo pi, “Tipau hekupho ye hike: aloka küthü ye atsala küthü.

¹³ Atsala küthü dolo Pharaoh no o kütsü peqhe tsüno ow hiyam lo süsüve nani, eno püzüu nono pa jukhu kipeu shiche ketoi Pharaoh jukhu pesü pa u lo sütsü nani.

¹⁴ Kughou o kivipu shiluveni keno I kümsülu lo, kimiyeno kikimiye I lau pephetsü ghi Pharaoh lau I je pitsülo, eno aki hipau lono I khaqhiphe tsülo.

¹⁵ Kughengu kuchou no ni ye Hebrewmi yeghi lono sünhe sawuve kemi, eno hilau ghi aqokutho lo I vesüve pekepu kümla ni ye kiumu shi püamoe.”

¹⁶ Kughou asho kümlau no hekupho akivishi aghikeu ithi keno, pa no Joseph vilo pi, “Ni ghi asamo lakhi pumoe: Ashopa ashoghi küthü I kütsü lo aghi,

¹⁷ eno ashoghi kunguu lo Pharaoh ghenguno asho jeli kümtsü aghi, ikemu aghauqo no I kütsü lo ashoghi akeu lono mighichu aghie.”

¹⁸ Joseph no khochile, “Hekupho tipau ye hike: ashoghi küthü huye atsala küthü ke.

¹⁹ Atsala küthü dolo Pharaoh no o kütsü peqhe tsü nani, eno asübo lakhi lono o tshüqhive nani. Eno aghauqo no o shi mighichu nani.”

²⁰ Atsala aküthüu lo Pharaoh punu tsala shiae, pa no aghulhu lakhi pa qemi kümtsü ghenguno kuto eno pa qemi gholono ajukhu kipeu atou ngo asho kümlau atou pama kütsü peqhetsü.

²¹ Pa no ajukhu kipeu atou pesü pa-a lo süsüve eno pa no Pharaoh u lo pa jukhu süvetsü.

²² Ikemu pa no asho kümlau atou ye Joseph no hephotsü ketoi tshüqhive.

²³ Ikeghi ajukhu kipeu atou ye Joseph kümsülu move, pa ye qhoi kümsümave.