BOTHUBO 4 - Sumi Naga CL (Re-edited) Bible (BSI)

Cain ngo Abel

¹ Adam no pa nipu Eve ithive kethiu li ye mishive no Cain punu, eno pi, “Ampeu kukuphu vecheo ni ye anu ithuluvae.”

² Eno itaghi, li no pa thiküzüu Abel punu. Abel ye ambekheu shi ache, eno Cain ye aluchemi shi ache.

³ Ado hami thiu Cain no aluche lono tüxatini kümllagho Ampeu lau peighi,

⁴ eno Abel ghi pa mbeloji lo piti tüghüu, atha pubeyi keqo dolono peighi. Ampeu no Abel eno pa kümllagho shou amloqive,

⁵ ikemu Cain ngo pa kümllagho ye Pa no amlo kiqishi move. Ikehu Cain ye ighono amloideve, eno pa gi pishiqho luve.

⁶ Ampeu no Cain vilo pi, “Kushiye no ye amloide ani kea, eno kushiye o gi pishiqhope ani kea?

⁷ Tsala nono achipi shi aye, no ye ikhikulupu shimoni keshea? Eno nono akivi shimove aye, axine ye ahukikha ijepe ani. Tino o shou kaluveni shi ani, ikemu no ye tipau shou theqhi luve masae.”

⁸ Cain no pa thiküzüu Abel pütsae. Eno kughou pama aluza lo akeno, Cain no pa thiküzüu Abel mjochile thuve no pa ghiqhive.

⁹ Tithiu Ampeu no Cain vilo pi, “O thiküzüu Abel ye khile ani kea?” Pa no pi, “Ni ye mthae; ni ye I thiküzüu kheu keshea?”

¹⁰ Ampeu no pi, “No ye kiu shive akea? O thiküzüu ji ghügha huno ayeghi lono I lau igha ikughi anie.

¹¹ Ikehu ayeghi khikhino o u lono pele keu o thiküzüu ji mighe luniye akichi xükho keno, tipau no itehi ye o müsüinivae.

¹² Kughou nono ayeghi mlani keno, ti ye aghüma akeu qhemi athi pithi o tsümoae. No ye ayeghi lo kupokichemi eno kachena shiniae.”

¹³ Cain no Ampeu vilo pi, “I ghime ye I no puqhe kulupu nguno akimshiue.

¹⁴ Julo, Nono ayeghi lono ishi no I haphevae, eno O zülono ni ye itshüve niae. Ni ye ayeghi lo kupokichemi eno kachena shive niae, eno khuu no ni ithuluni keno heqhive nanie.”

¹⁵ Tile Ampeu no pa vilo pi, “Tishimlae! Khuana no Cain heqhive aye, ghuthu tsüni pa shou amkhü lunani.” Eno Ampeu no amchipu lakhi Cain shou qhive, tishimo aye khukhumu pa ithulu keu no pa ghüza nosake.

¹⁶ Tithiu Cain ye Ampeu zülono wuve eno Eden kipelau Nod yeghi lo xüsüve.

¹⁷ Cain no pa nipu ithive eno li ye mishive no Enoch punu. Kughou pa no aphughi lakhi shiqhe keno, pa no pa nu jelono tipau pesü Enoch kuvetsü.

¹⁸ Enoch nu Irad, eno Irad nu Mehujael, Mehujael nu Methushael, Methushael nu Lamech.

¹⁹ Lamech ye anipu kini luve. Anipu lakhi je Adah, eno lakhiu je no Zillah.

²⁰ Adah no Jabal punu; pa ye aphiki lo ngoche kemi eno pichepighi kipighimi papu ke.

²¹ Pa thiküzüu je no Jubal; pa ye aheo ngo fulili küigha chekemi papu.

²² Zillah no Tubal-cain punu; pa ye alazayi ngo ayi pesü tinhemgha iqiphe kemi shive. Tabul-cain chepu je no Naamah.

²³ Lamech no pa nipu pama vilo pi: “Adah ngo Zillah, I tsa inilo; Lamech nipu nokujo, I no kiu pi keno inilo: timi lakhi no I ghüza ke, apumi lakhi no I heve kehu I no pithivae.

²⁴ Tsala Cain mkhükulu no ghuthu tsüni shi aghi aye, Lamech sala ye ghuthu lhotsüni tsüni lunani.”

²⁵ Adam no itaghi pa nipu ithive, li no anu lakhi punu eno pa je Seth kuvetsü, kughengu li no pi, “Cain no pithive tsükeu, Abel züqhulo Alhou no I ghenguno atikughuko kütau süküsü shive tsüae.”

²⁶ Seth lau ghi anu lakhi punu, eno pa je Enosh kuvetsü. Tipa ghuloki lo timiqo ye Ampeu je kuthuve.