BOTHUBO 37 - Sumi Naga CL (Re-edited) Bible (BSI)

Joseph Samo

¹ Jacob ye Canaan yeghi lo pa pu no inami shi achekeu yeghi lo xüache.

² Hipaqo no Jacob tikughuko. Joseph ye ampe chighitsüni shiuve ke pa ye pa mu noqo gholono ambeloji kheae. Pa ye itimi lakhi shi pa pu nipuqo Bilhah ngo Zilpah nuliqo gholo ae. Eno Joseph no panongu papu vilo pano ghili küsa pive tsüche.

³ Israel no pa nu kütami nguno alau Joseph kimiye che, kughengu pa no kitemi shive kethiuno pa punu ke. Pa no alabe jelino chijeboike phi lakhi pa ghenguno mlatsüe.

⁴ Ikemu kughou pa mu noqo no panongu papu ye athiazümi kümtsü nguno alau pa kimiye akeu ithive keno, panongu no pa mithiuve, eno aloqiqhiyi pa pütsa mlave.

⁵ Joseph no asamo lakhi pumo, kughou pa no pa mu noqo vilo pi keno, panongu no alau pa mithiuve.

⁶ Pa no panoqo vilo pi, “Asamo hi I no pumo keu inilo:

⁷ Julo, ningu ye alu lo aghi ghove keu piqhe ae, eno julo, I ghi kipiqhe no müzüchoi puthugho luve. Eno nongu ghi kipiqhe no tipau veho luve no I kipiqhe zülo pishiqhoe.”

⁸ Pa mu noqo no pa vilo pi, “No ye kuchou no ningu shou kani kea? Ikeo no ye kuchou no ni shou ayepeni kea?” Ikehu pa samo eno pa tsa ghenguno panongu no itaghi alaushi pa mithiuve.

⁹ Tithiu pa no asamo kütau pumo eno pa mu noqo vilo tipau pi, “Julo, I no asamo kütau pumoe. Khetsünhe, aqhi eno ayepu chighiqhaqhi no I zülo pishiqhoe.”

¹⁰ Ikemu kughou pa no tipau pa pu ngo pa mu noqo vilo pi keno, pa pu no lomipi no pa vilo pi, “Nono asamo pumo keu hi ye kiu kea? Ni eno o za ngo o mu noqo ye kuchou no ighi no o zülo ayeghi lo pishiqhoni keshea?”

¹¹ Pa mu noqo ye pa ju anheshuve, ikemu pa pu no atsa hipaqo pa mlo lo qhiluve.

Joseph Jepuwuve

¹² Pa mu noqo ye Shechem phivilo panoqo papu mbeloji achu kümza niye wuve.

¹³ Israel no Joseph vilo pi, “O mu noqo ye Shechem lo ambeloji achu kümza anike kumo? Ighilo, I no panoqo lau o puwuni.” Eno pa no pi, “Ni hile ani.”

¹⁴ Ikehu pa no pa vilo pi, “Itehi o mu noqo eno ambeloji ye akivi shi ani kemo keno juwulo, eno asütsa I lau süghilo.” Ikehu pa no Hebron Khila lono pa phepuwuve eno pa ye Shechem lo ideighive.

¹⁵ Timi lakhi no pa no aluza lo itsü cheghi keu ithulu. Timi huno pa vilo pi, “No ye kiu phucheni kea?”

¹⁶ “Ni ye I mu noqo phu cheni,” ipi pa no pi. “Kimiyeno I vilo pitsülo, panongu ye khileno ambeloji achu kümza ani kea?”

¹⁷ Timi huno pi, “Panongu ye chevae, kughengu panongu no, ‘Ningu Dothan lo wuveni nolo,’ ipikeu I no chilue.” Ikehu Joseph no pamu noqo pape wuno Dothan lono sholu.

¹⁸ Panongu no putou no pa ithulu, eno pa no kupunu ighi mphi lono panongu no pa pithive niye küsüqeve.

¹⁹ Panongu lakhino lakhi vilo pi, “Asamo kupumou hi chenie.

²⁰ Itehi ighilo, ningu pa heqhive no aqokutho lakhi lo vesüveni nolo. Tishino tüghashi yiküsa no pa tsüqhivae pi ningu no piveni, eno pa samo ye kishive nani keno nino ju tsüni.”

²¹ Ikemu kughou Reuben no ti chilu keno, pa no panoqo u lono pa xaphe luve no pi, “Ningu pa küxü luve tsümoni.”

²² Reuben no panoqo vilo pi, “Aji pele kevilo; yenguyike-a hile aqokutho lo vesüve lo, ikemu pa shou au bekevilo”—tishianguno pa no panoqo u lono xaphepe pa pu lau sachile woniye shike.

²³ Ikehu kughou Joseph no pa mu noqo lau ighi keno, panongu no paw chijeboike phi, alabe jelino mlakeu, khikhi pa no pepuche keno ti xaluve tsü.

²⁴ Panongu no pa küghape aqokutho lo vesüve. Aqokutho ye kümsa eno azü mu kühae.

²⁵ Tithiu panongu no chusho nike iqave. Panongu no jupuwo kelo Gilead lono Ishmaelmi aloji lakhi sayeshi lono ata, nukümtshau eno axokütsüngü pesü Egypt lo iqi cheghi.

²⁶ Tileno Judah no pa thiküzümi vilo pi, “Ni thiküzüu heqhive no pa ji küsüve keu no kiu ala ani kea?

²⁷ Ighilo, ningu Ishmaelmi vilo pa jepuwuveni, ningu u pa shou bemoni, kughengu pa ye ni thiküzüu eno ni shi ni ji ke.” Eno pa thiküzümi no pa tsa inive.

²⁸ Tithiu Midianmi lhidimi no katha ighi. Panongu no aqokutho lono Joseph sünhephe eno ghükayi shekel muku no Ishmaelmi vilo jepuwuve. Panongu no Joseph sasü Egypt lo wuve.

²⁹ Kughou Reuben no aqokutho lo ideighi no Joseph kühave aghi keu ithi keno, pa no pa kuuphi süxüve,

³⁰ eno pa thiküzümi lau ideighi no pi, “Apu kühavae, imaye niu ye khila wuni akea?”

³¹ Tile panongu no Josephw chijeboike phi pesü ane lakhi ghiqhi no aji lono tipau pütsüve.

³² Eno panongu no alabe jelino shikeu chijeboike phi pesü panongu papu lau ighi no pi, “Ningu no hi ithulue; kimiyeno hi ye o nuw chijeboike phi kemo keno kimchiju lo.”

³³ Pa no ti kimchi luve no pi, “Hi ye I nu phiküzüe. Lhoxü yiküsa no pa tsüqhivae. Mtsüqheino Joseph ye sütha pinyivae.”

³⁴ Tileno Jacob no pa kuuphi süxüve no yeqhiyephi pa chita lo khapuve eno pa nu ghenguno atsala kutomo mloqae.

³⁵ Pa tianuliqo no pa lokughuno tsüniye shi kemu pa no ti milive no pi, “Moe, ni ye mloqasü Kithigha lo I nu lau wuve niae.” Ikehu pa pu no pa ghenguno mloqae.

³⁶ Tishi akelo Midianmi no Egypt lo Pharaohw hiyampemi Potiphar, ghukhemi shou kepten lau Joseph jesüve.