BOTHUBO 35 - Sumi Naga CL (Re-edited) Bible (BSI)

Jacob Je Kukideve tsü

¹ Alhou no Jacob vilo pi, “Ithulo, Bethel lo iqholo eno tilau küghünauve lo. Nono o mu Esau launo poche kelo Alhou khuu o lau ipeghi keno, Pa lau akümlla-khache shiqhe lo.”

² Ikehu Jacob no pa kibolomi eno pa gholo akeqo kümtsü vilo pi, “Inaghami lhou nongu gholo akeqo qhive no nongu ampi shikimthe lulo eno nongu phimini kilive lo.

³ Tishino ningu ithu no Bethel lo iqhoni nolo, tishianguno Alhou khuu no I veküsa tsala lo I khochile tsü eno khile khilemu I gholo acheni keno, I no Pa lau akümlla-khache shiqheni.”

⁴ Ikehu panongu no inaghami lhou pano gholo akeqo eno pano kini lo kighi chekeu kümtsü Jacob tsüve. Jacob no tipaqo pesü Shechem lo aphisübo qholo küsüve.

⁵ Panongu no chesü wuche kelo, Alhou launo thüghüi kepu lakhi panongu hokümxa lo mishighünaqo shou ikughive, ikehu panongu ye Jacob nuliqo hawu move.

⁶ Jacob ngo pa gholo kichemi kümtsü no Luz (ti ye, Bethel), khikhi Canaan yeghi lo ani keno, tile ighive,

⁷ eno tilehi pa no akümlla-khache shiqhe no tipa-a pesü El-bethel kuvetsü, kughengu pa no pamu launo posü wuche kelo, tipa-a lono Alhou no pa lau ipeghi ke.

⁸ Eno Rebekah hikujuu Deborah ye thive, li ye Bethel phivilo aphisübo qholo shiqhove. Ikehu tipa-a je pesü Allon-bacuth kuvetsü.

⁹ Kughou Jacob no Paddan-aram lono ighive keno, Alhou no pa lau itaghi ipeghi no pa kümghatsü.

¹⁰ Eno pa vilo pi, “O je ye Jacob ke; ikemu itehi o je ye Israel ipi kuniae.” Ikehu Alhou no pa je Israel kuvetsü.

¹¹ Eno Alhou no pi, “Ni ye Akughushu Lhou ke; athi pithilu eno kighishelu lo. O launo shiye lakhi lighimi ipeghi nani, eno o phi lono kükami ipeghi nani.

¹² I no Abraham ngo Isaac tsükeu yeghi o tsü nani, eno o shelo o tikughukomi lau I no ayeghi tsü nani.”

¹³ Tishino Alhou ye pa pütsa akeu-a lono kunguu ikuve.

¹⁴ Alhou no khileno pa pütsa keno Jacob no tile atu no atsükucho shiqhe pukuve. Pa no atsaizü kümllagho eno thazü tipau shou lepukuve.

¹⁵ Ikehu Jacob no Alhou no pa pütsa keu-a pesü Bethel kuvetsü.

Rachel ngo Isaac Kithi

¹⁶ Tithiu panongu no Bethel lono chesü wuve. Panongu no Ephrath tonike kushuo kumo lo, Rachel ye küaküzü do tove no apunu küsü süuve.

¹⁷ Kughou li no apunu kushokütsü shive keno, hikujuu no pi, “Msa kevilo, kughengu no ye itaghi kiptimi ithuluvae.”

¹⁸ Li ngulho no li qhimphi lono (kughengu li ye süthauveni ye shiveke), li no pa je Ben-oni kuvetsü; ikemu pa pu no pa je Benjamin kuvetsü.

¹⁹ Eno Rachel ye thive, li ye Ephrath (ti ye Bethlehem) kuwula lo shiqhove,

²⁰ eno Jacob no li kumo shou atsükucho lakhi shiqheve. Ti ye Rachel thigho tsükucho ke, tipau ye ishi kutolo acheni.

²¹ Israel ye chesü wuve no Eder ghukhe-a ghüngü lo pa phiki shiqheve.

²² Israel no tipa yeghi lo küghüna akelo, Reuben no wuno papu nipu amishiu Bilhah shipüthave. Israel no tipa sütsa chiluve. Jacob nuli chighikini ye hipaqo:

²³ Leah nuli: Reuben (Jacob nu anoghiu), Simeon, Levi, Judah, Issachar eno Zebulun.

²⁴ Rachel nuli: Joseph ngo Benjamin.

²⁵ Rachel qeliu Bilhah nuli: Dan ngo Naphtali.

²⁶ Leah qeliu Zilpah nuli: Gad ngo Asher. Hipaqo no Jacob nuli Paddan-aram lo ake lono punu keqo ke.

²⁷ Jacob no Abraham ngo Isaac pama no kachena shi acheke-a Mamre, momu Kiriath-arba (ti ye Hebron) lo papu Isaac lau ighi.

²⁸ Isaac ye ampe 180 xüe.

²⁹ Isaac ye ateasü kutolo xüno thive eno pano timi gholo thihuve. Eno pa nu Esau ngo Jacob pama no pa kumo shiqhove.