BOTHUBO 34 - Sumi Naga CL (Re-edited) Bible (BSI)

Dinah Shipüthave

¹ Leah nga Dinah, khuu Jacob lau punutsü keno, li no tipa aghakhu lo totimiqo juniye wue.

² Kughou Hivimi Hamor nu Shechem, tipa yeghi lo kükapuu no li ithulu keno, pa no li küghaluve no sazüve eno li lau küthakügha shive.

³ Eno pa mlo ye Jacob nonga Dinah shou auve. Pa no ayiliu kimiyeve no ivünhei li pütsae.

⁴ Ikehu Shechem no pa pu Hamor pütsa no pi, “I nipu shinike totimi hipau I tsülo.”

⁵ Jacob no pa nga Dinah ye Shechem no shikitiqevae pi chiluve. Ikemu pa nuliqo ye aluza lo atsü-aqu gholo akehu panongu no ighi moke kutolo Jacob ye inaqhoi ae.

⁶ Shechem papu Hamor no Jacob pütsa niye pa lau wu.

⁷ Jacob nuliqo no ti chilu khavi aluza lono ighive eno panongu ye ighono axuideve, kughengu Shechem no Jacob nga shipüthave keu vecheo Israel lo achika-anguka shiveke, kughengu hitoi keu ye shikepu kumoe.

⁸ Ikemu Hamor no panoqo pütsa no pi, “I nu Shechem mlo ye nonga khelho anie. Kimiyeno li pesü pa nipu shi penike tsüvelo.

⁹ Ningu sasü külakupu shilo. Nongaqo ni tsülo, eno nongu no ningaqo lulo.

¹⁰ Nongu no ni gholo ngolu nani, eno nongu lau ayeghi khaqhitsü nani. Ngolo eno hileno kilhisho shilo, hileno amheghi shilulo.”

¹¹ Shechem ghi li papu ngo amunoqo vilo pi, “Nongu nhethe lo I kimiyeqhiyi tsülo, eno nongu no kiu I vilo pini keno, I no nongu tsüni.

¹² Nongu no ameh eno agho kiu pulo keno khulo, eno I vilo kiu kiumu khukeu ye I no tsüni. I nipu shi penike ayiliu likhi I tsülo.”

¹³ Jacob nuliqo no amqüshi Shechem ngo pa pu Hamor pama khochile, kughengu pa no panoqo chepu Dinah shipüthave ke.

¹⁴ Panongu no pama vilo pi, “Ningu ye ni chepu pesü milakhi aphighüyiko ghamo kemi tsüveni keu ye shimlae, kughengu ti ye ni ghenguno küthaküghapu shive nanie.

¹⁵ Hipa tsalo likhino nino o gholo puloküqhani—ti ye nongu dolo kiptimi kümtsü no aphighüyiko ghave no ningu toi shiveni.

¹⁶ Tileno ningaqo nongu tsüni, eno nino nongaqo anipu shinike luni, eno nino nongu gholo xüno ashiaye lakhi shiveni.

¹⁷ Ikemu tsala nongu no ni tsa inimo eno aphighüyiko ghamo aye, nino ninga saluve no chevenie.”

¹⁸ Panongu tsa no Hamor ngo Hamor nu Shechem lopiqive.

¹⁹ Eno apumi huye hipa vehu shini keu lo munuve moe, kughengu pa ye Jacob nga lau alokiqi ae. Pa ye pa pu kilo kütami kümtsü nguno alau agigihu akemi.

²⁰ Ikehu Hamor ngo pa nu Shechem pama no panow mishighüna khagho lo ighi no timi kümtsü pütsa no pi,

²¹ “Timi hipaqo ye ningu sasü külakishi lono ani; panoqo pelo ayeghi hile ngolupe no kilhikishi shilu pelo, kughengu julo, ayeghi ye panoqo ghenguno kughomae. Ningu no panongu ngaqo anipu shinike luni, eno ningaqo panongu tsünie.

²² Hipa tsalo likhino panongu ye ningu gholo küghüna niye ani—ti ye ningu gholo kiptimi kümtsü pano toi aphighüyiko ghave masavae.

²³ Pano tsü-aqu, amheghi eno tüghashi kümtsü niw shiluve nanike kumo? Ningu pano gholo pulo luveni nolo, tishi aye panongu ye ni gholo küghünave nani.”

²⁴ Mishighüna khagho lo wukemi kümtsü no Hamor ngo pa nu Shechem tsa initsü, eno tile wukemi kiptimi kümtsü no aphighüyiko ghave.

²⁵ Atsala aküthüni, kughou azakuqo no apiyi shi akeno, Jacob nuli Simeon ngo Levi, Dinah pamu pama no azütakikihi pesü mishighüna leighi no kiptimi kümtsü ghiqhive tsü.

²⁶ Pama no azütakikihi pesü Hamor ngo pa nu Shechem pama ghiqhive eno Shechem ki lono Dinah sasü wuve.

²⁷ Jacob nuliqo no ghiqhive keqo shou ighi no mishighüna lhepuwuve tsü, kughengu panongu chepu shikitiqeve kehue.

²⁸ Panongu no ambe loji, atsü-aqu, khurha, eno mishighüna lo, aluza lo kiu aghi keno kümtsü luve tsü.

²⁹ Pano küakini, ititunu eno anipuqo, aki lo aghikeu kümtsü küghaluve no lhepuwuve tsü.

³⁰ Tile Jacob no Simeon ngo Levi pama vilo pi, “Nokujo ye I shou aküküpna süghivae eno Canaanmi ngo Perizimi yeghi hile küxümi zülo I pesü ajuaje küsapu shive tsüae. Ni ye aghulo ke, eno tsala panongu no hekütsüpe I mjochile eno leighi aye, ni eno I kibo ye kütsave nanie.”

³¹ Ikemu pama no pi, “Pa ye kütüqhalimi toi ni chepu peitha masa keshea?”