BOTHUBO 32 - Sumi Naga CL (Re-edited) Bible (BSI)

Jacob no Esau Msave

¹ Jacob no pa la lo wuve, eno Alhouw kungumi no pa sasü kusholu.

² Kughou Jacob no panoqo ithulu keno pa no pi, “Hi ye Alhouw aghazü-a kena!” Tighenguno pa no tipa-a pesü Mahanaim kuve tsü.

³ Jacob no pa züuno Edom ghakhu lo Seir yeghi lo pa mu Esau lau atsapemi puwu,

⁴ eno panoqo piputo ghi pi, “Nongu ye I mpeu Esau vilo hitoi pilo: O qeu Jacob no piani, ‘Ni ye Laban gholo inami shi itehi kutolo ngo ighivae.

⁵ Ni ye amshitsü, khurha, atsüaqu, aqemi totimi ngo kiptimi ani. I no I mpeu vilo pi peniye puwu ani, tishianguno I kimiyeqhiyi tsü peniye ke.’”

⁶ Atsapemiqo no Jacob lau ideighi no pi, “Ningu no o mu Esau lau ighi, eno pa ye o sholu niye cheni, eno pa gholo timi aqhe bidi chenie.”

⁷ Tileno Jacob ye ighono msave no amloghuju shive. Pa no pa gholo timi akeqo, ambeloji, atsü-aqu eno sayeshiqo aghazü mqo kini shi kijethave,

⁸ tsüno kümsü, “Tsala Esau no aghazü lakhi lo ighi no tipau leve aye, aghazü lakhiu ye poka luve nani.”

⁹ Eno Jacob no pi, “O I pu Abraham Lhou eno I pu Isaac Lhou, O Ampeu khuu no I vilo, ‘O ghakhu lo eno o sholokumi lau idewove lo, tishianguno I no o lau akivi shi tsünie,’ ipi keno,

¹⁰ ni ye Ow iqemokeu kikimiye eno pükhükulu kümla Nono O qeu lau piye keqo akimkheu mu ithulu küzüpu kumoe, kughengu I kusü likhi kuchope ni ye Jordan hipau kathae, ikemu itehi ni ye aghazü mqo kini shivae.

¹¹ Kimiyeno I mu Esau u lono I xaphe tsülo, kughengu ni ye pa msa anie, pa ye ni eno atianuli ngo azanoqo leighi luvike.

¹² Ikemu Nono pi, ‘Mtsüqheino Ni ye o lau akivi shitsü nani, eno o lagha pesü azüghi lo asaye, khikhi kihi khamla keno titoi aqokitikhi shitsü nani.’”

¹³ Ikehu pa ye tipaji tilehi ngove, eno pa no kiu pighi akeno tipau lono pa mu Esau ghenguno agho luve,

¹⁴ anequ aqhe kini, anetsü muku, ambequ aqhe kini eno ambetsü muku,

¹⁵ akichhizü küsü sayeshi eno tipau tiqo süküqha no shighi, amshiqu lhobidi eno amshitsü chighi, khurhatsü muku eno khurhaqu chighi ikhiphe.

¹⁶ Pa no hipaqo pesü pa qemi tsüve, pütüta tsüaqu loji kiqi lono, eno panongu vilo pi, “I züu shi wulo, eno atsü-aqu loji dolo ado hami qhilo.”

¹⁷ Pa no atüghüu mqo vilo piputo, “Kughou I mu Esau no o sholu no o vilo, ‘No ye khuno timi kea? No ye khila wucheni kea? Eno o züu chekeqo ye khuno kea?’ ipi ighiju aye,

¹⁸ no ye ishi pilo, ‘Hipaqo ye o qeu Jacobw ke. Agho I mpeu Esau lau tsü puwu akeqo ke. Eno tinguno alau, pa ghi ningu thiu chenie.’”

¹⁹ Tihutoi pa no amqo akiniu ngo aküthüu eno atsüaqu loji pape chekeqo kümtsü vilo piputove, “Kughou nongu no pa sholuni keno, nongu ye hipa tho pa vilo pilo,

²⁰ eno nongu no pilo, ‘Tinguno alau, o qeu Jacob ye ningu thiu chenie.’” Kughengu pa no kümsüe, “Agho I züu chekeqo pesü ni ye pa haküghüqü luvi, eno tithiuno I no pa gi ithulunie. Pa ghi ni ikhilutsü luvie.”

²¹ Ikehu aghochhe no pa züu shi wuvepe, eno pa ye tipaji aghazü lo ngove.

Jacob no Alhou sasü Kükha

²² Tipaji pa no ithu pa nipu pama, pa qelimi pama eno atianuli chighiqhaqhi saluve no Jabbok ghoki kakütha-a lono katha ikuve.

²³ Pa no panoqo eno pa pighi jeli kümtsü pesü aghokiti katha ikuvepe.

²⁴ Eno Jacob ye pa likhi ngove. Eno milakhi no atsala vü ipeghi moke kutolo pa sasü kükhae.

²⁵ Kughou timi huno Jacob mjochile mlave keno, pa no pa yikughi butsü, eno Jacob ye pa sasü kükha akelono pa yikughi süküqüve.

²⁶ Timi huno pi, “I puwuve lo, kughengu atsala ye vü ipeghivae.” Ikemu Jacob no pi, “Nono I kümghatsü moaye ni ye o puwumoe.”

²⁷ Eno pa no pi, “O je ye khuu kea?” Pa no khochile, “Jacob.”

²⁸ Tile pa no pi, “O je ye Jacob kumoae, ikemu Israel ipi kuniae, kughengu nono Alhou eno timi sasü kumjo no toluvae.”

²⁹ Jacob no pa je ighiju, “Kimiyeno I vilo o je pilo.” Ikemu pa no pi, “Kushiye I je ighiju ani kea?” Eno tishino pa no pa kümghatsü.

³⁰ Ikehu Jacob no tipa-a pesü Peniel kuve tsüno pi, “Kughengu ni ye agi no agi kinheqhe Alhou ithuluvae, tishimu I küxü xaphe tsüke.”

³¹ Pa no pa yiku ghenguno khül khül shi Penuel qhive no wuche kelo khetsünhe ye pa shou ikughive.

³² Tighenguno, ishi tsala kutolo Israelmi ye ayikughi kikime lo ashi akeu chuchemoe. Kughengu timi huno Jacob yikughi lo anhü buve tsüke.