BOTHUBO 31 - Sumi Naga CL (Re-edited) Bible (BSI)

Jacob no Laban launo Pove

¹ Laban nuliqo no ishi pi aghikeu Jacob no chilu, “Jacob no I puw kümtsü luve tsüae, eno kiu no ningu papuw keno tipau lono pa no akini hi kümtsü ala shiluvae.”

² Eno Laban ye azüu toi pa gihu move keu Jacob no ithive.

³ Tile Ampeu no Jacob vilo pi, “O puno yeghi lo no bolomi lau idewove lo, I no o gholo ananie.”

⁴ Ikehu Jacob no aluza khile pa mbeloji püa keno tilau timi puwu no Rachel ngo Leah pama kusaghi pe,

⁵ eno pama vilo pi, “I no ithivae nokujo papu ye püzüu toi I lau agigihu kühavae. Ikemu I pu Lhou no I gholo anie.

⁶ Nokujo no ithi anike ni ye I kumto kümtsü pesü nokujo papu qe ighivae,

⁷ tishimu pa no I pishiqhive eno I jume ghuthu chighi kilive tsü. Ikemu Alhou no I ghüza peni keu puloza pa tsümoe.

⁸ Tsala pa no, ‘Yetamüghüi keu no o jume shini,’ ipi aye atsü-aqu loji kümtsü no yetamüghüi keu pitive; eno tsala pa no, ‘Asüphakive no o jume shini,’ ipi aye atsü-aqu no asüphakive pitie.

⁹ Tishikeu lono Alhou no nokujo papu tsü-aqu sawo I tsüve.

¹⁰ Atsüaqu kiveke ghuloki lo I no I nhethi tsüpuku no asamou no ithulu ke ane khipaqo no küghüpa keno tipaqo ye yetamüghüi, asüphakive eno aye vepu keqo ke.

¹¹ Tileno Alhouw kungumi no asamou no I vilo pi, ‘Jacob,’ eno I no pi, ‘Ni hile ani!’

¹² Pa no pi, ‘O nhethi tsüpukupe julo, anetsü ipa akeu neqo ye kümtsü yetamüghüi, asüphakive eno aye vepu keqoe, kughengu Laban no o lau shi akeu kümtsü I no ithuluvae.

¹³ Ni ye Bethel, nono khile atsükucho nukishe eno I lau ashoqhi shi keno, tipa Lhou ke. Itehi ithulo, ayeghi hipau lono wuve no o sholokumi yeghi lo idewove lo.’”

¹⁴ Tileno Rachel ngo Leah pama no khochile, “Nikujo papu kilo ye ni saje momu amheghi aphi keshea?

¹⁵ Pa ye inami toi nikujo kihi chenike kumo? Kughengu pa no nikujo jevae eno mtsüqheino niw pisa peithavae.

¹⁶ Alhou no nikujo papu launo küakini süwuve keu kümtsü ningu eno ni tianuliqow ke. Ikehu itehi, Alhou no kiu o vilo pi keno shilo.”

¹⁷ Ikehu Jacob no ithu pa nuli ngo pa nipuqo sayeshi lo pukuve.

¹⁸ Pa no pa tsü-aqu, amheghi pa no ala shilu keqo, atsü-aqu pa no Paddan-aram lo pighi phelu keqo kümtsü hasasü Canaan yeghi lo papu Isaac lau wuveni ye kutove.

¹⁹ Laban ye pa mbe mhi ghoniye wuve, eno Rachel no li papu kibo lo pighi chekeu lhouqo püka luve.

²⁰ Jacob no pove niye akeu Arameami Laban vilo pimove keu lono pa ye Laban pishiqhive.

²¹ Pa no pighi akeu kümtsü pesü Euphrates katha ikuve, eno Gilead toghi ghakhu küdau pa gi jupuwove.

²² Kughou Jacob no pove keu atsala aküthüni no Laban vilo pi keno,

²³ pa no pa sholokumi sasü atsala tsüni pa hasü wuno pa kupunu ghi Gilead toghi ghakhu lo pape ighi.

²⁴ Ikemu putho lo Alhou no asamou no Arameami Laban lau ighi no pa vilo pi, “Jacob vilo alhoksa momu akivi kiumu pimo kepushi kutokupui lo.”

²⁵ Laban no Jacob haluve. Jacob ye atoghi ghakhu lo pa phiki shiqheve, eno Laban no pa sholokumi gholono Gilead toghi ghakhu lo aphiki shiqhe.

²⁶ Laban no Jacob vilo pi, “No ye kiu shive pi I pishiqhive no aghüshi lono küghaluve keshi I nga pama sawuve tsü kea?

²⁷ No ye kushiye küsüuno pove no I pishiqhive kea? Ni ye amqübo ngo aheo pesü kunuvüqai ale phesü o puwuni chekeghi kushiye I vilo pimo kea?

²⁸ Eno kushiye I pelo I tilimiqo müma no kinipuwo pemo kea? No ye mbomzü shivae.

²⁹ O ghüzalu kepu küka I u lo ani. Ikemu iji o pu Lhou no I pütsa no, ‘Jacob vilo alhoksa momu akivi kiumu pimo kepushi kutokupui lo,’ ipie.

³⁰ Eno itehi no ye ighono o pu ki kümsüve ke ghenguno wuvae, ikemu kushiye no ye I kibo lo pighi chekeu lhouqo püka luve kea?”

³¹ Jacob no khochile no Laban vilo pi, “Kughengu ni ye msave ke, no ye ngukangugha shi I launo o nga pama saluve tsü nani küghashi kümsüve ke.

³² Khukhumu o lhouqo pecheghi keu ithulu aye xümo nani. Ni sholokumi zülono I no kiu ani keno ti ye ow kepi kichephe no luvelo.” Jacob ye Rachel no tipaqo püka luve keu mthae.

³³ Ikehu Laban no Jacob phiki eno Leah phiki ngo aqelimi pama phiki lo ilo, ikemu pa ye tipaqo phumlae. Pa no Leah phiki lono ipeghive no Rachel phiki lo ilo.

³⁴ Rachel no aki lo pighi chekeu lhouqo ikhiluve no sayeshi küghüqa-a qholo süve no tipa shou iqa ae. Laban no aphiki kümtsü lheju kemu ithumlave.

³⁵ Li no papu vilo pi, “I no o zülo puthugho mlake ghenguno I mpeu no amloide kevilo, kughengu ni ye toti lhoaye ighi ani.” Ikehu pa no phuju ikemu aki lo pighi chekeu lhouqo ithumlave.

³⁶ Tileno Jacob no amloideve no Laban lomipi. Jacob no Laban vilo pi, “I kipimi kiu ani kea? I xine ye kiu keno no ye mqhumza I haighi kea?

³⁷ Kughengu nono I nhemgha kümtsü lhejuva; o kilo pighi chekeu lhouqo kiu ithulu kea? No eno o sholokumi zülono hile qhijulo, tishianguno panoqo pelo nikujo dolo xathatsü penie.

³⁸ I no o gholo hi ampe muku ngo ighivae. O mbequ ngo anequqo iqove keu shimoe, eno ni ye o tsü-aqu loji lo ambetsü chu püamoe.

³⁹ Tüghashi no kiu tsüqhive keno ni ye o lau süghimoe. Niu no amhekiqi puqheve che. Putho lo na puchou namu pükape wuve aye, nono I launo khuluve che.

⁴⁰ Puchou no akülü no I ghaqhi, putho lono akumko no pichiqhi, eno I nhethi miyiqhi mono tilau ache.

⁴¹ Hi ampe muku ni ye o kilo ngovae. O nga pama ghenguno I no ampe chighibidi o qe, eno ampe tsügho no o tsü-aqu ghenguno, eno nono I jume ghuthu chighi kilive tsüe.

⁴² Tsala I pu Lhou, Abraham Lhou eno Isaac no Sümsa chekeu huno I küdau aghimo aye, mtsüqheino no ye au kümsa I puwuve aghini cheke. Alhou no I ghime eno I u lo kümla ithulu tsü püzü iji o lomipi ke.”

⁴³ Tileno Laban no Jacob khochile, “Anga pama ye I nga ke, atianuliqo ghi I tianuli, atsü-aqu ghi I tsü-aqu, eno nono ithulu akeqo kümtsü Iw ke. Ikemu I nga pama ghenguno eno pama tianuli khikhi pama no punu keno, panoqo ghenguno ni ye ishi tsala lo kiu shiluni kea?

⁴⁴ Itehi ighilo, nikujo dolo puloshoqhi lakhi shini. Eno tino nikujo dolo thopi lakhi shipenie.”

⁴⁵ Ikehu Jacob no atu lakhi ikhipe atsükucho shi qhopeqhi.

⁴⁶ Eno Jacob no pa sholokumi vilo pi, “Atu kumqolo.” Panongu no atu ikhipe gheqhe puku, eno ti gheqhe keu-a lono chushove.

⁴⁷ Laban no tipau pesü Jegar-sahadutha kuvetsü, ikemu Jacob no tipa pesü Galeed kuvetsü.

⁴⁸ Laban no pi, “Atu ghekiqhe hipau no ishi nikujo dolo thopi lakhie.” Tighenguno pa no tipau pesü Galeed,

⁴⁹ eno Mizpah kuve tsü, kughengu pa no pi, “Kughou nikujo no lakhino lakhi launo putosüveni keno, Ampeu no nikujo jukuto anani.

⁵⁰ Tsala nono I nga pama sapüsa aye momu I nga pama nguno alau anipu kütami luve aye, nikujo dolo khumu aghimo namu, julo, Alhou no nikujo dolo thopike.”

⁵¹ Tishino Laban no Jacob vilo pi, “Atu ghekiqhe eno atsükucho, khikhi I no nikujo dolo ghopüani keno tipau julo.

⁵² Atu ghekiqhe hipau ye thopi lakhie, eno atsükucho ye thopi lakhie, ni ye atu ghekiqhe hipau hechesü o lau wumo nani, eno no ghi atu ghekiqhe eno atsükucho hipau hechesü I ghüza niye I lau ighi moni.

⁵³ Abraham Lhou, Nahor Lhou eno panoqo papu Lhou no nikujo dolo xaküthau ke.” Ikehu Jacob no pa pu Isaac no Sümsa chekeu jeku tushoqhive,

⁵⁴ Jacob no atoghi ghakhu lono aghakishi lakhi mlla eno pa sholokumi kusü no asho chue. Panongu no asho chuve no atoghi ghakhu lono tsüküzü puwove.

⁵⁵ Laban no inaqhe itheno ithu pa tilimi ngo pa nga pama müma eno panoqo kümghatsü. Tishino Laban ye pa kilo idewove.