BOTHUBO 30 - Sumi Naga CL (Re-edited) Bible (BSI)

¹ Kughou Rachel no Jacob nuli punu mlave keno, li no pafo ju anheshuve. Li no Jacob vilo pi, “Anuli I tsülo, tikumo aye ni ye thivenie!”

² Jacob ye li shou axuideve, eno pa no pi, “Alhou khuu no o launo atita lo xathi lakhave tsü akeno, ni ye Pa-a lo ngo ani keshea?”

³ Tile li no pi, “I qeliu Bilhah hi anie; li lau ilolo, tishino li pelo I züqhushi punu tsü peni, tishi aye li vecheo ni ghi anuli ithuluvi ke.”

⁴ Ikehu li no li qeliu Bilhah anipu shi pa tsü, eno Jacob no li lau ilove.

⁵ Bilhah no mishipuve, eno Jacob lau anu lakhi punu.

⁶ Tile Rachel no pi, “Alhou no I ghenguno küghatha tsüe, Pa no I sütsa ghi chilu tsüno anu lakhi I tsüvae.” Tighenguno li no pa je Dan kutsü.

⁷ Rachel qeliu Bilhah ye itaghi mishipuve eno Jacob lau anu akiniu punu.

⁸ Tithiu Rachel no pi, “Shishe kumgho keu lono I no I fo sasü kükha no tokulu shilue.” Ikehu li no pa je pesü Naphtali kutsü.

⁹ Kughou Leah no anu punu move keno, li no li qeliu Zilpah pesü li kimi Jacob lau anipu shi tsüve.

¹⁰ Tishino Leah qeliu Zilpah no Jacob lau anu lakhi punu tsü.

¹¹ Eno Leah no pi, “Angukivi shivae!” Ikehu li no pa je Gad kuvetsü.

¹² Leah qeliu Zilpah no anu akiniu Jacob lau punu tsü.

¹³ Eno Leah no pi, “Ni ye alovi anie! Kughengu totimiqo no alokiviu ipi I kue.” Ikehu li no pa je Asher kuvetsü.

¹⁴ Ashothi ghile ghuloki lo Reuben no aluza wuno zünilobo aghikeu ithulu kehu pewo paza Leah tsü. Tile Rachel no Leah vilo pi, “Kimiyeno o nuw zünilobo hami I tsülo.”

¹⁵ Ikemu li no pi, “I kimi no o sawuve keu ye avehu tachu küghashi ani keshea? I nuw zünilobo ghi no ye ikhipe wuveni keshea?” Rachel no pi, “Tishi aye o nuw zünilobo chhekichile shi itiji no ye pa gholo zü lunani.”

¹⁶ Kughou Jacob no avelau aluza lono ideighi keno, Leah no pa sasü kusho niye wuno pa vilo pi, “No ye I lau iloghi masae, kughengu I no I nuw zünilobo vecheo o piqevae.” Ikehu pa no tipaji li gholo züve.

¹⁷ Eno Alhou no Leah sütsa chilu tsüno li ye mishipuve no Jacob lau anu apunguu punu tsü.

¹⁸ Leah no pi, “Alhou no I jume I tsüvae, kughengu I no I qeliu pesü I kimi tsüke.” Ikehu li no pa je Issachar kutsü.

¹⁹ Leah no itaghi mishipuve eno li no Jacob lau anu akütsüghou punu tsü.

²⁰ Tile Leah no pi, “Alhou no agho kivi pesü I pelo ighilu peke; itehi ye I kimi no I gihuniae, kughengu I no pa lau anu tsügho punuve tsüae.” Ikehu li no pa je Zebulun kutsü.

²¹ Tithiu li no anga lakhi punu eno li je Dinah kuvetsü.

²² Tishino Alhou no Rachel kümsülu, eno Alhou no li sütsa chilu tsüno li tita khaqhive tsü.

²³ Li no mishipuve no anu lakhi punu, eno li no pi, “Alhou no I jukünatha keu ikhipe wuve tsüae.”

²⁴ Li no pa je Joseph kuvetsü no pi, “Ampeu no I lau anu lakhi küpha tsüpeniu!”

Jacob Küakini

²⁵ Rachel no Joseph punu khavi Jacob no Laban vilo pi, “I puwuve lo, tishino I pelo I ki eno I ghakhu lo wolu pelo.

²⁶ I nipu pama ngo I nuli, khunoqo ghenguno I no o qeve akeno I tsüvelo, tishino I pelo wolu pelo, kughengu I no o qeighi keu nono ithi anie.”

²⁷ Ikemu Laban no pa vilo pi, “Tsala nono I küpüqhiyi ithulu aghi aye, I no saqhisali lono ithivae, ti ye o ghenguno Ampeu no I kümghave tsüae.

²⁸ O jume pijulo, eno I no ti o tsünie.”

²⁹ Jacob no pa vilo pi, “I no kishi o qeve eno o tsü-aqu no kishi I gholo ikowove akeno no ampi no ithi anie.

³⁰ Kughengu I no ighi moke züu no ye aghulo likhi ae, ikemu tipau ye kupukuno shi ikowovae, eno I no khilau tsüghüwo keno Ampeu no o kümgha tsüe. Ikemu itehi ye I kibo ghenguno ni ghi kughono kutoni kea?”

³¹ Pa no pi, “Ni ye kiu o tsüni kea?” Jacob no pi “No ye kiumu I tsü akepu shimo nani. Tsala nono I ghenguno hipau shitsü aye, I no itaghi o tsü-aqu tucho eno khekuto tsü nani:

³² ishi I pelo o tsü-aqu xujulu pelo, tipaqo dolo ambe yetamüghüi keu, asüphakive eno tsübui keqo küta shiveni, ane ghi doghü-doghü keu ngo asüphakiveqo küta shive no tipaqo no I jume shini.

³³ Ikehu hithiu kughou nono I jume juniye ighini keno, I mikucho huno I ghenguno khochile nani. Ane asüphakive kumo keu momu yetamüghüi mokeu eno ambeqo dolo tsübuimo keu, I tsü-aqu gholo ithulu aye, tipaqo ye aküpka kepi kihini.”

³⁴ Laban no pi, “Alova! Nono pi aketoi tishini.”

³⁵ Ikemu tipa tsalani Laban no anetsü yetamüghüi eno doghü-doghü keqo küta shive, eno anequ asüphakive, doghü-doghü keu, metsüghoi keqo ngo ambe tsübui keqo kütashi hasawo pa nuli pelo jukütsü peniye qhive.

³⁶ Eno pa no Jacob ngo pama tsü-aqu dolo atsala küthü lache qhemi qhive, Jacob ye Laban tsü-aqu jukuto ae.

³⁷ Tithiu Jacob no khotsüsü loka ngo almond loka eno tsüzüsü loka ishi süghi no ayikola aqe-aqe shi miyeve, ikehu aküsü tipaqo lo metsüghoi keu ithulua.

³⁸ Pa no asü kholhave keqo pesü atsüaqu zü tughuko zülo qhive, ti ye azü tsü chekeu-a, khilehi atsüaqu no azü yeniye ighi chekeno tipa-a ke. Lhoxüqo no azü yeniye ighike lono ipache kehu,

³⁹ atsüaqu no asü lokaqo zülono ipave kelo kuchono yetamüghüi keu ngo asüphakive eno doghü-doghü shikeqo pitie.

⁴⁰ Jacob no ambequqo kütashi qhino tipaqo gi pesü Laban tsüaqu yetamüghüi keu ngo tsübui keqo küdau jupuwope. Pa no paw lhoxüqo küta shive no Laban tsüaqu gholo qhimove.

⁴¹ Kughou atsüaqu kumto no kiveni keno, Jacob no asü lokaqo pesü atughuko lo atsüaqu zülo qhitsü, tishianguno panoqo pelo asü lokaqo dolono kivelu peniye ke,

⁴² ikemu atsüaqu miqemlei keqo ghengu ye pa no tile qhitsümoe. Ikehu miqemlei keu thaqhü no Labanw shive eno akumto thaqhü no Jacobw shive.

⁴³ Ikehu timi huye ighono kughuko luve eno atsüaqu, aqemi totimi ngo kiptimi, eno sayeshi ngo khurhaqo kutomo shive.