BOTHUBO 3 - Sumi Naga CL (Re-edited) Bible (BSI)

Ikiqive keu

¹ Ampeu Alhou no aluza lo tüghashi lho keqo kümtsü dolo apighi no amqükiniue. Pa no totimi vilo pi, “Kuchou no Alhou ye nokujo vilo, ‘Nokujo ye aghutu lo kiu sübo lonomu chukevilo’ ipi keshea?”

² Totimi huno apighi vilo pi, “Nokujo ye aghutu lo axathibo akeqo xathi chulu nanie,

³ ikemu Alhou no pi, ‘Nokujo ye aghutu mta lo axathibo akeu xathi ye chukevilo, tike kumono tipau bu kevilo, tishimo aye thive nani.’”

⁴ Ikemu apighi no atotiu vilo pi, “Mtsüqheino nokujo ye thimo nani.

⁵ Kughengu Alhou no ithi anike kughou nokujo no hipau chuni keno, nokujo nhethi ye khaqhive nani, eno nokujo ye Alhou toi, akivi ngo alhoksa ithive nani.”

⁶ Ikehu kughou atotiu no asübo huye achuqupu kivi, anhethi lo jukighilepu, eno alokütsü shilu kepu anie pi ithulu keno, li no tipau xathi ikhipe chuve, eno hami ikhipe li kimi, khuu ghi li gholo ngo akeno tsü, eno pa no chuve.

⁷ Tithiu pama nhethi xükhove, eno pama ye aphikümsa shi akeu ithive. Pama no mubuni jikime küqhano nhapuve.

⁸ Atsala kümtsha dolo Ampeu Alhou no aghutu lo cheghi keu sütsa pama no chilu, eno timi ngo pa nipu pama ye aghutu lo asüboqo dolo Ampeu Alhou zütshüve.

⁹ Ikemu Ampeu Alhou no timi kuno pa vilo pi, “No ye khile ani kea?”

¹⁰ Eno pa no pi, “Ni ye aghutu lo O sütsa chilu no msave, kughengu ni ye aphikümsa shi ani kehu itshüve ke.”

¹¹ Pa no pi, “Khuu no no ye aphikümsa pi o vilo pi kea? No ye I no o vilo chu kevilo pi azah tsükeu sübo lono chuve keshea?”

¹² Timi huno pi, “Nono I gholo ngo peniye tsükeu totimi huno asübo tipau xathi I tsüno ni ye chuveke.”

¹³ Tileno Ampeu Alhou no totimi vilo pi, “No ye hi ye kiu shive akea?” Totimi huno pi, “Apighi no I pishiqhive, eno ni ye chuveke.”

¹⁴ Ampeu Alhou no apighi vilo pi, “Nono hipau shiveke ghenguno, tüghashi tikishi kümtsü nguno alau no ye müsüinivae, o pono kiyi ghi no ye itiwuni, eno o küxü kupuju no ye ayeghimkhu chuni.

¹⁵ Atotiu ngo nokujo dolo eno o nuli ngo li nuli dolo I no kimthikile keu sütsüni; pa no o kütsü chisheda nani, eno nono pa phitsü mighi nani.”

¹⁶ Totimi vilo Pa no pi, “I no mtsüqheino o punu küsü küghüsüve tsüni; no ye aküsü lono atianuli punu nani. Tishimu nono o kimi jumine nani, eno pa no o shou ayepe nani.”

¹⁷ Adam vilo Pa no pi, “Nono o nipu tsau inive no asübo khikhi, ‘No ye hipau lono chu kevilo,’ ipi I no azah o tsü keno, tipau xathi chuveke ghenguno, ayeghi ye o ghenguno müsüinivae; o küxü kupuju no ye aghime shi mlano chuniae;

¹⁸ tipau lono asahu ngo ashuyebo o ghenguno ipeghi nani; no ye aluza lo atsüni chu nani.

¹⁹ Nono ayeghi lo idewo moke kutolo o tsünhizü o gi lono ijiqi ghi no ye achuqupu chuni, kughengu tipau lono o lhophe; kughengu no ye ayeghimkhu eno ayeghimkhu lo idewove nani.”

²⁰ Timi huno pa nipu je Eve kuvetsü, kughengu li ye aküxüküa kümtsü paza ke.

²¹ Eno Ampeu Alhou no Adam ngo pa nipu pama ghenguno ashiyiko phimini mla tsü eno pama pipe.

²² Tishino Ampeu Alhou no pi, “Julo, timi huye akivi ngo aküsa ithikeu lo ningu paphi shivae. Pa no itaghi pa u chhopuwo aküxüpu sübo lono xope chuve, eno pülhapuju xü auve nosae—”

²³ tighenguno ayeghi khipau lono pa lhophe keno tipau mlaphe peniye Ampeu Alhou no Eden ghutu lono pa puwuve.

²⁴ Pa no Timi hu hapheve, eno aküxüpu sübo laghi khekuto penike Pa no cherubim eno amiküiqü zütakikihi pesü Eden ghutu kipelau qhive.