BOTHUBO 27 - Sumi Naga CL (Re-edited) Bible (BSI)

Isaac no Jacob Kümghatsü

¹ Isaac no kitemi shive kethiu pa nhethi zamemeive kehu pa ye ithumlauve, pa no pa nu akichiu Esau kuno pa vilo pi, “I nu,”; eno pa no khochile, “Ni hile ani.”

² Pa no pi, “Julo, ni ye kitemi shivae; ni ye I kithi tsala mthae.

³ Tighenguno itehi, o ghünanu ikhilulo, o leghubo eno ow shexilika ikhilulo, eno aluza lo I ghenguno ashi hawulo,

⁴ eno I ghenguno achuqupu kivi, I no kimiye cheke toi kutope I no chukepu shi I lau süghilo, tishianguno I no thimphi lono I ngulho no o kümgha tsüni.”

⁵ Kughou Isaac no pa nu Esau pütsa akeno Rebekah ye iniae. Ikehu kughou Esau no aluza lo ashi süghini ye hawuve keno,

⁶ Rebekah no li nu Jacob vilo pi, “O pu no o mu Esau pütsa aghikeu I no chilue,

⁷ ‘I ghenguno ashi hasüghi no achuqupu kivi I sala kutolo, tishi aye I no tipau chuni eno I no thimphi lono Ampeu zülono o kümgha tsünie.’

⁸ Tighenguno I nu, itehi I no azah tsü aketoi I tsa lulo.

⁹ Lhoxü loji lo wuno ane lhothe akivi kini I lau süghilo, tishiaye I no tipaqo pesü achuqupu kivi, o pu no kimiye cheke toi, pa ghenguno kuto tsüni.

¹⁰ Eno no ye tipau pesü o pu pelo chu penike pewulo, tishiaye pa no thimphi lono o kümghatsü nani.”

¹¹ Ikemu Jacob no paza Rebekah vilo pi, “Julo, I mu ye amhi ghoghoi kemi, ikemu ni ye müdüniyi kemie.

¹² I pu no I kunhuju no ithive luvi, eno ni ye pa thaigha ake toive nani, eno kükümgha lakhi kumono angusü I shou ikughive nanie.”

¹³ Pa za no pa vilo pi, “I nu, o ngusü ye I shou ikughive peni; I tsa likhi lulo, wuno tipaqo I lau süghilo.”

¹⁴ Ikehu pa no wuno tipaqo ikhiluve, eno pa za lau süghi, eno pa pu no kimiye cheke toi, pa za no achuqupu kivi kuto tsü.

¹⁵ Tishino Rebekah no li nu akichiu, Esau phimini akiviu khikhi li kilo akeno tipaqo ikhipe li nu ayitiu pipeve.

¹⁶ Eno ane lhotheqo yiko pesü li no pa u eno pa kuo müdüniyi akeu lo süvetsü.

¹⁷ Eno achuqupu kivi ngo asho, khikhi li no kuto keno, tipaqo li no ikhipe Jacob u lo sütsü.

¹⁸ Ikehu pa no pa pu lau ilo no pi, “I pu.” Eno pa no pi, “Ni hile ani. No ye khuu kea, I nu?”

¹⁹ Jacob no pa pu vilo pi, “Ni ye Esau, o nu anoghiu ke. Nono I vilo pi ketoi, I no ashi süghi anie; ithu iqa no I no ashi halu keu chulo, tishino o ngulho no I kümgha tsü penie.”

²⁰ Ikemu Isaac no pa nu vilo pi, “I nu, kishino no ye paikhavi no ti ithuluve kea?” Pa no khochile, “Kughengu Ampeu o Lhou no tokulu I tsüke.”

²¹ Tithiu Isaac no Jacob vilo pi, “Kimiyeno I kupunu ighilo, tishino no ye kuchou no I nu Esau kemo keno I no o kunhuju no ithinie I nu.”

²² Ikehu Jacob no pa pu Isaac kupunu wu, Isaac no pa kunhuju eno ithive no pi, “Asütsa ye Jacob sütsa, ikemu au ye Esau u kena.”

²³ Eno pa ye pa michilu move, kughengu pa u ye pa mu Esau u toi ighono amhi ghoghoi bulue. Ikehu pa no pa kümghatsü.

²⁴ Pa no pi, “No ye kuchou no I nu Esau keshea?” Pa no khochile, “Iyei.”

²⁵ Tileno pa no pi, “I nu no ashi hasüghi keu chuno o kümgha tsünike ti I phivilo süghilo.” Ikehu pa no tipau pa lau süghi, eno pa no chuve; pa no atsaizü peighi tsü, eno pa no ti shove.

²⁶ Tileno pa pu Isaac no pa vilo pi, “I kupunu ighi no I mümalo, I nu.”

²⁷ Ikehu pa no kupunu ighi no pa mümae. Isaac no pa phimini xo tsüngülu no pa kümghatsü ghi pi, “Julo, I nu xo ye Ampeu no kümgha tsükeu luza xo toike!

²⁸ Alhou no atsütsü lo tsüzü eno ayeghi lo ghüma kivi, eno athi ngo atsaizü pofushi o tsü peni.

²⁹ Ashiayeqo no o qe peni eno shiyeqo no o zülo itsaqi peni. O thiküzümi shou ampeu shilulo, eno o za nuliqo pelo o zülo pishiqho peni. Khukhumu o müsüini keu ye müsüinive peniu, khukhumu o kümgha tsükeu ye müghalu peniu!”

³⁰ Isaac no Jacob kümghave tsü kemtsa, Jacob no pa pu Isaac zülono khalau ipelu mphi lono, pa mu Esau ye ashi hawu no ighi.

³¹ Pa ghi achuqupu kivi kutope pa pu lau peighi. Eno pa no pa pu vilo pi, “I pu, ithughi no o nu no ashi hasüghi keu chulo, tishino I kümgha tsülo.”

³² Pa pu Isaac no pa vilo pi, “No ye khuu kea?” Pa no khochile, “Ni ye o nu anoghiu, Esau ke.”

³³ Tileno Isaac ye ighono thüthüshi ithauve no pi, “Imaye ashi hasüghi no I lau peighi püzü no ighikumo zülono I no chuve no pa kümghave tsükeu huye khuu kea? Iyei, pa ye mügha nanie.”

³⁴ Esau no pa pu tsa chilu khavi, pa ye shishe kukhukimji shi igha qauve eno pa pu vilo pi, “I kümgha tsülo, ni ghi I kümgha tsülo, O I pu!”

³⁵ Ikemu pa no pi, “O thiküzüu no amqüshi ighi no ow kükümgha pewuvae.”

³⁶ Esau no pi, “Pa ye achipishi Jacob ipi aje kutsüke kumo? Kughengu ishi pha hi akiniu I pishiqhivae. Pa no I punuchipiu luvetsü, eno julo, itehi pa ye itaghi Iw kükümgha pewuve tsüae.” Tishino pa no pi, “No ye I ghenguno kükümgha lakhimu qhi püatsü anima?”

³⁷ Isaac no Esau khochile, “Julo, I no pa pelo o shou ampeu shivepe ae, eno I no pa thiküzümi kümtsü pa qemi shi penike tsüvae, eno athi ngo atsaizü vecheo I no pa pelo xülu peni keu shivae. Tishi aye I nu, o ghenguno ni ye kiu shitsü luni kea?”

³⁸ Esau no pa pu vilo pi, “No ye kükümgha lakhi likhimu anima, I pu? Ni ghi I kümgha tsülo, O I pu.” Esau no pa sütsa süqhe no qae.

³⁹ Tileno papu Isaac no khochile pa vilo pi: “Julo, o kungo-a ye ayeghi ghüma kivi lono putosü niae, eno kunguu atsütsü lo tsüzü launo putosü niae.

⁴⁰ O zütakikihi lono no ye xünani, eno no ye o thiküzüu qe nani; ikemu kughou nono hebideni keno paw kuokhasü o kuo lono nono hechhe nani.”

⁴¹ Kükümgha khipau pesü Isaac no Jacob kümghatsü keno tipau ghenguno Esau no Jacob mithive, eno Esau no pa ampi vilo pi, “I pu ghenguno mloqa kepu tsala ye kupunu wocheae; tithiu ye I no I thiküzüu Jacob heqhiveni.”

⁴² Ikemu Rebekah nu anoghiu Esau tsa li vilo pive. Ikehu li no anu ayitiu kupuwu no pa vilo pi, “Julo, o mu Esau ye o heqhive niye kughu keu lono pa lopiqilu ani.

⁴³ Tighenguno I nu, itehi I tsa lulo. Ithu Haran lo I peu Laban lau povelo,

⁴⁴ eno o mu xukighide tave moke kutolo, pa gholo ado hami ngove lo—

⁴⁵ o mu mlokighide o launo ashekha shive moke kutolo, eno nono pa lau kiu shive keno pa no kümsümave moke kutolo tilau aghilo. Tithiuno I no timi khami puwuni eno tilauno o saighini. Kushiye ni ye atsala lakhi lono nokujo kinikujo pühaveni kea?”

⁴⁶ Tishino Rebekah no Isaac vilo pi, “Hittimi totimi ghenguno ni ye I küxü azüzüvae. Tsala Jacob no aphughi hipau lo Hittimi totimi lakhi luve aye, I ghenguno I küxü ye kiu akivi anani kea?”