BOTHUBO 25 - Sumi Naga CL (Re-edited) Bible (BSI)

Abraham Kithi eno Pa Kughuko

¹ Abraham no anipu kütau luve, li je ye Keturah.

² Li no Zimran, Jokshan, Medan, Midian, Ishbak eno Shuah punue.

³ Jokshan no Sheba ngo Dedan pama papu. Dedan nuli no Asshurim, Letushim eno Leummim.

⁴ Midian nuli no Ephah, Epher, Hanoch, Abida, eno Eldaah. Hipaqo kümtsü Keturah nuliqo ke.

⁵ Abraham no pa no pighi akeu kümtsü Isaac tsüve.

⁶ Ikemu pa nipu amishiu nuliqo lau ye Abraham no agho jeli tsü, eno pa no xüaphi lono panoqo pesü pa nu Isaac launo putosüu kipela ghakhu küdau puwuve.

⁷ Abraham küxü mpe ye hike, ampe 175.

⁸ Abraham ye akivishi kitemi shino atuthu kishekhave.

⁹ Pa nu Isaac ngo Ishmael pama no Hittimi Zoar nu Ephron luza, Mamre kipelau Machpelah tuki lo pa shiqhove,

¹⁰ ti ye Abraham no Hittimi launo qhüluve keu luzake. Abraham ye tile pa nipu Sarah kumo phivilo shiqhove.

¹¹ Abraham no thive kethiu Alhou no pa nu Isaac kümghatsüe. Eno Isaac ye Beer-lahai-roi lo xüsüve.

¹² Abraham nu Ishmael, khuu Egyptmi Hagar, Sarah qeliu no Abraham lau punu tsü keno, pa tikughuko ye hipaqo ke.

¹³ Hipaqo no Ishmael nuli jeqo, panongu punu keu pasü lono aje: Nebaioth, Ishmael nu anoghiu; eno Kedar, Adbeel, Mibsam,

¹⁴ Mishma, Dumah, Massa,

¹⁵ Hadad, Tema, Jetur, Naphish eno Kedemah.

¹⁶ Hipaqo no Ishmael nuli eno panoqo je, ti ye pano phu eno aghüna, kükapumi chighikini pano shiaye kiqi lono ke.

¹⁷ (Ishmael küxü mpe ye hike: ampe 137.)

¹⁸ Panongu ye Havilah lono Shur, khikhi Egypt ghüngü lo Assyria küdau ani keno, tipa kutolo küghünauve. Pa ye pa sholokumi kümtsü mjochile ghi küghünauve.

Esau ngo Jacob Punu

¹⁹ Isaac tikughukomi no hipaqo: Abraham no Isaac papu,

²⁰ eno Isaac no ampe lhobidi shi akelono Arameami Laban pafo, Rebekah, Paddan-aram lo Arameami Bethuel nonga, pa nipu shinike luve.

²¹ Isaac no pa nipu ghenguno Ampeu vilo inikhu, kughengu li ye anuhami ke. Eno Ampeu no pa kighini khochile tsüno pa nipu Rebekah ye mishive.

²² Anu pama ye li po lono kumgho kile thuve, eno li no pi, “Tsala hi no ishi kepu shi aghi aye, kushiye I lau hipau shi ani kea?” Ikehu li no Ampeu lau ighiju niye wu.

²³ Ampeu no li vilo pi, “Shiye kini o polo ani, eno ashiaye kini o lolo akeu ye kijethave nani; lakhi no lakhiu nguno akumtou shive nani, akichiu no ayitiu qe nani.”

²⁴ Kughou pununi keu tsala kupuve keno, julo, li polo kinikishe aghive.

²⁵ Atüghüu no huchuyi ipeghi, pa phiau kümtsü amhi hebephi lakhi toi, ikehu panongu no pa je Esau kuvetsü.

²⁶ Tithiu pa thiküzüu no pamu phitsü tsüqüpe ipeghi, ikehu pa je Jacob kuvetsü. Kughou Ii no pama punu keno, Isaac ye ampe lhotsügho shiae.

²⁷ Kughou anu pama no thuwuve keno, Esau ye ashiküha lo shitsa shi ipeghive, eno Jacob ye iqünhei kemi lakhi, aphiki lo ngo ache.

²⁸ Isaac no Esau kimiye che kughengu pa ye Esau no ashi yipughi keu chuche, ikemu Rebekah no Jacob kimiye ache.

Esau no Apunuchipiu Jechuve

²⁹ Ghulo lakhi Jacob no ayekulho lho akelo, Esau ye aluza lono ighi eno pa ye amzü no thiqhivae.

³⁰ Esau no Jacob vilo pi, “I pelo huchuyi keu yekulho hipau chulu pelo, kughengu ni ye amzü no thiqhivae!” (Tighenguno pa je ye Edom kuve tsüe.)

³¹ Jacob no pi, “Itehi o punuchipiu I vilo jevelo.”

³² Esau no pi, “Ni ye thivenike shivae; apunuchipiu ye I ghenguno kiu ala ani kea?”

³³ Jacob no pi, “Itehi I vilo ashoqhi shilo.” Ikehu pa no pa vilo ashoqhi shive no pa punuchipiu Jacob vilo jesüve.

³⁴ Tithiu Jacob no asho eno ayetsüni yekulho Esau tsüve, eno pa no chushove no ithu pa la lo wuve. Ikehu Esau ye pa punuchipiu thaighave.