BOTHUBO 23 - Sumi Naga CL (Re-edited) Bible (BSI)

Sarah Thive eno Qhove

¹ Sarah ye ampe 127 xü.

² Li ye Canaan yeghi lo Kiriath-arba (ti ye Hebron) lono thive, Abraham no wuno Sarah ghenguno mloqae.

³ Abraham no akumo-a lono puthugho luve no Hittimi vilo pi,

⁴ “Ni ye kupokichemi eno nongu gholo inami; akumo kuqho-a ghenguno nongu mheghi lakhi I tsülo, tishianguno I no Iw kithimi shiqho luni.”

⁵ Hittimi no Abraham khochile,

⁶ “Ningu tsa inilo, I mpeu; no ye ningu gholo Alhouw kükapumi lakhie. Ningu kumoki akiviu lo ow kithimi shiqholo. Ningu khunomu o launo ni kumoki süchilepe o tsümove keu shimo nani.”

⁷ Abraham no puthugho no Hittimi, aphughi lo timiqo zülo itsaqi.

⁸ Eno pa no panoqo vilo pi, “Tsala nongu no I pelo akumo qholu penike pulo aghi aye, I tsa ini tsülo eno I ghenguno Zohar nu, Ephron qhüiniju tsülo,

⁹ tishianguno pa no pighi akeu Machpelah tuki khikhi pa luza shekichi lo ani keno tipau I tsü penie. Nongu nhethe lono akumoki ghenguno amheghi lakhi shi ame lono I tsüve pelo.”

¹⁰ Ephron ye Hittimi gholo iqa ae, eno pa no mishighüna khagho lo Hittimi akeqo kümtsü zülono Abraham khochile,

¹¹ “Moe, I mpeu, I tsa ini tsülo: I no aluza o tsüveni, eno tile atuki akeu o tsüveni. Iw timi nuliqo zülono I no tipau o tsüve anie. Nono kithimi shiqho lulo.”

¹² Tileno Abraham no aphughi lo timiqo zülo pishiqho.

¹³ Eno pa no aphughi lo timiqo zülono Ephron vilo pi, “Ikemu tsala nono pulo aghi aye, I tsa ini tsülo: I no aluza me o tsüvenie. I launo tipau ikhilu tsülo, tishianguno I no kithimi shiqho lunie.”

¹⁴ Ephron no Abraham khochile,

¹⁵ “I mpeu, I tsa ini tsülo: ayeghi ye ghükayi ahu bidi me qhemike, ti ye nikujo dolo kiu pi ania? Nono kithimi shiqho lulo.”

¹⁶ Abraham no Ephron tsa inive, eno Ephron no Hittimi zülono ame piqhive keu kiqi lono Abraham no ghükayi ahu bidi, ti ye lhidimi kimghipu kiqi lono mighipe tsüve.

¹⁷ Ikehu Machpelah lo Ephron luza khikhi Mamre kipelau akeno tile atuki eno asüboqo akeu tipaqha kümtsü

¹⁸ Hittimi khunoqo mishighüna khagho lo ighi akeno panoqo zülono Abraham lau amheghi lakhi shi ikhipe tsüve.

¹⁹ Tithiu Abraham no Canaan yeghi lo Mamre (ti ye Hebron) kipelau Machpelah luza lo atuki akeu lo pa nipu Sarah shiqhove.

²⁰ Aluza eno tile atuki akeu ye Hittimi no Abraham lau amheghi lakhi shi akumo kuqho-a shi penike tsüve.