BOTHUBO 22 - Sumi Naga CL (Re-edited) Bible (BSI)

Isaac pesü Aghashi

¹ Hipa thiu Alhou no Abraham peju no pa vilo pi, “Abraham!” Pa no pi, “Ni hile anie.”

² Alhou no pi, “O nu lakhi likhi akeu Isaac, khuu nono kimiye cheni keno, pa sasü Moriah yeghi lo wulo, eno tilau naghuto lakhi khikhi I no o piyeni keno tileno pa pesü akipti kümllagho shi tsülo.”

³ Ikehu Abraham no inaqhe itheno ithuve no paw khurgha anhemgha xapipe, eno pa gholo apumi kini eno pa nu Isaac ishi sasü wuve. Akipti kümllagho ghenguno asü ghepuve no Alhou no khipa-a pa piye keno tilau wuve.

⁴ Atsala aküthüni Abraham no pa nhethi tsüpukupe jukelo a-a hu putou no ithulu.

⁵ Tileno Abraham no paw apumi pama vilo pi, “Hile khurha gholo ngo aghilo; anu nikujo no hule wuno mllave no ideighini.”

⁶ Abraham no akipti kümllagho ghenguno asü pesü pa nu Isaac xapipeve. Eno pa no ami ngo azüta pa u lo peluve. Tishino pama ye kümtsa wuve.

⁷ Isaac no pa pu Abraham vilo pi, “I pu!” Pa no pi, “Ni hile ani, I nu.” Isaac no pi, “Julo, ami ngo asü ye ani kemu akipti kümllagho ghenguno ambe khile ani kea?”

⁸ Abraham no pi, “I nu, Alhou no akipti kümllagho ghenguno ambe tsü nani.” Ikehu pama no kümtsa wuve.

⁹ Kughou pama no Alhou no kichetsü keu-a lo ighive keno, Abraham no tilehi akümlla-khache shiqhe no asü kithipe qhive eno pa nu Isaac tsüghave no akümlla-khache lo asü shou bepe qhive.

¹⁰ Tishino Abraham no pa u chhope pa nu ghiqhive niye azüta ikhiluve.

¹¹ Ikemu Ampeu kungumi no atsütsü lono pa kuno pi, “Abraham, Abraham!” Pa no pi, “Ni hile ani.”

¹² Pa no pi, “O nu shou o u be kevilo momu pa lau kiumu shi kevilo, kughengu nono I launo o nu lakhi likhi akeu süchile move keu ithulu kelo no ye Alhou sümsa chenie pi itehi ye I no ithivae.”

¹³ Abraham no pa nhethi tsüpuku jukelo pa thiu ambetsü lakhi atsünipho lo akibo künakufupe aghi. Pa no wuno ambetsü pesü pa nu züqhulo akipti kümllagho shi tsüve.

¹⁴ Ikehu Abraham no tipa-a pesü, “Ampeu no tsü nani,” ipi kuvetsü; ishi kutolo hitoi pi cheni, “Ampeuw naghuto lono ti tsü nanie.”

¹⁵ Ampeuw kungumi no atsütsü lono akiniu Abraham ku

¹⁶ eno pi, “I no I je kuno ashoqhi shivae, ipi Ampeu no asheshu, kughengu nono o nu lakhi likhi akeu süchile mono hi shive akehu,

¹⁷ I no mtsüqheino o kümgha tsüni, eno mtsüqheino atsütsü lo ayepu ngo azüghimkü lo asaye toi o tikughuko kighishe tsüni. Eno o tikughukomi no pa ghümiqo khagho khasü luve nani,

¹⁸ o tikughuko vecheo ayeghi lo shiye kümtsü no müghalu nani, kughengu nono I gholuke.”

¹⁹ Ikehu Abraham ye paw apumi pama lau ideighive no panongu kümtsa Beersheba lo wuve. Abraham ye Beersheba lo küghüna ache.

²⁰ Hipa thiu Abraham vilo ishi pi, “Julo, Milcah ghi o thiküzüu Nahor lau anuli punuve tsüae:

²¹ Pa nu anoghiu Uz, pa thiküzüu Buz, Aram papu Kemuel,

²² Chesed, Hazo, Pildash, Jidlaph, eno Bethuel.”

²³ (Bethuel ye Rebekah papu.) Milcah no pano tache Abraham thiküzüu Nahor lau punu tsü.

²⁴ Tinguno alau pa nipu amishiu, khuu je Reumah keno, li no Tebah, Gaham, Tahash eno Maacah punu tsüe.