BOTHUBO 21 - Sumi Naga CL (Re-edited) Bible (BSI)

Isaac Punu

¹ Ampeu no piqhi ketoi, Pa no Sarah xuju, eno Pa no ashoqhi shi ketoi Sarah lau mlatsüe.

² Sarah ye mishipu luve eno Abraham no kitemi shive kethiuno Alhou no piqhi püakeu do ghuloki lono anu lakhi punu.

³ Abraham no pa nu, khuu Sarah no punu keno, pa je Isaac kuvetsü.

⁴ Kughou pa nu Isaac no atsala tache shi akeno, Alhou zakütsü kiqi lono Abraham no pa phighüyiko ghavetsü.

⁵ Pa nu Isaac punu kelo Abraham ye ampe aqhe shiae.

⁶ Eno Sarah no pi, “Alhou no I pelo nu lupe; kughengu khukhumu hi chilu keu ye I gholono nu nani.”

⁷ Li no pi, “Khuu no Abraham vilo Sarah ye anuli saputhu nanie piluni che kea? Ikeghi pa no kitemi shive kethiuno I no anu pa lau punu tsüe.”

Alhou no Hagar ngo Ishmael Süsho

⁸ Anu no thuwuve eno pa khoveke tsalani Abraham no aghulhu kije shie.

⁹ Ikemu Egyptmi Hagar no Abraham lau punu tsükeu anu huno nu aghikeu Sarah no ithulu.

¹⁰ Ikehu li no Abraham vilo pi, “aqüaxeu atopuu hipau li nu gholono hapheve lo, kughengu aqüaxe topuu hipau nu ye I nu Isaac gholo amheghi ighi monani.”

¹¹ Abraham ye pa nu vehu ghenguno ighono pa loshipüsüve.

¹² Ikemu Alhou no Abraham vilo pi, “Anu ghenguno eno o qüaxeu atopuu ghenguno aloqimo no akevilo. Sarah no o vilo kiu piani keno titoi shilo, kughengu Isaac vecheo o tikughuko kihi nani.

¹³ I no aqüaxeu atopuu nu ghi shiye lakhi shitsü nani, kughengu pa ye o tikughuko ke.”

¹⁴ Ikehu Abraham no inaqhe itheno ithu asho ngo azü hughi pesü Hagar bighi lo anu gholono xipipeve no li puwuve. Li ye cheve no Beersheba sayeqha lo itsü wuve.

¹⁵ Kughou ahughi lo azü kühave keno, li no atsünipho qholo anu qhive.

¹⁶ Tishino li no shexilika kapuwulu kepu qhemi lo wuno aghüngü lo iqave, kughengu li no pi, “Ni ye anu kithi ju amlae.” Li no anu ghüngü lo iqa no asütsa süqhe ghi qae.

¹⁷ Eno Alhou no anu sütsa chiluve eno Alhouw kungumi no atsütsü lono Hagar kuno pi, “Kiu no o pünaqhi ani kea, Hagar? Msa kevilo, kughengu anu no ngo akeu-a lono Alhou no pa sütsa chiluve tsüae.

¹⁸ Ithulo! Anu khape lulo, eno o u no mtotoi pa khapelo, kughengu I no pa pesü shiye kije shitsü nani.”

¹⁹ Tishino Alhou no li nhethi khaqhitsü, eno li no azükhe lakhi ithulue. Li no wuno ahughi lo azü shepichhi luve no azü anu piyeve.

²⁰ Alhou no anu gholo ae, eno pa ye thuwuve. Pa ye asayeqha lo ache eno shexilika kipe lo shitsa shive.

²¹ Pa ye Paran sayeqha lo ache, eno paza no Egypt yeghi lono anipu lakhi pa ghenguno luvetsü.

Abimelek sasü Visho shi

²² Tipa ghuloki lo Abimelek ngo paw ghüshimi zatsüu Phicol pama no Abraham vilo pi, “Alhou ye nono shikeu kümtsü lo o gholo ani.

²³ Tighenguno itehi hileno no ye Alhou jelono ni eno I laghami eno I tikughuko pishiqhi moni, ikemu I no kimiyeqhiyi o lau mla ketoi, no ghi I lau eno ayeghi khile nono inami shi ani keno tipau kimiyeqhiyi nipi I lau tushoqhi lo.”

²⁴ Eno Abraham no pi, “I no tushoqhini.”

²⁵ Kughou Abraham no Abimelek vilo pa qemi no azükhe süxa luve tsükeu muchho keno,

²⁶ Abimelek no pi, “Khuu no hipau shi keno ni ye mthae; no ye I vilo pimoe, eno ni ye ishi kutolo hi chilu mphie.”

²⁷ Ikehu Abraham no ambe ngo amshitsü hasawo Abimelek tsüno pama visho shive.

²⁸ Abraham no atsü-aqu loji lono ambeti tsüni hathape qhie.

²⁹ Abimelek no Abraham vilo pi, “Ambeti tsüni nono hathape qhipüa keu kiqi ye kiu kea?”

³⁰ Pa no pi, “Ambeti tsüni hipaqo nono Iw lono ikhilu tsülo, hipau no I no azükhe chhu kepi I ghenguno thopi shipelo.”

³¹ Ikehu tipa-a pesü Beersheba ipi kutsü, kughengu tileno pama no ashoqhi shike.

³² Ikehu pama no Beersheba lono puloshoqhi shie. Tishino Abimelek ngo paw ghüshimi zatsüu Phicol pama ye ithu no Philistia yeghi lo idewove.

³³ Abraham no Beersheba lo tamarisk bo lakhi shosü eno tileno Ampeu, Shekhaha Lhou sheqhe.

³⁴ Abraham ye Philistia yeghi lo ado kushuo inami shi itsüche.