BOTHUBO 20 - Sumi Naga CL (Re-edited) Bible (BSI)

Abraham ngo Abimelek

¹ Tilauno Abraham ye Negeb ghakhu küdau itsüsü wuve eno Kadesh ngo Shur dolo ngove; pa ye Gerar lo inami shi ado hami ngove.

² Abraham no pa nipu Sarah pesü, “Li ye I chepu” ipive. Ikehu Gerar kükau Abimelek no timi hami puwu no Sarah sawuve.

³ Ikemu Alhou no putho lo asamou no Abimelek lau ighi no pi, “Julo, nono totimi khuu luve akeno li ghenguno no ye kithimi shivae, kughengu li ye kütami nipu ke.”

⁴ Abimelek ye li lau wumono ae. Ikehu pa no pi, “Ampeu, No ye pimihami pithiveni keshea?

⁵ Pa ye I vilo, ‘Li ye I chepu’ ipike kumo? Eno li ghi, ‘Pa ye I mu’ ipi li ampi no pie. I mlo lo akikhi eno I u lo akipimi kühakeu lono ni ye hipau shivae.”

⁶ Tileno Alhou no asamou no pa vilo pi, “Iyei, no ye o mlo lo akikhi akeu lono shivae pi I no ithi ani, eno I shou axine shipe moniye I no o küghütshüve ke. Tighenguno I no o pelo li bupe move.

⁷ Ikehu itehi, timi nipu hu tsüchileve lo, kughengu pa ye tungkupu ke pa no o ghenguno inikhu tsü nani, eno no ye xülu nanie. Ikemu tsala nono li tsüchile moaye, no eno o gholo akeqo kümtsü mtsüqheino thive nanie pi ithilo.”

⁸ Tighenguno Abimelek no inaqhe itheno ithuve no pa qemi kümtsü kuno panoqo vilo hipa vehu kümtsü pive. Eno timiqo ye ighono msave.

⁹ Tileno Abimelek no Abraham kuno pa vilo pi, “No ye ningu lau kiu shive akea? Eno ni ye o lau kiu xine shivepi no ye ni eno I kükaqha shou axine kije süghi ani kea? No ye I lau shimo kepu kümla shivae.”

¹⁰ Eno Abimelek no Abraham vilo pi, “No ye kiu ithulu keno hitoi shi kea?”

¹¹ Abraham no pi, “I no tishive keu ye ishi kümsülu kehue, ‘Hipa-a lo ye Alhou sükümsa küha mithe, eno panongu ye I nipu ghenguno I heqhive nanie.’

¹² Tinguno alau, li ye kuchou no I chepue, I za vecheo kumo kemu I pu nonga, eno li ye I nipu shive.

¹³ Kughou Alhou no I pu ki lono I pelo itsü wuvepe keno, I no li vilo pi, ‘Kimiyekini hipau no ye I lau shi masae: khile khilemu ningu no ighi keu-a lo, “Pa ye I mu” ipilo.’”

¹⁴ Tithiu Abimelek no ambe ngo amshitsü, aqemi kiptimi ngo totimi pesü Abraham tsü, eno pa nipu Sarah pesü pa tsüchileve.

¹⁵ Abimelek no pi, “Julo, I yeghi ye o zülo ani; khile khilemu nono pulo keu lo ngolo.”

¹⁶ Sarah vilo pa no pi, “Julo, I no o mu lau ghükayi 1,000 tsüvae. Tipau ye o gholo chekemi kümtsü nhethe lo no ye akipimi kühae pikeu michipu ke, eno kümtsü nhethe lo no ye achipie pikeu kiqike.”

¹⁷ Tishino Abraham no Alhou lau inikhu, eno Alhou no Abimelek eno pa nipu ngo totimi aqemi ghi shipivi tsüe, tishikeu lono panongu ghi atianuli punulue.

¹⁸ Kughengu Abraham nipu Sarah ghenguno Ampeu no Abimelek kilo atita kümtsü lakhave tsüke.