BOTHUBO 2 - Sumi Naga CL (Re-edited) Bible (BSI)

Atsala Akütsüniu, Alhou no Akulhoqhi

¹ Ikehu atsütsü ngo ayeghi, eno tilehi akeu kümtsü mlaqhive.

² Eno atsala akütsüniu loye Alhou no kiu mla akeno qhoi mlaqhive, eno Pa no atsala akütsüniu loye Pa kümla lono akulhoqhive.

³ Ikehu Alhou no atsala akütsüniu kümghatsü eno tipau pesü akimthe shitsüe, kughengu tipau tsala lono Alhou no pulhoküsü kümla kümtsü tave no akulhoqhilu ke.

Kiptimi ngo Totimi Pulhoküsü

⁴ Hino Ampeu Alhou no atsütsü eno ayeghi lhophe kelono tipaqo ikoighi keu ke.

⁵ Aluza lo asübo tsüni no ayeghi lo ipeghi moke züu, eno küghüyezü lhoipeghi moke züu—kughengu Ampeu Alhou no ayeghi shou tsüghu puku pemono ae, eno achhigha hokideni kemi timi kühano

⁶ akimhi no ayeghi lono ipeghi no achhigha shou zapuku ake—

⁷ tileno Ampeu Alhou no achhigha lono ayeghimkhu pesü timi kughulho eno pa nigipe lo aküxüpu tuthu shesü tsü, eno timi huno aküxüküa lhoxü shive.

⁸ Ampeu Alhou no kipelau Eden lo aghutu lakhi qhitsüno Pa no timi khuu lhophe keno tile qhive.

⁹ Ampeu Alhou no asübo jeli khikhino aloqiqhiyi ithulu kepu eno achuqupu ghenguno alo kepu keno, kümtsü achhigha lono lhoipeghi lupe. Aküxüpu eno akivi ngo alhoksa kighithi sübo no aghutu mta lo ae.

¹⁰ Aghutu zapütsü nike ghenguno Eden lono aghoki lakhi qoipeghi ae, eno tipau no kijethape aghoki bidi shive.

¹¹ Atüghüu je no Pishon. Tipau no Havilah yeghi, khile ameshoyi acheni keno, ti vehomxa qowu chekeu ke.

¹² Eno tipau yeghi lo ameshoyi ye aloe; bdellium ngo onyx tu ye tile ani.

¹³ Aghoki akiniu je no Gihon. Tino Cush yeghi kümtsü vehomxa qowu ani.

¹⁴ Aghoki aküthüu je no Tigris, tino Assyria kipelau qowu ani. Eno aghoki abidiu je no Euphrates.

¹⁵ Ampeu Alhou no timi hu sawo Eden ghutu mlaphepe eno jukuto penike tile qhive.

¹⁶ Ampeu Alhou no azah pa tsüno pi, “Aghutu lo akeu xathibo kümtsü nono vejoi chulu nani,

¹⁷ ikemu no ye akivi ngo alhoksa kighithi sübo loye chumoni, kughengu tipau chuke tsala lono no ye mtsüqheino thive nani.”

¹⁸ Tishino Ampeu Alhou no pi, “Timi pelo pa likhi apekeu ye aloamoe; pa sasü kümghülu kepu akukuphuu lakhi I no mlanie.”

¹⁹ Ampeu Alhou no aluza lo tüghashi kümtsü eno atsütsü lo aghau kümtsü ayeghi chhigha lono lhophe no tipaqo sasü timi huno kiu je kutsü nani keno juniye pa lau ighie. Pa no kishi aküxüküa lhoxü lakhikhi ku keno, tino pütüta je shive.

²⁰ Timi huno pichepighi, atsütsü lo aghauqo, eno aluza lo tüghashi kümtsü aje kuvetsü. Ikemu Adam ghengu ye pa sasü kümghülu kepu akukuphuu ithumlave.

²¹ Ikehu Ampeu Alhou no timi pelo zücheivepe, eno pa no zü ake lono pa kuchughi lakhi luve no ashicho pesü tipa-a jonhave tsü.

²² Eno Ampeu Alhou no timi launo akuchughi ikhiluve keu pesü totimi mlave no li sasü timi lau ighi.

²³ Tileno timi huno pi, “Aghi ghi hino I ghi, eno ashi ghi hi no I shi; Totimi ipi kuniae, kughengu li ye timi launo ikhiphelu ke.”

²⁴ Tighenguno timi lakhi ye pa puaza qhive no pa nipu sasü küghüna wuveni, eno pama ye ashi lakhi shiveni.

²⁵ Timi eno pa nipu pama ye aphikümsa shi akemu kujove moe.