BOTHUBO 17 - Sumi Naga CL (Re-edited) Bible (BSI)

Aphighüyiko kügha Puloshoqhi

¹ Kughou Abram no ampe lhotoku toku shi akeno Ampeu no Abram lau ipeghi no pa vilo pi, “Ni ye Akughushu Lhou; I zülo chechelo, eno tukutiye shikevilo,

² tishianguno Iw puloshoqhi nikujo dolo shini, eno no ye shishe kije ikowolu nani.”

³ Tile Abram no pa gi pishiqho luve. Eno Alhou no pa vilo pi,

⁴ “Julo, Iw puloshoqhi ye o gholo anie, eno no ye aqokitikhi shiyeqo papu shi nani.

⁵ O je ye Abram ipi kumoae, ikemu Abraham shiniae, kughengu I no o pesü aqokitikhi shiyeqo papu shive tsüae.

⁶ I no o pelo shishe athi pithi lupe nani, o pesü shiye kutomo kughulho nani, eno o launo kükamiqo ighi nani.

⁷ I no o Lhou eno o thiu tikughukomi Lhou shinike Iw puloshoqhi Nikujo dolo shi nani eno o thiu tiqheli kupuju lo shekhaha puloshoqhi shi nani.

⁸ No eno o thiu o tikughukomi lau nono kachena shi akeu yeghi, Canaan yeghi kümtsü I no shekhaha mheghi shi tsüve nani, eno I no panoqo Lhou shi nani.”

⁹ Alhou no Abraham vilo pi, “No eno o thiu o tikughukomi tiqheli no tiqheli kutolo Iw puloshoqhi papelo.

¹⁰ Nikujo dolo eno o thiu o tikughukomi dolo Iw puloshoqhi khikhi nono pape masa keno ti ye hike: O gholo kiptimi kümtsü aphighüyiko ghaveni.

¹¹ Aphighü lo ayiko azüu akeu ghaveni, eno tino Nikujo dolo puloshoqhi michipu shinie.

¹² Nongu dolo kiptimi khukhumu punuwo atsala tache shive keu ye aphighüyiko ghaveni. Tiqheli kupuju lo o ki lono punu keu shi aghina, o tikughukomi kumo namu inaghami ow pisa no qhüluve kemi pinamu,

¹³ khuu o ki lono punu momu ow pisa no qhülu keno kümtsü mtsüqheino aphighüyiko ghave tsüni. Tishianguno Iw puloshoqhi ye shekhaha puloshoqhi shi o philo ananike.

¹⁴ Kiptimi khukhumu aphighüyiko ghamo keu ye paw timi launo kütüta shiveni; pa ye Iw puloshoqhi hephovae.”

Isaac Punu Pikiqhitsa

¹⁵ Alhou no Abraham vilo pi, “O nipu Sarai ghenguno, no ye li pesü Sarai ipi moae, ikemu li je ye Sarah ipi kuniae.

¹⁶ I no li kümghatsü nani, tinguno alau ghi, I no li vecheo anu lakhi o tsü nani. I no li kümghatsü nani, eno li ye shiyeqo paza shi nani; li launo ashiaye kükamiqo ipeghi nani.”

¹⁷ Tileno Abraham no pa gi pishiqhope nuuve no pa likhi pa pütsa ghi pi, “Ampe aqhe shive kemi lau anu punulu nani keshea? Ampe lhotoku shive keu Sarah huye anu mishilu nani keshea?”

¹⁸ Eno Abraham no Alhou vilo pi, “Ishmael no O zülo akivishi xülu keaye lae!”

¹⁹ Alhou no pi, “Moe, o nipu Sarah no anu lakhi punu nani, eno nono pa je Isaac kutsü nani. I no pa thiu pa tikughukomi lau shekhaha puloshoqhi shi ghi pa sasü Iw puloshoqhi shi nani.

²⁰ Ishmael ghengu ye, I no o tsa chiluvae; julo, I no pa kümghave tsüae eno pa pelo shishe athi pithilu eno kughukolu penani. Pa ye yepemi chighikini papu shi nani, eno I no pa pesü shiye kije lakhi shitsü nani.

²¹ Ikemu I no Isaac, khuu Sarah no tokuu hipa ghuloki lono o lau punutsü nani keno, pa sasü Iw puloshoqhi shi nani.”

²² Kughou Alhou no pa sasü küptsa tave keno, Pa ye Abraham launo wuve.

²³ Tithiu Abraham no pa nu Ishmael eno pa ki lono punu keqo momu paw pisa no qhülu keqo, Abraham kilo kiptimi akeqo kümtsü saighi no Alhou no pa vilo pike toi, tipani no panoqo phighüyiko ghave tsü.

²⁴ Kughou Abraham no ampe lhotoku toku shi akeno pa ye tileno aphighüyiko ghae.

²⁵ Eno pa nu Ishmael no ampe chighiküthü shi akelono aphighüyiko ghae.

²⁶ Tipa tsalani no Abraham eno pa nu Ishmael ye aphighüyiko ghave.

²⁷ Kiptimi khunoqo pa ki lono punu eno pa no inaghami launo pisa no qhülu keno tipaqo kümtsü pa gholono aphighüyiko ghave.