BOTHUBO 16 - Sumi Naga CL (Re-edited) Bible (BSI)

Sarai ngo Hagar

¹ Abram nipu Sarai ye pa lau atianuli punu tsümlave. Li ye Egyptmi aqelimi lakhi Hagar ipi keu ache.

² Sarai no Abram vilo pi, “Julo, Ampeu no atianuli pununi keu lono I lakhavae. I qeliu lau wulo; tishi aye li vecheo atianuli I lau punu tsüluvi ke.” Eno Abram no Sarai tsa inive.

³ Ikehu Abram no Canaan yeghi lo ampe chighi ngove kethiu, pa nipu Sarai no li qeliu Egyptmi Hagar sawo anipu lakhi toi Abram tsüve.

⁴ Pa no li lau wu, eno li ye mishive. Kughou li no mishiuve keu ithive keno, li no li mpeliu jukünathauve.

⁵ Sarai no Abram vilo pi, “Akipimi I lau shive keu ye o shou ikughi peniu! I no o pelo valu penike I qeliu tsü, ikemu kughou li no mishi luvae pi ithi keno, li no I jukünathae. Ampeu pelo nikujo dolo xathatsü peniu!”

⁶ Ikemu Abram no Sarai vilo pi, “Julo, o qeliu ye o küka qholo anie; o pulou kiqi lono li lau shilo.” Tileno Sarai no mghachhoi li peitha, eno li ye li launo pove.

⁷ Ampeuw kungumi no asayeqha lo Shur la lo azüpuki akeu lono li ithulu.

⁸ Pa no pi, “Hagar, Sarai qeliu, no ye khilau no ighi eno khilau wucheni kea?” Li no pi, “Ni ye I mpeliu Sarai launo pocheni.”

⁹ Ampeuw kungumi no li vilo pi, “O mpeliu lau idewolo eno li qhoqhülo.”

¹⁰ Itaghi Ampeuw kungumi no li vilo pi, “I no mtsüqhei o tikughuko küghüsü tsü nani, tishikeu lono panongu ye aqokitikhi kihikha kümla shive nani.”

¹¹ Eno Ampeuw kungumi no li vilo pi, “Julo, no ye mishipu ani eno anu lakhi punu nani. No ye pa je Ishmael kutsü nani, kughengu Ampeu no o ghime chiluve tsüae.

¹² Pa ye timi ghenguno aghalo khurha toi nani, pa u no kümtsü mjochile nani, kümtsü no pa mjochile nani, eno pa ye pa bolomi kümtsü sasü aghümi shi xünani.”

¹³ Ikehu li no Ampeu khuu li pütsa keno, Pa je pesü, “No ye ithukuluu Lhou,” ipi kuvetsü, kughengu li no pi, “Kuchou no khuu no I jukuto akeno I no hileno pa ithuluvae.”

¹⁴ Tighenguno azükhe hu pesü Beer-lahai-roi ipi kuvetsü; ti ye Kadesh ngo Bered dolo ani.

¹⁵ Hagar no Abram lau anu punu tsü, eno Abram no anu je pesü Ishmael ipi kuvetsü.

¹⁶ Hagar no Abram lau Ishmael punu tsüke ghuloki lo Abram ye ampe lhotache tsügho shiae.