BOTHUBO 14 - Sumi Naga CL (Re-edited) Bible (BSI)

Abram no Lot Hakholu

¹ Shinar kükau Amraphel, Ellasar kükau Arioch, Elam kükau Khedorlaomer, eno Goiim kükau Tidal noqo ghuloki lo,

² kükami hipaqo no Sodom kükau Bera, Gomorrah kükau Birsha, Admah kükau Shinab, Zeboiim kükau Shemeber, eno Bela (ti ye, Zoar) kükau ishi sasü aghüshi.

³ Hipaqo no Siddim Khila (ti ye, Amti Züghi) lono panongu küka kumghoe.

⁴ Ampe chighikini panongu ye Khedorlaomer qe ighi, ikemu ampe chighiaküthüu lono hebide ipeghive.

⁵ Ampe chighiabidiu lo Khedorlaomer ngo kükami khunoqo pa gholo akeno, panongu no ighi no Ashteroth-karnaim lo Rephaimmi, Ham lo Zuzimmi, eno Shaveh-kiriathaim lo Emimmi,

⁶ Horimi, Seir toghi phu lono yenguyike-a ghuthu lo El-paran kutolo leluve.

⁷ Tithiu panongu no En-mishpat (ti ye, Kadesh) lo idechile ighi no Amalekmi ghakhu kümtsü eno Amorimi khunoqo no Hazazon-tamar lo küghüna ache keno, panoqo leluve.

⁸ Tithiu Sodom kükau, Gomorrah kükau, Admah kükau, Zeboiim kükau eno Bela (ti ye, Zoar) kükau noqo no wuno Siddim Khila lo aghü shiniye kumqo luve no

⁹ Elam kükau Khedorlaomer, Goiim kükau Tidal, Shinar kükau Amraphel, eno Ellasar kükau Arioch sasü aghüshi, kükami bidi no pano pungu küpüghü.

¹⁰ Siddim Khila ye tsübuta kuchhuki no chhitoi, eno Sodom ngo Gomorrah kükau noqo no poche kelo panongu khami ye tipaqo lo ikiqi ilove, eno kütamiqo ye naghuto lo aphu akeqo lo pokhave.

¹¹ Ikehu aghümi no Sodom ngo Gomorrah tinhemgha eno achuqupu kümtsü puwuve tsüno pano la lo wuve.

¹² Panongu no Abram thiküzüu nu Lot, khuu Sodom lo küghüna akeno, pa eno paw tinhemgha ghi luve tsüno cheve.

¹³ Tishino milakhi pokalu keu no ighi no Hebrewmi Abram vilo pive. Tipa ghuloki lo Abram ye Mamre lo aphisübo phivilo ache, Mamre ye Amorimi eno Eshcol ngo Aner pama thiküzüu, panoqo ye Abram sasü visho shikemie.

¹⁴ Kughou Abram no pa sholokumi küghape wuvae pi chilu keno, pa no paw timi qopheve kemi, pa ki lono punu kemi, aqolo 318 sasü Dan kutolo hawue.

¹⁵ Eno putho lono pa no paw timi amqo kütüta shi kijeve, pa ngo pa qemi no panoqo leluve no Damascus ahuu Hobah kutolo hasü wue.

¹⁶ Tishino pa no tinhemgha kümtsü pechile ighive, eno pa sholokumi Lot ghi paw tinhemgha, totimi eno timiqo gholono sachile ighive.

Melchizedek no Abram Kümghatsü

¹⁷ Abram no Khedorlaomer eno kükami pa gholo akeqo leluve no idechile ighive kethiu, Sodom kükau no pa sholu niye Shaveh Khila (ti ye, Akükau Khila) lo wu.

¹⁸ Eno Salem kükau Melchizedek no asho eno atsaizü peighi. (Pa ye Shishe Akiqheu Lhou chineu ke.)

¹⁹ Pa no Abram kümghatsü no pi, “Shishe Akiqheu Lhou, atsütsü eno ayeghi pighiu no Abram kümghatsü lo;

²⁰ eno Shishe Akiqheu Lhou, Khuu no o ghümi pesü o u lo sütsü keno, Pa sheqhelo!” Eno Abram no thokha kümtsü lo chighi lo saje lakhi pa tsüe.

²¹ Sodom kükau no Abram vilo pi, “Timiqo no I tsüve, ikemu tinhemghaqo no o sala qhiluve lo.”

²² Ikemu Abram no Sodom kükau vilo pi, “Ampeu, Shishe Akiqheu Lhou, atsütsü eno ayeghi pighiu lau I no I u peqhevae,

²³ ike ni ye ayeho tachu momu apukhuqho kütsügha kighi momu kiu kiumu ow ye lumoe, tikumo aye nono, ‘I no Abram pelo kinimi shilu peke,’ ipi nosae.

²⁴ Apumiqo no kiu chuve akeno, eno timi khunoqo I gholo ighi keno panoqo saje kumo aye, ni ye kiumu lumoe. Aner, Eshcol, eno Mamre noqo pelo panoqo saje lu pelo.”