BOTHUBO 13 - Sumi Naga CL (Re-edited) Bible (BSI)

Abram ngo Lot Kütüta shive

¹ Ikehu Abram ye Egypt lono iqhove, pa ngo pa nipu eno pa pighi kümtsü sasü Negeb lo wuve.

² Abram ye atsü-aqu, ghükayi eno ameshoyi kipighi lo ighono kinikülü shive.

³ Eno pa no Negeb lono chesü Bethel, khilehi pa no abothu lo aphiki tshü keno, ti ye Bethel ngo Ai küma dolo,

⁴ a-a khile pa no atüghü lo akümlla-khache mla keno, tilau wuve. Eno tileno Abram no Ampeu mllae.

⁵ Lot, khuu Abram gholono wu keno, pa ghi ambe ngo ane loji eno timiqo sache,

⁶ ikehu pama kümtsa küghünani keu ye ayeghi no tülalove; kughengu pamaw pichepighi ye ighono kutomo akehu kümtsa küghüna mlave,

⁷ eno Abram tsü-aqu khemi ngo Lot tsü-aqu khemi dolo mtomshu keu auve. Tipa ghuloki lo Canaanmi ngo Perizimi ye ayeghi tipau lo küghüna ache.

⁸ Tileno Abram no Lot vilo pi, “Nikujo dolo eno o tsü-aqu khemi ngo I tsü-aqu khemi dolo mtomshu ape kevilo, kughengu ningu ye abolomi ke.

⁹ Ayeghi kümtsü o zülo anike kumo keshea? I launo o kütüta shivelo. Tsala nono au piyiu luve aye, I no au ajeu wuveni, momu nono au ajeu luve aye, I no au piyiu wuveni.”

¹⁰ Lot no pa nhethi tsüpuku no Jordan Khila huye azünihoi Ampeu ghutu toi, Zoar küdau Egypt yeghi toi aghikeu ithulu. (Hi ye Ampeu no Sodom ngo Gomorrah kütsa mphi züuke.)

¹¹ Ikehu Lot no pa ampi sala Jordan Khila kümtsü kisheluve, eno pa ye kipelau wuve. Pama ye hitoi lakhino lakhi launo kütüta shive.

¹² Abram ye Canaan yeghi lo xüsüve, eno Lot no akhila lo mishighünaqo dolo xüsüve no Sodom kutolo pa phiki pekho wove.

¹³ Sodommi ye küsakügha, Ampeu shou axine kije shiche kemie.

¹⁴ Lot no pa launo kütüta shive kethiu, Ampeu no Abram vilo pi, “O nhethi tsüpukupe nono ngo akeu-a lono ahuu ngo apeu eno kipelau ngo kulolau julo,

¹⁵ kughengu nono ithulu akeu yeghi kümtsü I no alholo ghenguno no eno o polo kughukomi tsüni.

¹⁶ I no o polo kughuko pesü ayeghi lo asaye toi shi tsüni, ikehu tsala khuana no ayeghi lo asaye kihikulupu shi aghi aye, o polo kughuko ghi kihilu nani.

¹⁷ Ithulo, ayeghi hipau akijelau eno akushulau kupuju chesü wulo, kughengu I no tipau o tsüni.”

¹⁸ Ikehu Abram no pa phiki xakiqheve no wo Mamre lo aphisübo phivilo xüsüve, tipau ye Hebron lo ani, eno tile pa no Ampeu lau akümlla-khache shiqhe.