BOTHUBO 11 - Sumi Naga CL (Re-edited) Bible (BSI)

Babel Qoghe

¹ Inahuu ye ayeghiqha kümtsü lo atsa lakhi eno atsathi aphiphi shi ache.

² Timiqo no kipelau no phuthe ighi kelo, panongu no Shinar yeghi lo aqa lakhi ithulu eno tilau küghünave.

³ Panongu lakhino lakhi vilo pi, “Ighilo, ningu pititu mlani nolo, eno ami lono tsaqüi tipaqo pitini.” Panongu no atu züqhulo pititu, eno aghani züqhulo tsübuta peithae.

⁴ Tithiu panongu no pi, “Ighilo, ningu ampi no mishighüna eno qogheki lakhi, tipa kütsüqa no atsütsü ikuto mlani nolo, eno ni likhi ni juaje shini nolo, tikumo aye ningu ye ayeghi lono apanaghave nosae.”

⁵ Ampeu no mishighüna eno qogheki khikhi timi nuliqo no shiqhe keno juniye iqighi.

⁶ Eno Ampeu no pi, “Julo, panongu ye ashiaye lakhi, kümtsü atsa lakhi, eno hi ye panongu no kiu shi nani keno hukuthu likhi aphie. Panongu no kughuphe keu kiunomu pano ghenguno tokümlapu shini chemoe.

⁷ Ighilo, ningu iqi no pano tsa kübangüve tsüni nolo, tishianguno panongu lakhino lakhi tsapi vetha mlave peni.”

⁸ Tighenguno Ampeu no tilehi no panoqo pesü ayeghiqha kümtsü lo apanaghave tsü, eno panongu no mishighüna mlapishepe qhive.

⁹ Ikehu tipa-a je pesü Babel kuvetsü, kughengu tileno Ampeu no ayeghiqha tsa kümtsü kübangüve tsüke. Eno tileno Ampeu no ayeghi kümtsü lo panoqo apanaghave tsüe.

Shem Kughukomi

¹⁰ Hipaqo no Shem laghaphi. Kughou Shem no ampe 100 shi akeno, züqozü ighi kethiu ampe kini shi ake lono Arpachshad punu.

¹¹ Eno Arpachshad punuve kethiu Shem ye ampe 500 xü, eno anuli kütami kiptimi totimi ithulu.

¹² Kughou Arpachshad no ampe 35 shi akeno Shelah ithulu.

¹³ Arpachshad ye Shelah ithuluve kethiu ampe 403 xü eno anuli kütami ghi ithulu.

¹⁴ Kughou Shelah no ampe 30 shi akeno, Eber ithulu.

¹⁵ Shelah ye Eber ithuluve kethiu ampe 403 xü, eno anuli kütami ghi ithulu.

¹⁶ Kughou Eber no ampe 34 shi akeno, Peleg ithulu.

¹⁷ Eber ye Peleg ithuluve kethiu ampe 430 xü, eno anuli kütami ghi ithulu.

¹⁸ Kughou Peleg no ampe 30 shi akeno, Reu ithulu.

¹⁹ Peleg ye Reu punuve kethiu ampe 209 xü, eno anuli kütami ghi ithulu.

²⁰ Kughou Reu no ampe 32 shi akeno, Serug ithulu.

²¹ Reu ye Serug punuve kethiu ampe 207 xü, eno anuli kütami ghi ithulu.

²² Kughou Serug no ampe 30 shi akeno, Nahor ithulu.

²³ Serug ye Nahor punuve kethiu ampe 403 xü, eno anuli kütami ghi ithulu.

²⁴ Kughou Nahor no ampe 29 shi akeno, Terah ithulu.

²⁵ Nahor ye Terah punuve kethiu ampe 119 xü, eno anuli kütami ghi ithulu.

²⁶ Kughou Terah no ampe 70 shi akeno, Abram, Nahor eno Haran ithulu.

Terah Kughukomi

²⁷ Hipaqo no Terah laghaphi. Terah ye Abram, Nahor eno Haran noqo papu; Haran no Lot papu.

²⁸ Haran ye pano bolomi yeghi, Chaldeami ghakhu Ur, lono papu Terah küa lono thive.

²⁹ Abram ngo Nahor pama ye anipu luve. Abram nipu je no Sarai, eno Nahor nipu je no Haran nonga Milcah, Haran ye Milcah ngo Iscah pama papu.

³⁰ Sarai ye anuhami; li ye anuli kühano ache.

³¹ Terah no pa nu Abram, pa tilimi Haran nu Lot, pa nu Abram nipu eno pa mukishiu Sarai, ishi sasü kümtsa Chaldeami yeghi Ur lono Canaan yeghi lo wuniye cheve, ikemu kughou panongu no Haran lo ighi keno, panongu no tile xüsüve.

³² Terah mpe ye 205, eno Terah ye Haran lono thive.