BOTHUBO 1 - Sumi Naga CL (Re-edited) Bible (BSI)

Ayeghi Pulhoküsü

¹ Abothu lono Alhou no atsütsü ngo ayeghi lhoe.

² Ayeghi ye kogheküghü küha no kümsa shi aküzü no akuthoku küzüphope ae. Eno Alhou Ghungu no azü shou khonhape ae.

³ Ikelo Alhou no pi, “Aküvü alu pelo,” eno aküvü ye ipeghive.

⁴ Alhou no aküvü aloqhiyi ithulue. Eno Alhou no aküzü lono aküvü kijethave tsü.

⁵ Alhou no aküvü pesü Tsüküvü kuvetsü eno aküzü pesü Tsüküzü kuvetsü. Tino atsala atüghüu, avela eno inaqhe shive.

⁶ Tishino Alhou no pi, “Azü shou qhakuchho-a lakhi ipeghi lulo, tino kunguu eno aqhou azü akeu kijetha pelo.”

⁷ Alhou no qhakuchho-a mla eno tipau qhou azü akeu ngo tipau shou azü akeu kijethave tsü. Eno titoi ilhouve.

⁸ Alhou no qhakuchho-a pesü atsütsü kuvetsü. Tino atsala akiniu, avela eno inaqhe shive.

⁹ Tishino Alhou no pi, “Atsütsü qholo azü akeqo a-a lakhi lo hekütsü kumqo luve pelo, eno qhaike yeghi ipeghilu pelo.” Eno titoi ilhouve.

¹⁰ Alhou no qhaike yeghi pesü Ayeghi ipi kuvetsü, eno azü hekütsü kumqo luve keqo pesü Azüghi ipi kuvetsü. Eno Alhou no tipau aloqhiyi ithulue.

¹¹ Alhou no pi, “Ayeghi lo tsüni-tsüghi, athi pithilu kepu sütsüni, eno axathi khipaqo lo alothi ani keno tipaqo sübo, ajeli kiqi lono lhoipeghilu pelo.” Eno tishi luve.

¹² Ikehu tsüni-tsüghi, athi pithilu kepu sütsüni, eno axathi khipaqo lo alothi ani keno tipaqo sübo, ajeli kütüta kiqi lono ayeghi lo lhoipeghive. Eno Alhou no ti aloqhiyi ithulue.

¹³ Tino atsala aküthüu, avela eno inaqhe shive.

¹⁴ Tishino Alhou no pi, “Tsüküzü lono tsüküvü kije kütüta shinike atsütsü qhakuchho lo aküvü ipeghilu pelo. Eno tipaqo no atusho, atsala eno ampe michipu shi pelo,

¹⁵ eno ayeghi shou aküvü tsü penike tipaqo no atsütsü qhakuchho lo aküvü shi pelo.” Ikehu titoi shive.

¹⁶ Alhou no aküvü kije kini mlae—aküvü akijeu no tsüküvü tsala ghenguno eno aküvü aghulou no tsüküzü tsala ghenguno—Pa no ayepuqo ghi mlae.

¹⁷ Alhou no ayeghi lo aküvü tsüniye atsütsü qhakuchho lo tipaqo ghope qhive,

¹⁸ ti ye tsüküvü ngo tsüküzü tsala, eno aküvü ngo aküzü kijetha tsüniye ke. Eno Alhou no tipau aloqhiyi ithulue.

¹⁹ Tino atsala abidiu avela eno inaqhe shive.

²⁰ Alhou no pi, “Azü lo aküxüküa lhoxüqo pelo chokive taiqho-iqi pelo, eno aghauqo pelo ayeghi shou atsütsü qhakuchho lo yewu pelo.”

²¹ Ikehu Alhou no azüghi lo lhoxü kije, eno aküxüküa lhoxü ithakiche jeli, khikhi azü lo chokive taiqho-iqi cheni keno, tipaqo eno achishibo kupu ghauqo ajeli kiqi lono lhoe. Eno Alhou no tipaqo aloqhiyi ithulue.

²² Alhou no tipaqo kümghatsü ghi pi, “Athi pithilu no azüghi nhakha kughukolu lo, eno aghauqo pelo ayeghi lo kughukolu pelo.”

²³ Tino atsala apunguu avela eno inaqhe shive.

²⁴ Tishino Alhou no pi, “Ayeghi lo aküxüküa lhoxü—pichepighi, itikiche eno ayeghi lo tüghashi, ajeli kiqi lono lhoipeghi pelo.” Eno titoi shive.

²⁵ Ayeghi lo tüghashi, pichepighi eno itikiche kümtsü Alhou no pütüta jeli kiqi lono lhove. Eno Alhou no tipau aloqhiyi ithulue.

²⁶ Tithiu Alhou no pi, “Ningu julho eno ningu kimihi lono timi mlani nolo. Eno panoqo pelo azüghi lo akha shou, atsütsü lo aghau shou, eno ayeghi lo pichepighi ngo itikiche lhoxü kümtsü shou qhasülu penie.”

²⁷ Ikehu Alhou no Pa ampi julho lono timi pulhosü, Alhou ju kimihi lono Pa no timi pulhosü; Pa no kiptimi ngo totimi pulhosü.

²⁸ Eno Alhou no panongu kümghatsü, Pa no panoqo vilo pi, “Athi pithilu no kughukolu lo, ayeghi nhakhalu no qhasülu lo, eno azüghi lo akha shou, atsütsü lo aghauqo shou, eno ayeghi lo itikiche lhoxü kümtsü shou qhasülu lo.”

²⁹ Alhou no pi, “Julo, ayeghi lo ayetsüni lhoipeghilu kepu lothi eno alothikupu xathibo kümtsü I no nongu tsüvae. Tipaqo pesü nongu chuqupu shini.

³⁰ I no atsüni pesü aküxüpu tuthu akeu lhoxü jeli, ayeghi lo tüghashi, atsütsü lo aghau, eno ayeghi lo itikiche, kümtsü lau achuqupu shi tsüvae.” Eno titoi shive.

³¹ Ikehu Alhou no Pa no mlave keu kümtsü ithulu, eno julo, ti ye ighono alokütüe. Tino atsala akütsüghou avela eno inaqhe shive.