Apostolmi 9 - Sumi Naga CL (Re-edited) Bible (BSI)

Saul Xükikithe

¹ Saul ye Ampeu papemi pithiveni pi shikichi ae, pa no achinetou lau wuno

² Damascus sinagog lo tsüpuwu kepu yesü khu, tishianguno khuana Alaghi laumi, kiptimi na totimi namu, pa no phulu aye küghape Jerusalem lo ighi niye ke.

³ Pa no Damascus kupunuve kelo paikhavi atsütsü lono aküvü lakhino pa sümxape yeluve.

⁴ Pa ye ayeghi lo ikiqive eno asütsa lakhino pa vilo pikeu chilue, “Saul, Saul, no ye kushiye I kijipüsa ani kea?”

⁵ Saul no pi, “Ampeu, no ye khuu kea?” “Ni ye Jisü, nono kijipüsa akeu huke.

⁶ Itehi ithu no mishighüna lo ilolo, eno kiu shimasa keno o vilo pini.”

⁷ Saul gholo kichemi no asütsa chilu kemu khumu ithumla no atsa piphemla ngove.

⁸ Saul no ayeghi lono ithughi kelo pa nhethi tsükho akemu kiumu ithumlave. Ikehu panongu no au no pa sünhepe Damascus lo ighi.

⁹ Eno atsala küthü kutolo pa ye kiumu ithumlave, eno chusho move.

¹⁰ Damascus lo apapemi lakhi Ananias ae. Ampeu no kungunhetsü lono pa vilo pi, “Ananias.” Pa no pi, “Ampeu, ni hi ani.”

¹¹ Ampeu no pa vilo pi, “Ithu no Müzüchoi ipi chekeu laghi lo wuno Judas kilo Tarsusmi Saul ipikeu phuwulo, kughengu pa ye akighini shi ani,

¹² eno pa ye kungunhetsü lono Ananias ipikeu no pa lau ighi no pa nhetsü athoputho tsünike pa shou au betsü keu ithuluvae.”

¹³ Ikemu Ananias no khochile, “Ampeu, timi hipau no Jerusalem lo kishi Ow küpülümi ghime ani keno, ni ye timi kutomo launo chiluvae.

¹⁴ Eno pa ye O je kuche kemi kümtsü kügha niye achinetomi launo azah khuluvae.”

¹⁵ Ikemu Ampeu no pi, “Wulo, kughengu pa no I je pesü Jewkumomi ngo kükami eno Israelmi zülo wu penike I no kishevae.

¹⁶ Pa ye I je ghenguno khijehi ime masa keno I no pa piye nani.”

¹⁷ Ikehu Ananias no wuno aki lo ilo püzü Saul shou pa u beno pi, “Athiküzüu Saul, nono ala lo chekelo Ampeu Jisü khuu o lau ipeghi keno, pa no o nhetsü athoputho tsüno Aghungu Kimthe pesü o shepichhi penike I puwu ani.”

¹⁸ Paikhavi no kiukela akoza toike pa nhethi lono ikiqive no pa ye ithulu kitheve. Tileno pa no ithu no baptiz shive;

¹⁹ eno achuqupu chuno akumto shiluve. Atsala hami pa ye Damascus lo akhopemi gholo ae.

Saul no Damascus lo Sheshu

²⁰ Tithiu pa no mtazü sinagog lono Jisü ghili sheshu, “Pa ye Alhou Nue.”

²¹ Pa tsa chilu kemi kümtsü no akümzave no pi, “Jerusalem lo aje hipau ku aghi kemi thaqhü timi hipau no heqhi cheke kumo? Pa ye tipaqo küghape achinetomi zülo sawuni keu kimji lono hilau ighike kumo keshea?”

²² Ikemu Saul ye alau akumto shiuve, eno Damascus lo Jewmi vilo Jisü ye Khristo kepi thebei pi kelo panongu ye pa lamlave.

Saul no Damascus lono Pove

²³ Atsala kutomo thiu Jewmi no Saul pithive nike kümqü,

²⁴ ikemu panongu mqü pa no ithive. Pa pithive nike putho pucho panongu no khagho jukutoa,

²⁵ ikemu pa khopemi no putho lono ashoghi lo süno aliwo kighipe lono kighiti piqive.

Saul no Jerusalem lo Wu

²⁶ Kughou pa no Jerusalem lo ighi keno, akhopemi gholo kutupo niye shikemu kümtsü no pa msave, kughengu pa ye apapemi shivae pi panongu ye pülümoe.

²⁷ Ikemu Barnabas no pa sasü apostolmi lau ighi no panongu vilo kishi ala lo pa no Ampeu ithulu, Ampeu no pa pütsa eno tithiu pa no mtotoi Damascus lo Jisü je lono asheshu keno lhepiye.

²⁸ Tishino Saul ye Jerusalem lo panoqo gholo ipe-ilo eno ighümo no Ampeu je lono kütsü thuve.

²⁹ Pa no Greek tsa kipimi Jewmi sasü kighe, ikemu panongu no pa heqhive niye pükapütsa ae.

³⁰ Kughou athiküzümi no hi ithive keno, panongu no pa sasü Caesarea lo wuno Tarsus lo puwuve.

³¹ Judea, Galilee, eno Samaria qha kümtsü lo akukuhou ye iqüghai keu do sholu eno shikumtolu ae. Ampeu sükümsa lono chewu eno Aghungu Kimthe no shikumto keu vecheo ikowolu.

Aeneas Shikipivi

³² Peter no aqha kümtsü lo iqho-iqi chekelo, Lydda lo küpülümi lau ghi ighi.

³³ Tile timi lakhi Aeneas ipikeu aghi-anhü thive no ampe tache azüa lo ngove keu pa no ithulu.

³⁴ Peter no pa vilo pi, “Aeneas, Jisü Khristo no o shipivi ani, ithu o züa liküzüve lo.” Paikhavi pa no ithuve.

³⁵ Eno Lydda ngo Sharon lo küami kümtsü no pa ithulu, eno panongu no Ampeu lau ighive.

Dorcas Xüputhu

³⁶ Joppa lo akhopemi totimi lakhi Tabitha, pekide kelo Dorcas ipikeu ae. Li ye akümla kivi eno kumlhomi tsükinimi ke.

³⁷ Tipa ghuloki lo li ye süve no thive. Li kumo qhuve no kunguu chebo lo qhipüa.

³⁸ Joppa ye Lydda phivilo kehu akhopemi no Peter ye Lydda lo anie pi chilu kelo timi kini puwu no pi, “Kimiyeno munu kevino ni lau ighi tsülo.”

³⁹ Peter no ithu pama gholono wuve. Pa no ighi kelo pa sasü kunguu chebo lo iku. Chimemi kümtsü pa phivilo ngono mloqa eno Dorcas no panoqo gholo ache kelo mlakeu phimini pa piye.

⁴⁰ Ikemu Peter no panongu kümtsü khalau pipeve no qhoqhünhe pe inikhu, eno pa no akumo küdau tsüghü ighi no pi, “Tabitha, ithulo.” Li no anhethi tsükho, eno Peter ithulu kelo ithu iqave.

⁴¹ Pa no pa u lono li sünhe puthuve. Tishino pa no li püxüpe küpülümi ngo chimemi tsüve.

⁴² Hi no Joppa qha kümtsü lo veküpha wove, eno kutomo no Ampeu pülü luve.

⁴³ Peter ye Joppa lo ashiyiko kümlau Simon gholo ado kushuo ngove.