Apostolmi 8 - Sumi Naga CL (Re-edited) Bible (BSI)

Saul no Akukuhou Kijipüsa

¹ Saul no Stephen pithive keu lo pulo tsüe. Tipani no Jerusalem lo akukuhou kijiküpsa kije ipeghive. Apostolmi thono küpülümi kümtsü Judea ngo Samaria qhalo apanagha kuhave.

² Alhou ithitoi kemi no Stephen shiqhove eno pa ghenguno shishe mloqae.

³ Ikemu Saul no akukuhou kütsa thuve, pa no aki kümtsü lo ilo no küpülümi kiptimi totimi sünhekiti sawo akughuki lo süve.

Philip no Samaria lo Sheshu

⁴ Apanagha wuve keqo no atsa pesü kütsü thuve.

⁵ Philip no Samaria phughi lo wuno Khristo tsape sheshu.

⁶ Kughou aqokitikhi no Philip tsa chilu eno pa no amchipu kümla shikeu ithulu keno, kümtsü no amlo lakhi shino tsaqüi inie.

⁷ Kughengu timi kutomo philo mithekumo ghawu akeqo no aghügha küsashi ighasü ipeghi, aghi-anhü kithimi, eno aphiau kinita kemi shipivi ae.

⁸ Ikehu tipa phughi lo alokivi kije ae.

Küdüu Simon no Pülülu

⁹ Timi lakhi Simon ipikeu tipa phughi lo küdüu shiche eno timiqo shithüghüi no pa ampi pesü kije kepi piche.

¹⁰ Aghulou lono akiqheu kutolo pa ikhilu no piche, “Timi hipau ye Alhou küka Kije ipi chekeu ani.”

¹¹ Pa no ado kushuo lono paw küdüu pesü panoqo shithüghüi chekehu panongu no pa ikhilu che.

¹² Ikemu kughou Philip no Alhou yekipe tsakiviu eno Jisü Khristo je pesü panongu lau kütsü keno, panongu no pa pülüve, eno kiptimi totimi kümtsü baptiz shive.

¹³ Simon ghi pülüve; eno baptiz shiluve kethiu pa ye Philip gholo chewuve. Eno akümzapu ngo amchipu kümla ithulu no Simon ye akichiqhive.

¹⁴ Samariami no Alhou tsa ikhiluve keu Jerusalem lo apostolmi no chilu kelo, panongu no Peter ngo John pama puwu.

¹⁵ Pama no ighi no panongu pelo Aghungu Kimthe ikhilu penike inikhu tsü,

¹⁶ kughengu panongu ye Ampeu Jisü je lono baptiz likhi shive no akemu tikutolo Aghungu Kimthe ye panongu shou ikughi mono ae.

¹⁷ Ikehu pama no panongu shou au betsü, eno panongu no Aghungu Kimthe ikhiluve.

¹⁸ Kughou Simon no apostolmi no au betsü keu vecheo Aghungu tsükeu ithulu keno, pa no pisa pesü pama tsü,

¹⁹ eno pi, “Hipau küka ni ghi I tsülo, tishianguno I no khuu shou I u bekeno Aghungu Kimthe ikhilu peni.”

²⁰ Ikemu Peter no pi, “Ow ghükayi ye o gholono pühave peniu, kughengu no ye pisa pesü Alhouw kümsagho qhülu nanie pi kümsü anie!

²¹ Hipa tsa lo o sala momu o saje kühae, kughengu Alhou zülo o mlo ye achipi kumovae.

²² Tighenguno o lhoksa hipau lono xaidelo, eno Ampeu vilo shikulupu shi aye o mlo lo kümsüpu akeu kipimi qhivetsü penike inikhu lo.

²³ Kughengu no ye khumtsai eno axine kütsügha lo akeu I no ithulu anie.”

²⁴ Simon no khochile, “Nono pive keu lakhimu I shou ighi pemoni ke I ghenguno Ampeu vilo inikhu tsülo.”

²⁵ Pama no Ampeu tsa pesü ashepe shive kethiu, Jerusalem lo idewo chekelo Samariami phu kutomo lo atsakiviu pesü sheshue.

Philip ngo Ethiopiami Shoko

²⁶ Ampeuw kungumi no Philip vilo pi, “Ithu no Jerusalem apeu no Gaza lo wuche keu laghi lo wulo.” Hi ye asayeli ke.

²⁷ Pa no wu kelaye tile Ethiopiami lakhi cheghi, pa ye Ethiopiami kükalimi küghaki Kandake lo shoko, akinibo jukükütsü tou ke. Pa ye Jerusalem lo Alhou mllani ye ighi,

²⁸ eno paw khurkulu lo iqa no tungkupu Isaiah kaku phi ghi idewo cheghi.

²⁹ Aghungu no Philip vilo pi, “Wuno khurkulu mtsa chewulo.”

³⁰ Philip no pa lau ighi kelo pa ye Isaiah tungkupu kaku phi cheghi keu chilu, ikehu pa no iniju, “No ye kiu phi ani keno vethalu anima?”

³¹ Pa no khochile, “Khuana no I kiche tsümoke ni ye kishino vethaluni kea?” Pa no Philip vilo pa gholo iku iqa lopi ku.

³² Pa no Kuchoyesü mqo hipau phi cheghi: “Ambe toi ghikiqhi-a lo pa sawuve ambe no amhi kughou zülo inaqhoi ketoi, pa ye pa kichi xükho moe.

³³ Pa thogha kelo kuchou xakütha pa tsümoe. Khuu no pa lagha ghili pilu nani kea? Kughengu ayeghi lono pa küxü süwuve tsüke.”

³⁴ Shoko huno Philip vilo pi, “Tungkupu ye khuu ghili pi ani kea, pa ghili keo kütami ghili kea?”

³⁵ Tileno Philip no Kuchoyesü mqo hipau lono huthusü Jisü tsakiviu kutolo lhepiye.

³⁶ Pama no wuche kelo azü ake-a lo ighi, eno shoko huno pi, “Julo, azü hi ani! I no baptiz shinike kiuala no I lakha kepu anio?”

³⁷ Philip no pi, “O mlo kuchopu no pülü aghi aye, no ye tishilu nani.” Pa no khochile, “Jisü Khristo ye Alhou Nu kepi I no pülü ani.”

³⁸ Khurkulu ngolo pi pa no azah tsü, eno pama azü lo ilo püzü Philip no pa pesü baptiz shivetsü.

³⁹ Kughou pama no azü lono ipeghi keno, Ampeu Ghungu no Philip sawuve, eno shoko huye pa ithumlave kemu alokivi shi cheve.

⁴⁰ Philip ye Azotus lo aghive, eno Caesarea tomoke kutolo aphughi pa no hecheke kümtsü lo atsakiviu pesü sheshue.