Apostolmi 6 - Sumi Naga CL (Re-edited) Bible (BSI)

Akukuphumi Tsüni Kishelu

¹ Tipa ghuloki lo apapemi alau ikowove kehu Greek tsa kipimi Jewmi no Hebrewmi shou muchho ipeghive kughengu tsalakipe chuqupu kikije lo panow chimemi kughuchove ake.

² Apostolmi chighikini no apapemi kümtsü kukütsü no pi, “Ningu ye aghulhu lüpa lo loji niye Alhou tsa shekushu kughuchove keu ye achipi kumoe.

³ Tighenguno athiküzümiqo, nongu gholo timi tsüni khunoqo ajuaje kivi ani eno Aghungu ngo alokütsü no chhitoi ani keno kishephe lo, nino panongu pesü hipau kümla lo süsüni.

⁴ Eno ningu ye akighini eno atsa shekushu kümla lo ado tsüveni.”

⁵ Panongu no pikeu no aqomi kümtsü lopiqi luve, eno panongu no hipaqo kishelu: Stephen, aküpülü ngo Aghungu Kimthe no chhitoi kemi, Philip, Prochorus, Nicanor, Timon, Parmenas, eno Antiochmi Jewmi chineye lono ighikeu Nicolaus.

⁶ Timi hipaqo apostolmi zülo saghi, eno panongu no panoqo shou au beno inikhu tsü.

⁷ Alhou tsa alaushi ikowove, Jerusalem lo akhopemi kikihi shishe küghüsüve, eno achinemi kutomo no aküpülü khuaye ikhiluve.

Stephen Küghaluve

⁸ Stephen ye küpükini eno aküka no chhitoi akehu akümzapu eno amchipu kümla timiqo gholo shiae.

⁹ Tile timi khami Kuqhopheve kemiw Sinagog (aje ishi piche) lo kihimpemi, Cyrenemi, Alexandriami, Cilicia eno Asiami, no Stephen sasü kütsala thuve.

¹⁰ Ikemu panongu ye Stephen no alokütsü eno Aghungu lono pikeu ghechile mlave.

¹¹ Ikehu panongu no timi khami chuxu no ishi pipe, “Pa no Moses ngo Alhou thaigha keu tsa pikeu nino chiluvae.”

¹² Panongu no timiqo, layemi, eno Ayezah shikükami xukutho sasü Stephen lau ighi no pa tsüqü luve, eno hoho zülo sawuve.

¹³ Panongu no kichile thopimi saghi no ishi pipe, “Timi hipau ye khilemu akimthe-a hipau ngo Ayezah pipütha tave chemoe,

¹⁴ kughengu pa no Nazarethmi Jisü hipau no a-a hipau kütsave nani, eno Moses no ni tsükeu khuayeqo kilive tsü nanie pikeu ningu no chiluvae.”

¹⁵ Hoho mpemi kümtsü no thüghüi pa jukelo pa gi ye kungumi gi toi ithulue.