Apostolmi 4 - Sumi Naga CL (Re-edited) Bible (BSI)

Peter ngo John Hoho Zülo

¹ Peter ngo John pama no timiqo pütsa akelono achinemi, achineki khemi shou akijeu, eno Sadduceemi pama lau ighi.

² Panongu ye shishe amloide ae kughengu pama no Jisü vecheo kithimi xüchilekulu pesü timiqo shika eno sheshu ake.

³ Panongu no pama küghaluve no thoghiu kutolo khathave, kughengu tipani ye avela shiveke.

⁴ Ikemu pama tsa chilu kemi kutomo no pülüve, eno akikihi 5,000 kutolo shive.

⁵ Thoghiu panow yepemi ngo layemi eno Ayezah shikükami no Jerusalem lo hekütsü,

⁶ achinetou Annas, Caiaphas, John, Alexander, eno achinetomi laghami kümtsü kumqo.

⁷ Pama sawo panongu mta lo qhino panongu no ighiju, “Nokujo ye kiu küka momu khuu je lono hi shi kea?”

⁸ Peter no Aghungu Kimthe no shepichhi pe pi, “Timi yepemi eno layemiqo,

⁹ nikujo no akümla kivi khürche lau shikeu, eno kiu vecheo timi hipau viluve keno, hi ghenguno ishi ni chheju aghi aye,

¹⁰ Nazarethmi Jisü Khristo, khuu nongu no yedave kemu Alhou no akithi lono xüputhuve keno, pa je vecheo timi hipau ye vithai nongu zülo puthugho ani kepi nongu eno Israelmi kümtsü no ithilo.

¹¹ Jisü hipau ye nongu aki kishimi no kileve keu tuqu, tino kümtsü nguno atsükupuu tuqu shive keu huke.

¹² Xakulupu ye khuu lau nomu ithumla nani, kughengu ningu xaluni ke atsütsü qholo aje hinguno kütau timiqo lau tsü püamoe.”

¹³ Kughou panongu no Peter ngo John pama mlo kuloghi ithulu eno pama ye kighithimi kumo no inapüghami kepi ithi keno, panongu ye akichiqhive. Pama ye Jisü gholo kichemie pi panongu no michive.

¹⁴ Ikemu timi viluve keu huno pama phivilo puthugho aghi keu ithulu no panongu ye nguku kepu kiumu kühave.

¹⁵ Panongu no pama vilo hoho zülono ipeve lopi azah tsü, eno lakhino lakhi vilo pi,

¹⁶ “Ningu ye pama pesü kiu shiveni kea? Kughengu paküta keu michipu pama vecheo shikeu Jerusalem lo küami kümtsü no ithiva, eno ningu ye lachile mlavae.

¹⁷ Ikemu timiqo gholo alau veküpha pemoni ke ningu ye pama vilo aje hipau pesü khuu sasümu küptsa moni ipive peni.”

¹⁸ Ikehu panongu no pama kuno Jisü je lono khilemu timi pütsa eno kütsü kevi lopi azah tsüve.

¹⁹ Ikemu pama no khochile, “Alhou nguno alau nongu gholuni keu ye Alhou zülo achipi kemo keno nongu no küghatha lo,

²⁰ kughengu ningu ye kiu ithulu eno chiluve akeno pimono amlavae.”

²¹ Kiu shive keno ti ithulu pe timi kümtsü no Alhou sheqhe akehu panongu ye pama ghimelu kepu la kühave no alau kichive püzü phepuwuve.

²² Kughengu timi khuu shou shikipivi michipu pukutsü keno pa ye apunu mpe lhobidi shou shive kemie.

Amlo Kumto ghenguno Inikhu

²³ Kughou pama pheve keno, pama no aküsami lau wuno achinetomi ngo layemi no pama vilo pikeu pesü pi.

²⁴ Panongu no ti chilu no kümtsa ighamku Alhou vilo pi, “Kümtsü shou Ampeu, khuu atsütsü ngo ayeghi eno azüghi ngo tile akeu kümtsü lhosü keno,

²⁵ Nono Aghungu Kimthe pesü ningu pasü David O qeu vecheo ishi pike, “‘Kushiye Jewkumomi eno ashiayeqo ye adou lono mqhumza eno kuchughu kea?

²⁶ Ayeghi lo kükami eno yepemi hekütsü kumqope Ampeu no Nukishe keu mjochile ke’

²⁷ kughengu kuchou no aphughi hipau lono Herod ngo Pontius Pilate pama, eno Jewkumomi ngo Israelmi no hekütsüpe Nono nukishe keu O qeu akimtheu Jisü mjochile ke.

²⁸ Nono azünatha kughu püakeu panongu no shike.

²⁹ Ampeu, itehi panongu no ningu kichi akeu lo jupuku tsülo, eno O qemi pelo amlo kumto lono O tsa pilu pelo.

³⁰ O u chhope shipivi tsülo, eno O qeu akimtheu Jisü je vecheo amchipu eno akümzapu shitsü lo.”

³¹ Panongu no inikhuve kethiu, panongu no kuho akeu-a süküthü, eno Aghungu Kimthe no panongu kümtsü shepichhive no amlo kumto lono Alhou tsa pikibe ae.

Thokha Kümtsü Aqü

³² Küpülümi kümtsü no amlo akükümsü lakhi shi, eno khunomu pa no kiu akeno ti ye paw ke ipimoe, ikemu panongu ye thokha kümtsü aqü shike.

³³ Aküka kumto kije lono apostolmi no Ampeu Jisü xüchilekulu shepe shi, eno panongu kümtsü shou küpükini shishe kije ikughi.

³⁴ Panongu gholo aveküsami kühae, kughengu aki-alu pighimi kutomo no tipaqo jeve no jekulu pewo

³⁵ apostolmi pukhu lo qhitsü kelo tipau pesü avehupu shi akemi kijetsü cheke.

³⁶ Ikehu Levimi lakhi, Cyprus noghami Joseph ipikeu, khuu apostolmi no Barnabas (tipau kiqi ye shikumtokütsüu nu), ipi kutsü keno,

³⁷ pa no pa lu jeve no pisa pewo apostolmi pukhu lo qhitsüe.